ກົມອຸຕຸເຕືອນ ພາຍຸ “ວິພາ” ສະບັບທີ 2 ຈະເຄື່ອນເຂົ້າລາວໃນໄລຍະວັນທີ 4-5 ສິງຫາ 2019 ນີ້

ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນ ໄພພາຍຸໝຸນເຂດຮ້ອນ ວິພາ (WIPHA) ສະບັບທີ 2 ເລກທີ 1090/ກອຕທ ລົງວັນທີ 2 ສິງຫາ ວ່າ: ເວລາ 09:00 ໂມງ ຕອນເຊົ້າວັນສຸກນີ້ ພາຍຸດັ່ງກ່າວມີຈຸດສູນກາງຢູ່ເສັ້ນຂະໜານທີ 21.2 ອົງສາເໜືອ ແລະ ເສັ້ນແວງທີ 108.8 ອົງສາຕາເວັນອອກ, ໄດ້ເຄື່ອນທີ່ເຂົ້າຝັ່ງພາກເໜືອຂອງຫວຽດນາມຢ່າງຊ້າໆ ແລະ ພາຍຸຫົວນີ້ຈະເຄື່ອນເຂົ້າຜ່ານພາກເໜືອ ແລະ ພາກກາງຂອງປະເທດລາວ ໃນໄລຍະວັນທີ 4-5 ສິງຫາ 2019 ເຊິ່ງຈະເຮັດໃຫ້ມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍ ຫາ ປານກາງ ເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອ ລົງຫາພາກກາງ ແລະ ພາກໃຕ້.

ດັ່ງນັ້ນ, ຈຶ່ງແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ແຂວງຜົ້ງສາລີ, ຫົວພັນ, ຊຽງຂວາງ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ນັບທັງນະຄອນຫຼວງວຽງຈັນ, ສາລະວັນ, ຈຳປາສັກ, ເຊກອງ ແລະ ອັດຕະປື ໃຫ້ມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ນ້ຳຖ້ວມຊຸ, ນ້ຳຖ້ວມອັ່ງ ແລະ ສຳລັບຜູ້ທີ່ຈະເດີນທາງໄປພາກເໜືອໃຫ້ມີສະຕິລະມັດລະວັງຕໍ່ສະພາບດິນເຈື່ອນ.

ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດໃນໄລຍະ 1 ຫາ 3 ວັນຕໍ່ໜ້ານີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube