ແກນນຳການປະທ້ວງໃນຮົງກົງ ຖືກຫອບຂຶ້ນລົດຕູ້ ຍັງບໍ່ຮູ້ສະຕາກຳ, ຕຳຫຼວດຍັງບໍ່ສະແດງທ່າທີ

ລາຍງານ 30 ສິງຫາ 2019: ພັກເດໂມຊິສໂຕ ອອກຖະແຫຼງການວ່າ ທ້າວ ໂຈຊົວ ຫວ່ອງ ອາຍຸ 22 ປີ ທີ່ດຳລົງຕຳແໜ່ງເລຂາທິການພັກຖືກຄວບຄຸມຕົວຂຶ້ນລົດຄັນໜຶ່ງ ທີ່ມຸ່ງໜ້າໄປຍັງຫ້ອງການຕຳຫຼວດໃນເຂດຫວານໄຈ໋ ໂດຍເຫດການເກີດຂຶ້ນລະຫວ່າງທີ່ທ້າວ ໂຈຊົວ ຫວ່ອງ ກຳລັງຍ່າງໄປຍັງສະຖານີລົດໄຟໃຕ້ດິນເຊົາ ຮໍໄຮຊອນ ໃນຕອນເຊົ້າວັນສຸກນີ້ຕາມເວລາທ້ອງຖິ່ນ, ຂະນະທີ່ຕຳຫຼວດຍັງປະຕິເສດສະແດງຄວາມຄິດເຫັນຕໍ່ລາຍງານດັ່ງກ່າວ.

ເຊິ່ງທ້າວ ໂຈຊົວ ຫວ່ອງ ຍັງມີຄະດີຕິດຕົວຢູ່ 3 ຄະດີກ່ຽວກັບການເປັນແກນນຳປະທ້ວງຮຽກຮ້ອງປະຊາທິປະໄຕຈາກ ສປ.ຈີນ ເຊິ່ງຮູ້ຈັກກັນໃນຊື່ “ຂະບວນການຄັນຮົ່ມເຫຼືອງ” ເມື່ອເດືອນກັນຍາ 2014 ແຕ່ສານປ່ອຍຕົວກ່ອນກຳນົດເມື່ອກາງເດືອນມິຖຸນາ ທີ່ຜ່ານມາ ຈາກຄວາມຜິດໃນຂໍ້ຫາລະເມີດຄຳສັ່ງສານລະຫວ່າງໄດ້ຮັບການປະກັນຕົວເມື່ອເດືອນມັງກອນ ປີທີ່ຜ່ານມາ ແລະ ຄະດີຂັດຂວາງການປະຕິບັດໜ້າທີ່ຂອງເຈົ້າໜ້າທີ່ ໃນການສະຫຼາຍການຊຸມນຸມຂອງກຸ່ມປະທ້ວງຄັນຮົ່ມເຫຼືອງ ເຊິ່ງສານຕັດສິນໃຫ້ຮັບໂທດຕິດຄຸກ 2 ເດືອນ.

ເຖິງຢ່າງໃດກໍ່ຕາມ, ສະຖານະການດັ່ງກ່າວເກີດຂຶ້ນພຽງວັນດຽວ ພາຍຫຼັງທີ່ສຳນັກງານຕຳຫຼວດຮົງກົງ ສົ່ງໜັງສືເຖິງແນວຮ່ວມສິດທິມະນຸດພົນລະເຮືອນ (Civil Human Rights Front : CHRF) ບໍ່ອະນຸຍາດຢ່າງເດັດຂາດໃຫ້ມີການຈັດກິດຈະກຳໂຮມຊຸມນຸມປະທ້ວງຕໍ່ຕ້ານລັດຖະບານໃນໄລຍະທ້າຍອາທິດນີ້ ໂດຍຍັງຄົງລະບຸເຫດຜົນເດີມຄື ເພື່ອຄວາມປອດໄພສາທາລະນະ ແລະ ຄວາມລົ້ມແຫຼວຂອງບັນດາແກນນຳທີ່ບໍ່ສາມາດຄວບຄຸມຝູງຊົນໄດ້ ແລະ ມີຄວາມເປັນຫ່ວງວ່າ ການໂຮມຊຸມນຸມປະທ້ວງໃນທ້າຍອາທິດນີ້ ອາດບານປາຍເປັນການປະທະທີ່ຮຸນແຮງກວ່າເກົ່າ ເນື່ອງຈາກຈະມີການຈັດງານຄົບຮອບ 5 ປີການໂຮມຊຸມນຸມຂອງຂະບວນການຄັນຮົ່ມສີເຫຼືອງ ແຕ່ CHRF ຢືນຢັນວ່າ ຈະຈັດກິດຈະກຳຕາມແຜນການ ແລະ ໜຶ່ງໃນເປົ້າໝາຍຍັງຄົງລວມເຖິງສະໜາມບິນສາກົນຮົງກົງ ເຖິງແມ່ນວ່າສານສັ່ງໃຫ້ເປັນພື້ນທີ່ຄຸ້ມຄອງໂດຍບໍ່ມີກຳນົດ.

ນອກຈາກນີ້, ກອງທະຫານປະຈຳການຮົງກົງຂອງກອງທັບປະຊາຊົນຈີນ ຍັງໄດ້ມີການສັບປ່ຽນກຳລັງພົນ ແລະ ເຄື່ອນຍຸດໂທປະກອນທັງທາງບົດ, ທາງເຮືອ ແລະ ທາງອາກາດ ເມື່ອວັນພະຫັດ ທີ່ຜ່ານມາ ໂດຍຢືນຢັນເປັນການດຳເນີນການຕາມປົກກະຕິ ຄືກັບທີ່ເຄີຍປະຕິບັດເປັນປະຈຳທຸກປີ ນັບຕັ້ງແຕ່ກອງທັບປະຊາຊົນຈີນຕັ້ງຖານທັບໃນຮົງກົງ ເມື່ອ 22 ປີທີ່ຜ່ານມາ ແລະ ການສັບປ່ຽນກຳລັງພົນ ແລະ ຍຸດໂທປະກອນພຄັ້ງນີ້ໄດ້ຮັບການອະນຸມັດຈາກຄະນະກຳມາທິການສູນກາງພັກຄອມມູນິດຈີນ ທີ່ທ່ານ ສີ ຈິ້ນຜິງ ເປັນປະທານ, ຂະນະທີ່ສື່ຂອງທາງການຈີນເຜີຍແຜ່ວິດີໂອກ່ອນການເຄື່ອນຍ້າຍ ທີ່ຜູ້ບັງຄັບບັນຊາກ່າວປຸກໃຈທະຫານວ່າ “ເຖິງເວລາປະເຊີນກັບບົດທົດສອບຕົວຈິງ” ແລະ ກະຊວງປ້ອງກັນປະເທດຈີນ ກໍ່ໄດ້ອອກຖະແຫຼງການວ່າ ການປະທວ້ງໃນຮົງກົງ ຕ້ອງເປັນໄປຕາມກົດໝາຍ ແລະ ພາລະກິດຂອງກອງທັບປະຊາຊົນຈີນໃນຮົງກົງ ຄືການຮັກສາຄວາມສະຫງົບ ແລະ ປົກປ້ອງຫຼັກການ 1 ປະເທດ 2 ລະບົບ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube