ຜູ້ນຳຮົງກົງ ກ່າວວ່າຜູ້ປະທ້ວງດຶງຕ່າງປະເທດເຂົ້າມາແຊກແຊງວຽກງານພາຍໃນ ຖືເປັນສິ່ງທີ່ໜ້າຜິດຫວັງ

ລາຍງານ 10 ກັນຍາ 2019: ທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານຮົງກົງຖະແຫຼງໃນມື້ນີ້ ວ່າການໃຊ້ຄວາມຮຸນແຮງບໍ່ສາມາດຜ່ອນຄາຍບັນຫາສັງຄົມ, ການເມືອງ ແລະ ເສດຖະກິດໃນຮົງກົງໄດ້ ພ້ອມທັງຢ້ຳວ່າ ລັດຖະບານມີຄວາມຈິງໃຈ ໃນການເຈລະຈາກັບຝ່າຍທີ່ເຫັນຕ່າງ.

ຂະນະດຽວກັນ, ທ່ານ ນາງ ແຄຣີ ແລມ ແລະ ຄະນະຍັງໄດ້ລົງພື້ນທີ່ສະຖານີລົດໄຟຫຼາຍແຫ່ງ ເມື່ອວັນຈັນ ທີ່ຜ່ານມາ ແລະ ໄດ້ຮັບລາຍງານຈາກຜູ້ປະກອບການວ່າ 40% ຂອງສະຖານີ ເຊິ່ງປັດຈຸບັນມີທັງໝົດ 91 ແຫ່ງ ແລະ ໃຫ້ບໍລິການໃນ 11 ເສັ້ນທາງ ໄດ້ຮັບຄວາມເສຍຫາຍຢ່າງໜັກ ແລະ ຫຼາຍສະຖານີອາດບໍ່ສາມາດກັບມາໃຫ້ບໍລິການໄດ້ອີກຕໍ່ໄປ ຫາກເກີດການປະທ້ວງຂຶ້ນອີກໃນທ້າຍອາທິດນີ້ ແລະ ມີການທຳລາຍຊັບສິນພາຍໃນສະຖານີ.

ນອກຈາກນີ້, ທ່ານ ນາງ ແຄຣີ ແລມ ຍັງກ່າວເຖິງຜູ້ທີ່ປະທ້ວງຕໍ່ຕ້ານລັດຖະບານທີ່ໄປຍື່ນໜັງສືຂໍຄວາມຊ່ວຍເຫຼືອ ທີ່ສະຖານກົງສຸນໃຫຍ່ສະຫະລັດ ອາເມຣິກາ ເມື່ອອາທິດ ທີ່ຜ່ານມາ ວ່າເປັນການກະທຳທີ່ໜ້າຜິດຫວັງຢ່າງຍິ່ງ ເນື່ອງຈາກການຮຽກຮ້ອງໃຫ້ສະພາສະຫະລັດ ອາເມຣິກາ ເລັ່ງອອກກົດໝາຍກ່ຽວກັບສິດທິມະນຸດ ແລະ ປະຊາທິປະໄຕໃນຮົງກົງ ເປັນການແຊກແຊງວຽກງານພາຍໃນຂອງຮົງກົງຢ່າງຊັດເຈນ ເຊິ່ງເປັນເຂດບໍລິຫານພິເສດ ພາຍໃຕ້ກົດໝາຍພື້ນຖານທີ່ໄດ້ອຳນາດພິເສດຈາກ ສປ.ຈີນ ແລະ ການທີ່ກະຊວງການຕ່າງປະເທດ ສ.ອາເມຣິກາ ເຄີຍເຕືອນເລື່ອງການຍົກເລີກສິດທິພິເສດທາງການຄ້າ ລະຫວ່າງ ສ.ອາເມຣິກາ ກັບ ຮົງກົງ ໂດຍອ້າງກົດໝາຍທີ່ສະພາອອກເມື່ອປີ 1992 ທ່ານ ນາງ ແຄຣີ ແລມ ກ່າວວ່າເປັນສິ່ງທີ່ບໍ່ຄວນເອົາມາເຊື່ອມໂຍງກັນ.

ໃນອີກດ້ານໜຶ່ງ ສື່ກະບອກສຽງຂອງລັດຖະບານຈີນເຊັ່ນ: ຊິນຫົວ, Global Times ແລະ ໜັງສືພິມປະຊາຊົນຈີນ ພ້ອມໃຈກັນອອກລາຍງານປະນາມການຈັດກິດຈະກຳຂອງກຸ່ມຜູ້ປະທ້ວງ ທີ່ສະຖານກົງສຸນໃຫຍ່ ສ.ອາເມຣິກາ ແລະ ເຕືອນວ່າຝ່າຍຕໍ່ຕ້ານ ລວມເຖິງບັນດາຜູ້ໃຫ້ການສະໜັບສະໜູນ ຄວນຢຸດຕິການທົດສອບຄວາມອົດທົນຂອງ ສປ.ຈີນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube