ວັນສື່ມວນຊົນລາວ ຄົບຮອບ 69 ປີ, ຖວທ ເນັ້ນໜັກໃຫ້ສື່ຢຶດໝັ້ນແນວທາງ ແລະ ປັບຕົວເຂົ້າສູ່ຍຸກດິຈິຕອນ

ລາຍງານ 13 ສິງຫາ 2019: ອີງຕາມການລາຍງານຂອງວິທະຍຸກະຈາຍສຽງແຫ່ງຊາດ, ໃນຕອນບ່າຍຂອງວັນທີ 13 ສິງຫາ 2019, ທີ່ຫໍວັດທະນະທໍາແຫ່ງຊາດ, ນະຄອນຫຼວງວຽງຈັນ, ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດງານໂຮມຊຸມນຸມເພື່ອສະເຫຼີມສະຫຼອງວັນສື່ມວນຊົນ ແລະ ການພິມຈໍາໜ່າຍລາວ ຄົບຮອບ 69 ປີ (13/81950-13/8/2019) ໂດຍການໃຫ້ກຽດເຂົ້າຮ່ວມຂອງທ່ານ ສຈ.ປອ ບໍ່ແສງຄຳ ວົງດາລາ ລັດຖະມົນຕີກະຊວງ ຖວທ, ແລະ ໂດຍມີການນໍາ ແລະ ພະນັກງານທີ່ເຮັດວຽກງານສື່ ແລະ ການພິມຈໍາໜ່າຍທັງພາກລັດ, ເອກະຊົນ ແລະ ຜູ້ໃຫ້ການສະໜັບສະໜູນເຂົ້າຮ່ວມ 300 ກວ່າຄົນ.

Photo: KPL

ໃນງານໂຮມຊຸມນຸມ, ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖວທ ທັງເປັນປະທານສະມາຄົມນັກຂ່າວແຫ່ງ ສປປ.ລາວ ໄດ້ຕາງໜ້າໃຫ້ສື່ມວນຊົນ ແລະ ການພິມຈໍາໜ່າຍຂື້ນຜ່ານບົດສະຫຼຸບຜົນງານການເຄື່ຶອນໄຫວຂອງສື່ມວນຊົນ ແລະ ການພິມຈໍາໜ່າຍ, ໂດຍໃນບາງຕອນສໍາຄັນ ທ່ານໄດ້ກ່າວວ່າ: ໃນໜຶ່ງປີຜ່ານມາ, ເຖິງວ່າພວກເຮົາໄດ້ປະສົບພົບພໍ້ກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຈາກສະພາບການເຊື່ອມໂຍງໃນຂະບວນການປະຕິວັດວິທະຍາສາດເຕັກໂນໂລຊີຂໍ້ມູນຂ່າວສານ ທີ່ນັບມື້ນັບຂະຫຍາຍຕົວກ່າວເຂົ້າສູ່ຍຸກດິຈິຕອນ 4.0, ເຊິ່ງໄດ້ສົ່ງຜົນກະທົບທັງທາງບວກ ແລະ ທາງລົບຕໍ່ການພັດທະນາຢູ່ປະເທດເຮົາກໍ່ຕາມ, ແຕ່ພາຍໃຕ້ການຊີ້ນໍາ-ນໍາພາຂອງພັກເວົ້າລວມ, ກໍ່ຄືຂອງອົງຄະນະພັກ ແລະ ຄະນະນໍາກະຊວງ ຖວທ ເວົ້າສະເພາະ, ພວກເຮົາໄດ້ປະຕິບັດໜ້າທີ່ຢ່າງຕັ້ງໜ້າ ທຸ້ມເທທັງສະຕິປັນຍາ ແລະ ເຫື່ອແຮງຂອງຕົນເຂົ້າໃນການໂຄສະນາເຜີຍແຜ່ຜົນສໍາເລັດແຕ່ລະໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ, ທັງປຸກລະດົມຈິດໃຈຮັກຊາດ ແລະ ຄວາມເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ.

ສື່ມວນຊົນ ແລະ ການພິມຈໍາໜ່າຍລາວ ໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ທັງທາງດ້ານປະລິມານ ແລະ ຄຸນນະພາບໂດຍມີໂຄງລ່າງພື້ນຖານທີ່ໄດ້ຮັບການພັດທະນາໄປສູ່ຄວາມທັນສະໄໝ ແລະ ຄ່ອຍໆຫັນຈາກລະບົບອານາລອກໄປສູ່ລະບົບດິຈິຕອນໄດ້ໂດຍພື້ນຖານ. ອັນພົ້ນເດັ່ນແມ່ນການນໍາໃຊ້ເຄື່ອຂ່າຍອິນເຕີເນັດໃນການສະໝອງຂໍ້ມູນຂ່າວສານ, ສາລະຄວາມຮູ້ ແລະ ສາລະບັນເທີງໃຫ້ແກ່ເປົ້າໝາຍເພື່ອຮັບໃຊ້ການພັດທະນາເສດຖະກິດ-ສັງຄົມໄດ້ຢ່າງວ່ອງໄວ, ອຸດົມສົມບູນຕາມທິດສີຂຽວ ແລະ ຍືນຍົງ.

ໃນຂະນະດຽວກັນ, ບຸກຄະລາກອນສື່ມວນຊົນ ແລະ ການພິມຈໍາໜ່າຍ ກໍ່ໄດ້ຮັບການຍົກລະດັບຢ່າງຕໍ່ເນື່ອງ ທັງພາຍໃນແລະຕ່າງປະເທດ.
ໃນໂອກາດເຂົ້າຮ້ວມພິທີສະເຫຼີມສະຫຼອງໃນຄັ້ງນີ້, ທ່ານ ສຈ.ປອ ບໍ່ແສງຄໍາ ວົງດາລາ ໄດ້ສະແດງຄວາມຍ້ອງຍໍຊົມເຊີຍ ບັນດານັກຮົບສື່ມວນຊົນ ແລະ ການພິມຈໍາໜ່າຍທຸກພາກສ່ວນທີ່ໄດ້ອຸທິດເຫື່ອແຮງ ແລະ ສະຕິປັນຍາເຮັດສໍາເລັດພາລະກິດທີ່ມີກຽດສະຫງ່າຂອງຕົນ. ສື່ມວນຊົນ ແລະ ການພິມຈໍາໜ່າຍ ຍັງເປັນປະໂຫຍດສູງສຸດໃຫ້ແກ່ປະເທດຊາດຂອງພວກເຮົາ. ເພື່ອປະຕິບັດໜ້າທີ່ການເມືອງທີ່ໄດ້ຮັບມອບໜາຍ, ເສີມຂະຫຍາຍຜົນງານ ແລະ ຈໍາກັດຈຸດອ່ອນຂໍ້ຄົງຄ້າງນັ້ນ, ທ່ານລັດຖະມົນຕີ ໄດ້ຊີ້ນໍາໃຫ້ສື່ມວນຊົນ ແລະ ການພິມຈໍາໜ່າຍຕ້ອງໄດ້ເອົາໃຈໃສ່ 7 ວຽກງານທີ່ສໍາຄັນໃນຕໍ່ໜ້າດັ່ງນີ້:

  1. ສືບຕໍ່ເອົາໃຈໃສ່ວຽກງານແນວຄິດການເມືອງໃຫ້ດີ, ມີຄວາມຮັບຜິດຊອບທາງການເມືອງສູງຕໍ່ໜ້າທີ່ວຽກງານ. ເຮັດໃຫ້ສື່ມວນຊົນ ແລະ ສິ່ງພິມຂອງພວກເຮົາເປັນກະບອກສຽງ ແລະ ເວທີໂຄສະນາແນວທາງນະໂຍບາຍຂອງພັກ, ລະບຽບກົດໜາຍຂອງລັດ, ແຜນພັດທະນາເສດຖະກິດ-ສັງຄົມຂອງລັດຖະບານ, ເປັນເວທີສະແດງຄວາມຄິດເຫັນ ແລະ ຄວາມມຸ່ງມາດປາຖະໜາອັນຊອບທໍາຂອງປະຊາຊົນລາວບັນດາເຜົ່າ, ຢຶດໝັ້ນ ແລະ ປະຕິບັດກົດໝາຍວ່າດ້ວຍສື່ມວນຊົນແລະກົດໝາຍພິມຈໍາໜ່າຍຢ່າງຖືກຕ້ອງ, ຄົບຖ້ວນ ແລະ ເຂັ້ມງວດ.
  2. ເອົາໃຈໃສ່ຈັດຕັ້ງປະຕິບັດວິໄສທັດ 2030, ຍຸດທະສາດຮອດປີ 2025 ແລະ ແຜນພັດທະນາວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວຂອງ ສປປລາວ 2016-2020 ໃຫ້ປະກົດຜົນເປັນຈິງ.
  3. ສືບຕໍ່ໂຄສະນາເຜີຍແຜ່ຜ່ານສື່ມວນຊົນ ແລະ ການພິມຈໍາໜ່າຍກ່ຽວກັບຂະບວນການຕ່າງໆຮັບໃຊ້ໃຫ້ແກ່ການກະກຽມກອງປະຊຸມໃຫຍ່ຄັ້ງທີ XI ຂອງພັກ, ປີທ່ອງທ່ຽວລາວ-ຈີນ 2019, ການກະກຽມງານກິລາແຫ່ງຊາດທີ່ແຂວງຊຽງຂວາງ, ການສະເຫຼີມສະຫຼອງທົ່ງໄຫຫີນແຂວງຊຽງຂວາງເຂົ້າເປັນມໍລະດົກໂລກ, ການໂຄສະນາເຫດການສໍາຄັນຂອງພັກ, ຂອງຊາດ ແລະ ສາກົນໃຫ້ດີ.
  4. ສືບຕໍ່ປັບປຸງກົດໜາຍ ແລະ ສ້າງນິຕິກໍາລຸ່ມກົດໝາຍໃຫ້ພຽງພໍ, ສອດຄ່ອງ ແລະ ຮັດກຸມ.
  5. ສືບຕໍ່ປັບປຸງວຽກງານຄຸ້ມຄອງສື່ມວນຊົນ ແລະ ການພິມຈໍາໜ່າຍໃຫ້ເຂັ້ມແຂງ, ສ້າງເງື່ອນໄຂໃຫ້ສື່ມວນຊົນ ແລະ ການພິມຈໍາໜ່າຍສາມາດພັດທະນາຕາມທິດຄຸນນະພາບ, ທັນສະໄໝ, ປອດໄພ ແລະ ຍືນຍົງ.
  6. ໃນສະພາບທີ່ການສ້າງລາຍຮັບວິຊາການຈາກສື່ມວນຊົນນັບມື້ນັບຫຼຸດລົງນີ້, ຈະຕ້ອງໄດ້ຮີບຮ້ອນເອົາໃຈໃສ່ຄົ້ນຄວ້າ, ວິໄຈ ແລະ ຊອກຫາວິທີການໃໝ່ໃນການຊອກຫາແຫຼ່ງລາຍຮັບວິຊາການຈາກສື່ມວນຊົນ ແລະ ການພິມຈຳໜ່າຍ, ລວມທັງການໃຊ້ຈ່າຍເຂົ້າໃນວຽກງານໃຫ້ມີຄວາມຄ່ອງຕົວທີ່ຖືກຕ້ອງສອດຄ່ອງກັບລະບຽບກົດໝາຍໃຫ້ໄດ້ໂດຍໄວ ຫຼື ຫັນໄປສູ່ການກຸ້ມຕົນເອງ.
  7. ເອົາໃຈໃສ່ກໍ່ສ້າງພະນັກງານໝຸ່ມນ້ອຍສືບທອດປ່ຽນແທນທີ່ຮັບປະກັນທາງດ້ານທັດສະນະຫຼັກໝັ້ນ, ຄຸນທາດການເມືອງ ແລະ ວິຊາສະເພາະທີ່ເຂັ້ມແຂງເພື່ອເຮັດໜ້າທີ່ສຳເລັດໜ້າທີ່ສຳຄັນທີ່ພັກລັດໄດ້ມອບໝາຍໃຫ້.

ໃນງານໂຮມຊຸມນຸມຄັ້ງນີ້, ຍັງມີການຈັດງານວາງສະແດງຮູບພາບຜົນງານການເຄື່ອນໄຫວຂອງສື່ມວນຊົນ ແລະ ການພິມຈຳໜ່າຍລາວຕື່ມອີກ ເພື່ອເປັນການຫວນຄືນມູນເຊື່ອຂອງສືມວນຊົນ ແລະ ການພິມຈຳໜ່າຍ, ເປັນການເຕົ້າໂຮມຄວາມສາມັກຄີພາຍໃນສື່ມວນຊົນ ແລະ ພິມຈຳໜ່າຍໃຫ້ແໜ້ນແຟ້ນ, ພ້ອມທັງສ້າງຄວາມຮັບຮູ້ ແລະ ເຂົ້າໃຈທີ່ຖືກຕ້ອງຕໍ່ບົດບາດ, ໜ້າທີ່, ມູນເຊື້ອ ແລະ ຜົນງານຂອງວຽກງານດັ່ງກ່າວ. ນອກນັ້ນ, ກໍ່ຍັງເປັນການປຸກລະດົມໃຫ້ທົ່ວສັງຄົມໄດ້ມີສ່ວນຮ່ວມໃນການສ້າງຄວາມເຂັ້ມແຂງໃຫ້ອົງການສື່ມວນຊົນ ແລະ ການພິມຈຳໜ່າຍລາວໃຫ້ນັບມື້ນັບສູງຂື້ນ.