ຊາອູດິດລະບຸຜົນສືບສວນເບື້ອງຕົ້ນວ່າ ອີຣານເປັນຜູ້ກໍ່ເຫດໂຈມຕີນິຄົມນ້ຳມັນຂອງຕົນ

ລາຍງານ 17 ກັນຍາ 2019: ກະຊວງການຕ່າງປະເທດອາຣັບບີ ຊາອູດິດອອກຖະແຫຼງການ ເມື່ອວັນຈັນ ທີ່ຜ່ານມາ ວ່າຜົນການສືບສວນເບື້ອງຕົ້ນ ກ່ຽວກັບເຫດຝູງໂດຣນໂຈມຕີໂຮງກັ່ນນ້ຳມັນອັບກາອິກ ແລະ ຄູຣານິສ ເຊິ່ງເປັນໜຶ່ງໃນນິຍົມການຜະລິດນ້ຳມັນດິບຂະໜາດໃຫຍ່ຂອງບໍລິສັດຊາອູດິອາຣາມໂກ ລັດວິສາຫະກິດດ້ານພະລັງງານລາຍໃຫຍ່ທີ່ສຸດຂອງປະເທດ ທີ່ຕັ້ງຢູ່ທາງພາກຕາເວັນອອກຂອງອາຣັບບີ ຊາອູດິດ ເມື່ອວັນເສົາ ທີ່ຜ່ານມາ ສົ່ງຜົນໃຫ້ຊາອູດິອາຣາມໂກຕ້ອງລະງັບການຜະລິດນ້ຳມັນດິບລົງເຄິ່ງໜຶ່ງຢ່າງບໍ່ມີກຳນົດ ແລະ ສົ່ງຜົນຕໍ່ອຸປະສົງໂລກປະມານ 5% ນັ້ນ “ເປັນການກະທຳຂອງອີຣານ” ແລະ ຕອນນີ້ໜ່ວຍງານທີ່ກ່ຽວຂ້ອງກຳລັງຄົ້ນຫາຕຳແໜ່ງການປ່ອຍໂດຣນທີ່ຊັດເຈນ.

ທ່າທີດັ່ງກ່າວຂອງອາຣັບບີ ຊາອູດິດ ສອດຄ່ອງກັບທ່າທີຂອງສະຫະລັດ ອາເມຣິກາ ທີ່ກ່າວຫາວ່າເປັນອີຣານເຊັ່ນກັນ ໂດຍອ້າງອີງພາບຖ່າຍຈາກດາວທຽມສອດແນມ ວ່າຝູງໂດຣນບໍ່ຕ່ຳກວ່າ 10 ລຳ ທີ່ສ້າງຄວາມເສຍຫາຍໃຫ້ກັບໂຮງກັ່ນນ້ຳມັນທັງສອງແຫ່ງລວມ 19 ຈຸດ ແລະ ທິດທາງການບິນຂອງໂດຣນ ຮ່ວມເຖິງລັດສະໝີການຍິງອາວຸດທີ່ໃຊ້ໂຈມຕີ ມາຈາກທາງຕາເວັນຕົກສຽງໃຕ້ ເຊິ່ງເປັນທີ່ຕັ້ງຂອງປະເທດອີຣານ ບໍ່ແມ່ນເຢເມນທີ່ຢູ່ທາງໃຕ້ຂອງອາຣັບບີ ຊາອູດິດ ແລະ ເປັນເຂດທີ່ໝັ້ນຂອງກອງກຳລັງຮູຕີ ທີ່ອອກມາຍອມຮັບວ່າເປັນທີ່ລົງມືກໍ່ເຫດ ເພື່ອຕອບໂຕ້ປະຕິບັດການທາງທະຫານຂອງອາຣັບບີ ຊາອູດິດ ໃນເຢເມນ.

ຂະນະທີ່ສຳນັກຂ່າວແຫ່ງຊາດອາຣັບບີ ຊາອູດິດ (SPA) ເຜີຍແຜ່ຄຳກ່າວຂອງເຈົ້າຊາຍໂມຮຳເໝັດ ບິນ ຊັດມານ ມະກຸດລາຊະກຸມານແຫ່ງອາຣັບບີ ຊາອູດິດ ເຈົ້າຜູ້ປົກຄອງປະເທດໃນທາງພຶດຕິໄນ ວ່າອີຣານບໍ່ພຽງແຕ່ເປັນໄພຮຸກຮານຮ້າຍແຮງຕໍ່ອາຣັບບີ ຊາອູດິດເທົ່ານັ້ນ ແຕ່ຍັງເປັນອັນຕະລາຍຕໍ່ທັງໂລກ.

ໃນດ້ານລັດຖະບານອີຣານ ຢືນຢັນປະຕິເສດຕໍ່ຂໍ້ກ່າວຫາດັ່ງກ່າວ ພ້ອມຕີລາຄາວ່າ ສ.ອາເມຣິກາ ແລະ ອາຣັບບີ ຊາອູດິດຕ້ອງການຫາເລື່ອງ ແລະ ໄດ້ຕອບໂຕ້ວ່າ ຖານທັບ ສ.ອາເມຣິກາ ທຸກແຫ່ງໃນຕາເວັນອອກກາງຢູ່ໃນລັດສະໝີການໂຈມຕີຂອງກອງທັບປະຕິວັດອີຣານ, ຫຼັງຈາກນັ້ນທ່ານ ໂດໂນ ທຣຳ ກໍ່ກ່າວວ່າ ສ.ອາເມຣິກາ ໄດ້ລັອກເປົ້າອີຣານໄວ້ແລ້ວເຊັ່ນກັນ ແຕ່ຕໍ່ມາໄດ້ຫຼຸດລະດັບຄວາມຮຸນແຮງຂອງຄຳເວົ້າລົງ ໂດຍກ່າວວ່າ ບໍ່ຕ້ອງການເຮັດສົງຄາມກັບອີຣານ.