ມີຜູ້ເສຍຊີວິດແລ້ວ 14 ຄົນ, ໄດ້ຮັບຜົນກະທົບກວ່າ 220,000 ຄົນ ຈາກໄພນ້ຳຖ້ວມ 6 ແຂວງ

ລາຍງານ 8 ກັນຍາ 2019 ອີງຕາມການລາຍງານຂອງກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໃນຕອນເຊົ້້າມື້ນີ້ ທີ່ນະຄອນຫຼວງວຽງຈັນ ໃຫ້ຮູ້ວ່າຈາກເຫດໄພພິບັດນ້ຳຖ້ວມ 6 ແຂວງພາກກາງ ແລະ ພາກໃຕ້ເຮັດໃຫ້ມີຜູ້ເສຍຊີວິດເພີ່ມຂຶ້ນເປັນ 14 ຄົນແລ້ວ ແຂວງສະຫວັນນະເຂດ 2 ຄົນ, ສາລະວັນ 5 ຄົນ, ຈຳປາສັກ 2 ຄົນ ແລະ ອັດຕະປື 4 ຄົນ.

ທ່ານ ວິໄລພົງ ສີສົມຫວັງ ວ່າການແທນຫົວໜ້າກົມສັງຄົມສົງເຄາະ, ກະຊວງແຮງງານ ແລະ ສະຫວັດດີການສັງຄົມ ທັງເປັນກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດໄດ້ກ່າວວ່າ: ໃນທ້າຍເດືອນສິງຫາ ຫາ ຕົ້ນເດືອນ ກັນຍາ 2019 ສປປ.ລາວ ໄດ້ຮັບຜົນກະທົບຈາກພາຍຸໜຸນເຂດຮ້ອນຫຼາຍຫ່າເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມ ຢູ່ 6 ແຂວງຄື: ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື. ໄພພິບັດທຳມະຊາດນີ້ໄດ້ເຮັດປະຊາຊົນທີ່ອາໃສຢູ່ບັນດາແຂວງເຫຼົ່ານີ້ມີ ການສູນເສຍຊີວິດເຖິງ 14 ຄົນ, ປະຊາຊົນໄດ້ຮັບຜົນກະທົບ 224,604 ຄົນ ຈາກ 122,892 ຄອບຄົວ.

ທ່ານ ວິໄລພົງໄດ້ອະທີ່ບາຍຕື່ມອີກວ່າ: ປັດຈຸບັນໄດ້ມີການຍົກຍ້າຍ 7,559 ກວ່າຄອບຄົວ (64,022 ກວ່າຄົນ), ບ້ານເຮືອນຂອງປະຊາຊົນຈໍານວນຫຼາຍຖືກນໍ້າຖ້ວມ, ພື້ນທີ່ການຜະລິດກະສິກໍາ ເຊັ່ນ: ເນື້ອທີ່ນາ 139,829 ກວ່າ ເຮັກຕາ, ສວນ 251 ເຮັກຕາ, ໜອງປາ 1,922 ໜອງ, ສັດລ້ຽງຫຼາຍກວ່າ 300 ໂຕຖືກຍ້າຍໄປຢູ່ບ່ອນທີ່ປອດໄພ, ຊົນລະປະທານ 33 ແຫ່ງ, ອ່າງເກັບນໍ້າ 43 ແຫ່ງ, ຄອງເໝືອງ 64,025 ແມັດ, ເສັ້ນທາງຄົມມະນາຄົມຖືກຕັດຂາດ ຍ້ອນນໍ້າຖ້ວມ ໃນນີ້ມີຫຼາຍກວ່າ 252 ກມ, ຂົວ 12 ແຫ່ງ ຖືກນໍ້າຖ້ວມ, ໂຮງຮຽນ 215 ແຫ່ງ, ໂຮງໝໍ ແລະ ສຸກສາລາ 10 ແຫ່ງ.

ຄວາມຕ້ອງການຮີບດ່ວນລວມມີ ເຄື່ອງອຸປະໂພກ-ບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້, ອື່ນໆ.

ປັດຈຸບັນທາງພາກລັດ, ທະຫານ, ຕຳຫຼວດ ແລະ ເຈົ້າໜ້າທີ່ກູ້ໄພ ພ້ອມ ດ້ວຍອາສາສະໝັກຕ່າງໆໄດ້ຊ່ວຍເຫຼືອປະຊາຊົນທີ່ຖືກຜົນກະທົບອອກມາໄດ້ຈຳນວນໜຶ່ງ ແລະ ນຳໄປພັກຢູ່ສະຖານທີ່ພັກຊົ່ວຄາວແລ້ວ ແລະກໍ່ສາມາດນຳເອົາເຄື່ອງຊ່ວຍເຫຼືອບັນເທົາທຸກເບື້ອງຕົ້ນເຂົ້າໄປໃຫ້ຜູ້ທີ່ໄດ້ຮັບຜົນກະທົບຢູ່ໃນເຂດທີ່ພາຫະນະບໍ່ສາມາດເຂົ້າໄປເຖິງໄດ້ຫຼາຍບ່ອນ.

ທ່ານ ວິໄລພົງ ໄດ້ກ່າວຕື່ມວ່າ: ຈະສືບຕໍ່ຕິດຕາມສະພາບຜົນກະທົບ ແລະ ເຮັດການປະເມີນຄວາມເສຍຫາຍ ແລະ ຄວາມຕ້ອງການເພື່ອວາງແຜນຟື້ນຟູຫຼັງໄພພິບັດ ທັງໄລຍະສັ້ນ ແລະ ຍາວ, ສືບຕໍ່ລະດົມວັດຖຸແລະປັດໄຈຕ່າງໆ ຈາກສັງຄົມ ເພື່ອໃຫ້ການຊ່ວຍເຫຼືອສຸກເສີນ ຕໍ່ຜູ້ປະສົບໄພພິບັດ ຢູ່ບັນດາແຂວງທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນຄັ້ງນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube