ທ່ານ ທອງລຸນ ສີສຸລິດ ນາຍົກລັດຖະມົນຕີ ຈະເດີນທາງຢ້ຽມຢາມກຳປູເຈຍ 12-13 ກັນຍານີ້

ລາຍງານ 10 ກັນຍາ 2019: ກະຊວງການຕ່າງປະເທດ ໄດ້ອອກແຈ້ງການເມື່ອວັນຈັນ ທີ່ຜ່ານມາ ວ່າໂດຍຕອບສະໜອງຕາມຊຳເຊີນຂອງ ສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະຜູ້ແທນ ສປປ.ລາວ ຈະເດີນທາງໄປຢ້ຽມກຳປູເຈຍຢ່າງເປັນທາງການ ໃນລະຫວ່າງວັນທີ 12-13 ກັນຍາ 2019 ເພື່ອຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອທີ່ມີມາແຕ່ດົນນານ ແລະ ການຮ່ວມມືລະຫວ່າງລາວ-ກຳປູເຈຍ.

ໂດຍເມື່ອວັນທີ 6 ກັນຍາ ທີ່ຜ່ານມາ ທ່ານ ປຼາກ ໂຊຄົນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນຂອງກຳປູເຈຍ ກໍ່ໄດ້ເດີນທາງມາຢ້ຽມຢາມ ສປປ.ລາວ ເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການກະກຽມໃຫ້ແກ່ການຢ້ຽມຢາມກຳປູເຈຍຢ່າງເປັນທາງການຄັ້ງນີ້ຂອງທ່ານ ທອງລຸນ ສີສຸລິດ ຮ່ວມກັບທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດຂອງລາວ.

ນອກຈາກນີ້, ໃນການມາລາວຂອງທ່ານ ປຼາກ ໂຊຄົນ ທັງສອງຝ່າຍຍັງໄດ້ສືບຕໍ່ປະຕິບັດຕາມການຕົກລົງຂອງສອງນາຍົກລັດຖະມົນຕີລາວ-ກຳປູເຈຍ ກ່ຽວຮ່າງຂໍ້ກຳນົດຮ່ວມ (TOR) ວ່າດ້ວຍການສະເໜີຂໍໃຫ້ລັດຖະບານຝຣັ່ງ ສົ່ງຊ່ຽວຊານມາຊ່ວຍຖ່າຍທອດແຜນທີ່ ແລະ ສະໜອງເອກະສານທາງການ ແລະ ແຜນທີ່ທີ່ກ່ຽວຂ້ອງໃຫ້ລາວ ແລະ ກຳປູເຈຍ ເພື່ອເປັນບ່ອນອີງໃຫ້ແກ່ການແກ້ໄຂບັນຫາຊາຍແດນທີ່ຄົງຄ້າງ, ເຊິ່ງທັງສອງຝ່າຍຍັງບໍ່ທັນໄດ້ສຳຫຼວດ ແລະ ປັກຫຼັກໝາຍຊາຍແດນຮ່ວມກັນນັ້ນໃຫ້ສຳເລັດໂດຍໄວ ເພື່ອສ້າງຊາຍແດນລະຫວ່າງສອງປະເທດໃຫ້ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube