6 ເດືອນຕົ້ນປີ 2019 ສປປ.ລາວ ເກີນດຸນການຄ້າເກືອບ 18 ລ້ານໂດລາ, ຍັງບໍ່ລວມການສົ່ງອອກໄຟຟ້າ

ກະຊວງອຸດສາຫະກຳ ແລະ ການຄ້າລາຍງານວ່າ: ເດືອນ 6 ປີ 2019 ການນໍາເຂົ້າ ແລະ ສົ່ງອອກຂອງ ສປປ.ລາວ ມີມູນຄ່າ 814,99 ລ້ານໂດລາສະຫະລັດ ໃນນັ້ນ, ມູນຄ່າການສົ່ງອອກປະມານ 366.72 ລ້ານໂດລາສະຫະລັດ ແລະ ນໍາເຂົ້າປະມານ 448.27 ລ້ານໂດລາສະຫະລັດ ຂາດດຸນການຄ້າປະມານ 81.55 ລ້ານໂດລາສະຫາລັດ. ແຕ່ເດືອນ 1-6 ປີ 2019 ມູນຄ່າການນໍາເຂົ້າ ແລະ ສົ່ງອອກທັງໝົດປະມານ 5,469.47 ລ້ານໂດລາສະຫະລັດ ໃນນັ້ນສົ່ງອອກປະມານ 2,743.69 ລ້ານໂດລາສະຫະລັດ ແລະ ນໍາເຂົ້າປະມານ 2,725.77 ລ້ານໂດລາສະຫະລັດ ເກີນດຸນການຄ້າປະມານ 17.92 ລ້ານໂດລາສະຫະລັດ.

ສິນຄ້າສົ່ງອອກຫຼັກປະກອບມີ ແຮ່ທອງ 48.42 ລ້ານ ໂດລາສະຫະລັດ, ທອງແດງ ແລະ ເຄື່ອງຂອງທີ່ເຮັດດ້ວຍທອງແດງ 35.52 ລ້ານ ໂດລາສະຫະລັດ, ໝາກກ້ວຍ 10.99 ລ້ານ ໂດລາສະຫະລັດ, ເຍື່ອໄມ້ ແລະ ເຍື່ອໄມ້ຈາກເສັ້ນໄຍເຊລລູອື່ນໆ 30.94 ລ້ານ ໂດລາສະຫະລັດ, ​ໂຄງຮ່າງ ແລະ ຊີ້ນສ່ວນກ້ອງບັນທຶກພາບ 19.95 ລ້ານ ໂດລາສະຫະລັດ, ເຄື່ອງດື່ມ (ນໍ້າອັດລົມ, ນໍ້າ, ເຄື່ອງດືມຊູຸກໍາລັງ) 22.32 ລ້ານໂດລາສະຫະລັດ, ຄໍາປະສົມ ແລະ ຄໍາແທ່ງ 15.61 ລ້ານ ໂດລາສະຫະລັດ, ມັນຕົ້ນ 2.39 ລ້ານ ໂດລາສະຫະລັດ, ເຄື່ອງນຸ່ງຫົ່ມ 18.18 ລ້ານ ໂດລາສະຫະລັດ, ເຄື່ອງໄຟຟ້າ ແລະ ອຸປະກອນໄຟຟ້າ 15.11 ລ້ານ ໂດລາສະຫະລັດ ແລະ ກາເຟ (ບໍ່ທັນປຸງແຕ່ງ) 5.95 ລ້ານໂດລາສະຫະລັດ ແລະ ສິນຄ້າອື່ນໆ

ໝວດສິນຄ້ານໍາເຂົ້າຫຼັກປະກອບມີ ພາຫະນະທາງບົກ 31.60 ລ້ານໂດລາສະຫະລັດ, ເຄື່ອງໄຟຟ້າ ແລະ ອຸປະກອນໄຟຟ້າ 19.97 ລ້ານ ໂດລາສະຫະລັດ,​ ນໍ້າມັນກາຊວນ 45.45 ລ້ານໂດລາສະຫະລັດ, ອຸປະກອນກົນຈັກ 36.21 ລ້ານໂດລາສະຫະລັດ, ເຫຼັກ ແລະ ເຄື່ອງທີ່ເຮັດດ້ວຍເຫຼັກ 33.02 ລ້ານ ໂດລາສະຫະລັດ, ເຄື່ອງດື່ມຊະນິດຕ່າງໆ 21.06 ລ້ານ ໂດລາສະຫະລັດ, ຊີ້ນສ່ວນອາໄຫລ່ລົດ 14.79 ລ້ານໂດລາສະຫະລັດ, ນໍ້າມັນແອັດຊັງ 11.62 ລ້ານໂດລາສະຫະລັດ, ເຫຼັກເສັ້ນ ແລະ ເຫຼັກຮູບປະພັນ 10.12 ລ້ານໂດລາສະຫະລັດ, ໄຟຟ້າ 10.18ລ້ານ ໂດລາສະຫະລັດ ແລະ ອື່ນໆ.

ບັນດາປະເທດທີ່ ສປປ.ລາວ ສົ່ງອອກຫຼັກປະກອບມີ: ໄທ 91.24 ລ້ານໂດລາສະຫະລັດ,​ ສປ.ຈີນ 127.48 ລ້ານ ໂດລາສະຫະລັດ, ສສ.ຫວຽນນາມ 93.90 ລ້ານໂດລາສະຫະລັດ, ອິນເດຍ 8.60 ລ້ານໂດລາສະຫະລັດ, ຍີ່ປຸ່ນ 6.92 ລ້ານ ໂດລາສະຫະລັດ, ເຢຍລະມັນ 6.48 ລ້ານໂດລາສະຫະລັດ, ສ.ອາເມຣິກາ 2.50 ລ້ານໂດລາສະຫະລັດ, ອັງກິດ 2.17 ລ້ານໂດລາສະຫະລັດ,​ ແລະ ສິວິດເຊີແລນ 6.72 ລ້ານໂດລາສະຫະລັດ.

ບັນດາປະເທດທີ່ ສປປ.ລາວ ນໍາເຂົ້າຫຼັກປະກອບມີ: ໄທ 262.97 ລ້ານໂດລາສະຫະລັດ, ສປ.ຈີນ 100.95 ລ້ານໂດລາສະຫະລັດ, ສສ.ຫວຽດນາມ 51.50 ລ້ານໂດລາສະຫະລັດ, ຍີ່ປຸ່ນ 5.32 ລ້ານ ໂດລາສະຫະລັດ, ສ.ເກົາຫຼີ 5.20 ລ້ານໂດລາສະຫະລັດ, ສ.ອາເມຣິກາ 2.24 ລ້ານໂດລາສະຫະລັດ,​ ແລະ ແບນຊິກ 2.02 ລ້ານໂດລາສະຫະລັດ, ອິນເດຍ 2.59 ລ້ານໂດລະສະຫະລັດ, ຮົງກົງ ຈີນ 2.73 ລ້ານໂດລາສະຫະລັດ.

ມູນຄ່າການນໍາເຂົ້າ ແລະ ສົ່ງອອກ ຂອງ ສປປ.ລາວ ປະຈໍາເດືອນ 6 ປີ 2019 ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ. ສໍາລັບມູນຄ່າການສົ່ງອອກໄຟຟ້າ ທາງສູນຂໍ້ມູນຂ່າວສານທາງດ້ານການຄ້າ, ກະຊວງອຸດສາຫະກຳ ແລະ ການຄ້າ ຈະເອົາລົງພາຍຫຼັງໄດ້ເກັບກໍາຕົວເລກສະຖິຕິຄົບຖ້ວນ ແລະ ຊັດເຈນແລ້ວ.