ລັດຖະມົນຕີກະຊວງການຕ່າງປະເທດເຖິງບາງກອກ ຮ່ວມປະຊຸມລັດຖະມົນຕີຕ່າງປະເທດອາຊຽນ ແລະ ກອງປະຊຸມອື່ນໆ

ລາຍງານ 30 ກໍລະກົດ 2019, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ເດີນທາງເຖິງນະຄອນຫຼວງບາງກອກ, ປະເທດໄທ ເພື່ອເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52, ລວມເຖິງກອງປະຊຸມລັດຖະມົນຕີອາຊຽນກັບປະເທດຄູ່ເຈລະຈາ ແລະ ກອງປະຊຸມອື່ນໆ ໃນລະຫວ່າງວັນທີ 30 ກໍລະກົດ – 3 ສິງຫາ 2019 ນີ້.

ນອກຈາກນີ້, ຍັງຈະມີກອງປະຊຸມລະດັບລັດຖະມົນຕີໃນກອບອະນຸພູມມິພາກອີກ 4 ກອງປະຊຸມໄດ້ແກ່ ກອງປະຊຸມລັດຖະມົນຕີຂໍ້ລິເລີ່ມແມ່ນ້ຳຂອງຕອນລຸ່ມ (LMI) ຄັ້ງທີ 12, ກອງປະຊຸມລັດຖະມົນຕີກອບການຮ່ວມມືແມ່ນ້ຳຂອງ-ຄົງຄາ ຄັ້ງທີ 10, ກອງປະຊຸມລະດັບລັດຖະມົນຕີປະເທດລຸ່ມແມ່ນ້ຳຂອງກັບເກົາຫຼີໃຕ້ ຄັ້ງທີ 9 ແລະ ກອງປະຊຸມລັດຖະມົນຕີປະເທດລຸ່ມແມ່ນ້ຳຂອງກັບຍີ່ປຸ່ນ ຄັ້ງທີ 12 ແລະ ກິດຈະກຳອື່ນໆທີ່ກ່ຽວຂ້ອງ.

ໃນການປະຊຸມຄັ້ງນີ້ ຈະມີຜູ້ແທນຈາກຫຼາຍກວ່າ 30 ປະເທດເຂົ້າຮ່ວມໄດ້ແກ່: ປະເທດສະມາຊິກອາຊຽນ, ປະເທດຄູ່ເຈລະຈາ 10 ປະເທດ (ອົດສະຕຣາລີ, ການາດາ, ຈີນ, ສະຫະພາບເອີຣົບ, ອິນເດຍ, ຍີ່ປຸ່ນ, ນິວຊີແລນ, ເກົາຫຼີໃຕ້, ລັດເຊຍ, ສະຫະລັດ ອາເມຣິກາ), ປະເທດສະມາຊິກກອງປະຊຸມອາຊຽນ ວ່າດ້ວຍການຮ່ວມມືດ້ານການເມືອງ ແລະ ຄວາມໝັ້ນຄົງໃນພູມມິພາກອາຊີ-ປາຊີຟິກນອກເໜືອຈາກປະເທດຄູ່ເຈລະຈາອີກ 7 ປະເທດ (ບັງກະລາເທດ, ເກົາຫຼີເໜືອ, ມົງໂກລີ, ປາກິດສະຖານ, ປາປົວນິວກິນີ, ຕິມໍ-ເລສເຕ ແລະ ສີລັງກາ) ແລະ ປະເທດທີ່ໄດ້ຮັບເຊີນໃນຖານະແຂກຂອງປະທານອາຊຽນໄດ້ແກ່: ນອກແວ, ເປຣູ, ສະວິດ, ຕວັກກີ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube