ເຈົ້າໜ້າທີ່ເລັ່ງໃຫ້ການຊ່ວຍເຫຼືອປະຊາຊົນເມືອງນານ ຫຼວງພະບາງ ທີ່ນ້ຳໄຫຼຖ້ວມຢ່າງກະທັນຫັນ

ລາຍງານ 30 ກໍລະກົດ 2019, ເນື່ອງຈາກຝົນຕົກໜັກ ນັບແຕ່ເວລາ 3:00​ ໂມງເຊົ້າ ຂອງວັນທີ 30​ ກໍລະກົດນີ້ ເຮັດໃຫ້ນ້ຳນານ ໄຫຼຊູເລີ່ມຕັ້ງແຕ່ເວລາປະມານ 8:00 ໂມງ ນ້ຳໄດ້ໄຫຼເຂົ້າຖ້ວມບ້ານເຮືອນ ແລະ ພື້ນທີ່ທຳການຜະລິດຂອງປະຊາຊົນ ຕາມລ້ອງແມ່ນ້ຳນານ ລວມມີ 7 ບ້ານ: ບ້ານນາຝາຍ, ບ້ານປ່າໄຜ່, ບ້ານສີມຸງຄຸນ, ບ້ານສີບຸນເຮືອງ, ບ້ານນາເລົາ, ບ້ານໂພນຫິນ ແລະ ບ້ານນາເຄີນ ເມືອງນານ,​ ແຂວງຫຼວງພະບາງ.

ປະຊາຊົນບາງຄອບຄົວໄດ້ພຽງເຄື່ອງນຸ່ງຄາຄີງ ແລະ ຍັງມີບາງຄົນຕິດຢູ່ໃນເຮືອນ, ຕາມການເກັບຂໍ້ມູນເບື້ອງຕົ້ນມີພຽງຜູ້ໄດ້ຮັບບາດເຈັບ, ແຕ່ບໍ່ມີລາຍງານຜູ້ເສຍຊີວິດ ສ່ວນຂໍ້ມູນຄວາມເສຍຫາຍ ຍັງຢູ່ໃນຂັ້ນຕອນການເກັບກຳ.

ແຫຼ່ງຂ່າວ ຖວທ ແຂວງຫຼວງພະບາງໄດ້ໃຫ້ຮູ້ວ່າ: ເບື້ອງຕົ້ນອົງການປົກຄອງເມືອງ ໄດ້ສົ່ງກຳລັງເຈົ້າໜ້າທີ່ທະຫານ ແລະ ຕຳຫຼວດເຂົ້າຊ່ວຍເຫຼືອປະຊາຊົນທີ່ຕິດຄ້າງຢູ່ໃນເຮືອນ, ພ້ອມທັງຊ່ວຍປ້ອງກັນຜົນກະທົບໃຫ້ບາງຄອບຄົວ ແລະ ຈັດຕັ້ງການປ້ອງກັນເວນຍາມເຝົ້າລະວັງຕະຫຼອດ 24 ຊົ່ວໂມງ.

ເຫດການດັ່ງກ່າວ, ໄດ້ສ້າງຄວາມເສຍຫາຍຫຼາຍກວ່າທຸກໆປີຜ່ານມາ, ປັດຈຸບັນປະຊາຊົນຕ້ອງການສະບຽງອາຫານ ແລະ ນ້ຳດື່ມ ເພື່ອບັນເທົາໄພໃນເບື້ອງຕົ້ນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube