ອິນເດຍ-ປາກິດສະຖານ ດວນປືນໃຫຍ່ທີ່ແຄສເມຍ ເຮັດໃຫ້ທັງສອງສ່ຽງເຂົ້າສູ່ພາວະສົງຄາມອີກຄັ້ງ

ລາຍງານ 18 ສິງຫາ 2019: ກອງທັບອິນເດຍ ແລະ ກອງທັບປາກິດສະຖານ ຍິງປືນໃຫຍ່ຕອບໂຕ້ກັນຂ້າມເສັ້ນແບ່ງເຂດແດນ ທີ່ເອີ້ນວ່າ “ເສັ້ນຄວບຄຸມ” ໃນລັດຈຳມູ ແລະ ແຄສເມຍຢ່າງໜັກໜ່ວງ ເມື່ອວັນເສົາ ທີ່ຜ່ານມາ, ເຮັດໃຫ້ທະຫານອິນເດຍເສຍຊີວິດ 1 ຄົນ, ເຊິ່ງທັງສອງປະເທດມີຄວາມຂັດແຍ່ງກັນເລື່ອງດິນແດນໃນລັດຈຳມູ ແລະ ແຄສເມຍ ມາຕັ້ງແຕ່ໄດ້ຮັບເອກະລາດ ເມື່ອປີ 1947.

ການຍິງຕອບໂຕ້ກັນຄັ້ງຫຼ້າສຸດນີ້ ເກີດຂຶ້ນພາຍຫຼັງທີ່ລັດຖະບານອິນເດຍຕັດສິນໃຈ ຍົກເລີກສະຖານະພິເສດຂອງລັດແຄສເມຍ ໃນຝັ່ງທີ່ຢູ່ພາຍໃຕ້ການປົກຄອງຂອງອິນເດຍ ສົ່ງຜົນໃຫ້ເກີດການປະທ້ວງໃນກຸ່ມປະຊາຊົນທ້ອງຖິ່ນ ລວມທັງລັດຖະບານປາກິດສະຖະານ ແລະ ຈີນເອງກໍ່ສະແດງຄວາມບໍ່ສະບາຍໃຈ.

ເມື່ອວັນສຸກ ທີ່ຜ່ານມາ ປາກິດສະຖານ ແລະ ຈີນປະສົບຄວາມສຳເລັດໃນການຮ້ອງຂໍໃຫ້ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໃນນະຄອນນິວຢອກ, ສະຫະລັດ ອາເມຣິກາ ຮຽກປະຊຸມບັນຫາແຄສເມຍ ເປັນການພາຍໃນ ເຊິ່ງຖືເປັນຄັ້ງທຳອິດນັບຕັ້ງແຕ່ສົງຄາມອິນເດຍ-ປາກິດສະຖານ 1971, ທ່ານ ອິນຣານ ຂ່ານ ນາຍົກລັດຖະມົນຕີປາກິດສະຖານ ໄດ້ກ່າວຊົມເຊີນການຕັດສິນໃຈຈັດກອງປະຊຸມຂອງ UNSC ວ່າ ຈະເປັນການແກ້ໄຂບັນຫາຄວາມທຸກຍາກຂອງປະຊາຊົນແຄສເມຍ ແລະ ຮັບປະກັນວ່າການແກ້ໄຂຄວາມຂັດແຍ່ງເປັນຄວາມຮັບຜິດຊອບຂອງ UNSC.

ແຕ່ລັດຖະບານອິນເດຍຢືນຢັນວ່າ ສະຖານະການຂອງລັດແຄສເມຍເປັນວຽກງານພາຍໃນ, ທາງດ້ານຂອງທ່ານ ຣັດຊະນາດ ສິງ ລັດຖະມົນຕີກະຊວງປ້ອງກັນປະເທດອິນເດຍ ລົງຂໍ້ຄວາມໃນ Twitter ເມື່ອວັນສຸກ ທີ່ຜ່ານມາວ່າ: ອິນເດຍອາດປ່ຽນແປງນະໂຍບາຍ ບໍ່ໂຈມຕີກ່ອນດ້ວຍອາວຸດນິວເຄຼຍ ທີ່ຍຶດຖືຢ່າງເຄັ່ງຄັດມາໂດຍຕະຫຼອດ ແຕ່ສິ່ງທີ່ຈະເກີດຂຶ້ນໃນອະນາຄົດ ຂຶ້ນຢູ່ກັບສະຖານະການໃນຂະນະນັ້ນ.

ຄວາມຄິດເຫັນຂອງທ່ານ ຣັດຊະນາດ ສິງ ເກີດຂຶ້ນພາຍຫຼັງການເດີນທາງຢ້ຽມຢາມເມືອງໂພຄຼັນ ໃນລັດຣາຊາສະຖານ ທາງພາກຕາເວັນຕົກຂອງອິນເດຍ ເຊິ່ງອິນເດຍປະສົບຄວາມສຳເລັດໃນການທົດລອງອາວຸດນິວເຄຼຍ ເມື່ອປີ 1998 ພາຍໃຕ້ລັດຖະບານທີ່ນຳພາໂດຍທ່ານນາຍົກລັດຖະມົນຕີ ອະຕານ ອັສປາຢີ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube