ສປປ.ລາວ-ເກົາຫຼີໃຕ້ ລົງນາມເອກະສານການຮ່ວມມື 4 ສະບັບ

ລາຍງານ 5 ກັນຍາ 2019 ໂດຍອ້າງອີງຕາມການລາຍງານຂອງສຳນັກຂ່າວສານປະເທດລາວໃຫ້ຮູ້ວ່າ: ໃນຕອນບ່າຍວັນພະຫັດນີ້ ທ່ານ ບຸນຍັງ ວໍລະຈິດ ປະທານປະເທດດລາວ ພ້ອມຄະນະລັດຖະບານ ໄດ້ຈັດພິທີຕ້ອນຮັບຢ່າງສົມກຽດແກ່ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ທີ່ທຳນຽບປະທານປະເທດ ນະຄອນຫຼວງວຽງຈັນ, ໃນໂອກາດເດີນທາງມາຢ້ຽມຢາມທາງລັດຖະກິດ ຢູ່ ສປປ.ລາວ ໃນລະຫວ່າງວັນທີ 5-6 ກັນຍານີ້ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງສອງປະເທດ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.

ເຊິ່ງທັງສອງຝ່າຍໄດ້ມີການພົບປະຫາລືກັນ ແລະ ປະທານປະເທດທັງສອງໄດ້ຮ່ວມກັນເປັນສັກຂີພິຍານ ໃນພິທີລົງນາມເອກະສານຮ່ວມມືລະຫວ່າງ ສປປ.ລາວ ແລະ ເກົາຫຼີໃຕ້ ຈຳນວນ 4 ສະບັບປະກອບມີ:

– ສັນຍາຂອບການຮ່ວມມືລະຫວ່າງ ສປປ.ລາວ ແລະ ເກົາຫຼີໃຕ້ ວ່າດ້ວຍທຶນຮ່ວມມື ເພື່ອການພັດທະນາເສດຖະກິດຂອງເກົາຫຼີໃຕ້ ໄລຍະປີ 2020-2023 ໂດຍການລົງນາມລະຫວ່າງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດຂອງລາວ ກັບທ່ານ ນາງ ກັງ ກຽງ ຮວາ ລັດຖະມົນຕີກະຊວງການຕ່າງປະເທດເກົາຫຼີໃຕ້.

– ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານກະສິກຳ ລົງນາມໂດຍທ່ານ ພວງປະລີສັກ ປະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້ຂອງລາວ ກັບທ່ານ ຊິນ ຊອງ-ຊຸນ ເອກອັກຄະລັດຖະທູດ ວິສາມັນຜູ້ມີອຳນາດເຕັມຂອງເກົາຫຼີໃຕ້ ປະຈຳປະເທດລາວ

– ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານການປະກອບການທຸລະກິດໃໝ່ ແລະ ນະວັດຕະກຳ ລົງນາມໂດຍທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າຂອງລາວ ກັບທ່ານ ຊິນ ຊອງ-ຊຸນ

– ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານຂໍ້ມູນຂ່າວສານ, ການສື່ສານ ແລະ ເຕັກໂນໂລຊີ ລົງນາມໂດຍທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ກັບທ່ານ ຊິນ ຊອງ-ຊຸນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube