ຜູ້ນຳເກົາຫຼີໃຕ້ຢ້ຽມຊົມສວນເຈົ້າອານຸວົງ ໂຄງການກັນເຈື່ອນ ທີ່ໄດ້ໃຫ້ທຶນຊ່ວຍເຫຼືອກວ່າ 115 ລ້ານໂດລາ

ລາຍງານ 5 ກັນຍາ 2019 ໂດຍອີງຕາມການລາຍງານຂອງສຳນັກຂ່າວສານປະເທດລາວໃຫ້ຮູ້ວ່າ: ໃນໂອກາດທີ່ເດີນທາງມາຢ້ຽມຢາມທາງລັດຖະກິດ ຢູ່ ສປປ.ລາວ, ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ພ້ອມດ້ວຍຄະນະ ໄດ້ຮ່ວມປູກຕົ້ນໄມ້ ກັບທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ.ລາວ ຢູ່ໂຄງການປ້ອງກັນຕາຝັ່ງເຈື່ອນ ແລະ ພັດທະນາແຄມຂອງ (ສວນເຈົ້າອານຸວົງ) ນະຄອນຫລວງວຽງຈັນ ເພື່ອເປັນທີ່ລະນຶກແກ່ຄົນຮຸ້ນຫຼັງໄດ້ຈາລຶກ ທັງໄດ້ສະແດງໃຫ້ເຫັນເຖິງສາຍພົວພັນແຫ່ງໄມຕີຈິດມິດຕະພາບອັນສະໜິດສະໜົມຂອງການນຳສອງປະເທດ ກໍ່ຄືປະຊາຊົນສອງຊາດລາວ-ເກົາຫຼີໃຕ້. ພ້ອມດຽວກັນນັ້ນ, ທ່ານ ມູນ ແຈ-ອິນ ພ້ອມດ້ວຍຄະນະ ກໍ່ໄດ້ທ່ຽວຊົມໂຄງການ ດັ່ງກ່າວ ຕື່ມອີກ.

ໂອກາດດັ່ງກ່າວ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນໄດ້ລາຍງານໃຫ້ຮູ້ວ່າ: ໂຄງການປ້ອງກັນຕາຝັ່ງເຈື່ອນ ແລະ ພັດທະນາແຄມຂອງ ເປັນໂຄງການທີ່ສຳຄັນ ແລະ ຖືເປັນບູລິມະສິິດການພັດທະນາຂອງ ສປປ.ລາວ ກໍ່ຄືນະຄອນຫຼວງວຽງຈັນໂດຍໄດ້ຮັບການສະໜັບສະໜູນ ຈາກລັດຖະບານເກົາຫຼີໃຕ້ ໂຄງການດັ່ງກ່າວ, ໄດ້ແບ່ງອອກເປັນ 2 ໄລຍະຄື: ໄລຍະທີ 1 ເລີ່ມແຕ່ປີ 2009-2013, ລວມມູນຄ່າທັງໝົດ 48.2 ລ້ານໂດລາສະຫະລັດ ໃນນີ້ໄດ້ກໍ່ສ້າງເສັ້ນທາງສັນຈອນຍາວ 2.68 ກິໂລແມັດ, ກໍ່ສ້າງສວນສາທາລະນະເຈົ້າອານຸວົງ; ໄລຍະທີ 2 ເລີ່ມແຕ່ເດືອນເມສາ 2019 ເປັນຕົ້ນມາ ແລະ ຈະໃຫ້ສຳເລັດໃນເດືອນມີນາ 2023 ລວມມູນຄ່າທັງໝົດ 67 ລ້ານໂດລາສະຫະລັດ ໂດຍສຸມໃສ່ຍົກລະດັບຄູປ້ອງກັນນ້ຳ, ກໍ່ສ້າງສວນສາທາລະນະ, ຍົກລະດັບເສັ້ນທາງ, ກໍ່ສ້າງເສັ້ນທາງຍ່າງຊົມທຳມະຊາດ, ສະຖານທີອອກກຳລັງກາຍ ແລະ ອື່ນໆ.

ໂຄງການດັ່ງກ່າວ, ເປັນໂຄງການຮັກສາສຶິ່ງແວດລ້ອມ ແລະ ເປັນຕົວແບບທີ່ດີ, ນອກຈາກຈະເປັນການປ້ອງກັນບໍ່ໃຫ້ນ້ຳຂອງໄຫລເຊາະເຈື່ອນຕະຝັ່ງແຄມນ້ຳແລ້ວ ຍັງເປັນການປ້ອງກັນນ້ຳຂອງບໍ່ໃຫ້ໄຫລເຂົ້າຕົວເມືອງລຽບຕາມແມ່ນ້ຳຂອງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube