ສັກກະຫຼາດໃໝ່ທາງສາສະໜາ ວັດເກົ່າແກ່ຍີ່ປຸ່ນໃຫ້ປະຊາຊົນຟັງທຳ ຜ່ານຫຸ້ນຍົນນັກບວດ

ວັດໂຄໄດຈິ ວັດເກົ່າແກ່ອາຍຸ 400 ປີໃນກຽວໂຕ ປະເທດຍີ່ປຸ່ນ ໄດ້ພະຍາຍາມຊັກຈູງຄົນຮຸ້ນໃໝ່ໃຫ້ເຫຼື່ອມໃສທັດໃນສາສະໜາພຸດ ແລະ ເຂົ້າວັດຫຼາຍຂຶ້ນດ້ວຍການໃຊ້ຫຸ່ນຍົນນັກບວດ ທີ່ທາງວັດເຊື່ອວ່າຈະເປັນໃບໜ້າໃໝ່ຂອງສາສະໜາ.

ຫຸ່ນຍົນນັກບວດກົນຈັກທີ່ມີຂະໜາດເທົ່າມະນຸດນີ້ ມີຊື່ວ່າ “ມິນດາ” (Mindar) ໂດຍມີຕົ້ນແບບມາຈາກພະໂພທິສັດ. ໃບໜ້າ, ມືສອງຂ້າງ ແລະ ບ່າໄຫຼ່ ຫຸ້ມດ້ວຍຊິລິໂຄນ ເພື່ອໃຫ້ຄ້າຍຄືຜິວໜັງມະນຸດ ແຕ່ອະໄວຍະວະສ່ວນອື່ນໆ ປ່ອຍປະໃຫ້ເຫັນເຄື່ອງກົນຈັກທີ່ຢູ່ພາຍໃນຢ່າງຊັດເຈນ ໂດຍສາມາດເໜັງລຳຕົວ, ແຂນ ແລະ ຫົວໄດ້.

ເມື່ອມິນດາພະນົມມືນົບ ແລະ ເປັ່ງສຽງສູດມົນ, ຝາ ແລະ ເພດານພາຍໃນຫ້ອງປະຕິບັດທຳຈະມືດລົງ ແລ້ວເກີດແສງສີຈາກເຕັກໂນໂລຊີເລເຊີ ສະແດງບົດສູດພາສາຍີ່ປຸ່ນ ພ້ອມຄຳແປເປັນພາສາອັງກິດ ແລະ ຈີນ ກໍ່ໃຫ້ເກີດບັນຍາກາດການເທດສະໜາທຳທີ່ແປກຕາ.

ຍາພໍ່ເທນໂຊ ໂກໂຕະ ພະສົງວັດໂຄໄດຈິ ໃຫ້ສຳພາດກັບສຳນັກຂ່າວ AFP ວ່າ ຕະຫຼອດ 2,000 ປີ ຜ່ານມາ ພະພຸດທະຮູບຈຳກັດຢູ່ພຽງປາງຕ່າງໆຄື: ນັ່ງ, ຢືນ ແລະ ນອນ ເທົ່ານັ້ນ ແຕ່ຍຸກສະໄໝໄດ້ປ່ຽນໄປແລ້ວ ບໍ່ແປກດອກທີ່ຫາກພະພຸດທະຮູບຈະເວົ້າ ແລະ ເຄື່ອນໄຫວໄດ້, ຫຸ່ນຍົນບໍ່ມີວັນຕາຍ ມັນຈະເພີ່ມພູນຄວາມຮູ້ ແລະ ພັດທະນາຢ່າງຕໍ່ເນື່ອງ ນີ້ແຫຼະຄືຄວາມງົດງາມຂອງຫຸ່ນຍົນທີ່ສາມາດຮັກສາ ແລະ ສະສົມຄວາມຮູ້ໄດ້ຢ່າງໄຮ້ຂີດຈຳກັດ ດ້ວຍເຕັກໂນໂລຊີສະໝອງກົນອັດສະລິຍະ ມິນດາຍິ່ງຈະສະຫຼາດ ແລະ ຊ່ວຍໃຫ້ຍາດໂຍມໄດ້ພົບທາງພົ້ນທຸກ.

ວັດແຫ່ງນີ້ ເລີ່ມໃຊ້ຫຸ່ນຍົນມິນດາ ເມື່ອຕົ້ນປີທີ່ຜ່ານມາ ເຊິ່ງເປັນໂຄງການຮ່ວມມືລະຫວ່າງວັດໂຄໄດຈິ ກັບ ສຈ. ຮິໂຣຊິ ອິຊິກຸໂຣະ ດ້ານວິສະວະກຳຫຸ່ນຍົນຂອງມະຫາວິທະຍາໄລໂອຊາກາ ດ້ວຍເງິນທຶນການພັດທະນາເກືອບ 1 ລ້ານໂດລາສະຫະລັດ.

ໂດຍຍາພໍ່ເທນໂຊ ໂກໂຕະ ປະຕິດເສດຂໍ້ກ່າວຫາທີ່ວ່າວັດໂຄໄດຈິກຳລັງລົບຫຼູ່ສາສະໜາ “ຈະລົບຫຼູ່ໄດ້ແນວໃດ ໃນເມື່ອຫຸ່ນຍົນບໍ່ມີວິນຍານ”, ພະພຸດທະສາສະໜາບໍ່ເຄີຍສອນໃຫ້ເຊື່ອໃນພະເຈົ້າ ແຕ່ສອນໃຫ້ເຮົາປະຕິບັດຕາມຄຳສອນຂອງພະພຸດທະເຈົ້າ ດັ່ງນັ້ນ, ມັນບໍ່ສຳຄັນວ່າ ເຮົາເຂົ້າເຖິງທຳມະໄດ້ຈາກທາງໃດ ບໍ່ວ່າຈະເປັນເຄື່ອງກົນຈັກ, ເສດເຫຼັກ ຫຼື ຕົ້ນໄມ້.