ທີ່ປຶກສາຄວາມໝັ້ນຄົງຄົນໃໝ່ຂອງ ປ.ທຣຳ ເປັນນັກເຈລະຈາຊ່ວຍເຫຼືອຕົວປະກັນ

ລາຍງານ 20​ ກັນຍາ 2019, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວເມື່ອວັນພຸດ 18 ກັນຍາ ທີ່ຜ່ານມາ ວ່າໄດ້ແຕ່ງຕັ້ນທ່ານ ໂຣເບິດ ໂອບຼຽນ ຜູ້ແທນພິເສດວຽກງານດ້ານຕົວປະກັນຂອງລັດຖະບານ ສ.ອາເມຣິກາ ໃຫ້ດຳລົງຕຳແໜ່ງທີ່ປຶກສາດ້ານຄວາມໝັ້ນຄົງແຫ່ງຊາດຄົນໃໝ່ ຕໍ່ຈາກທ່ານ ຈອນ ໂບຕັ້ນ ທີ່ຖືກໄລ່ອອກເມື່ອອາທິດທີ່ຜ່ານມາ ແລະ ທ່ານ ໂຣເບິດ ໂອບຼຽນຖືເປັນທີ່ປຶກສາດ້ານຄວາມໝັ້ນຄົງແຫ່ງຊາດ ສ.ອາເມຮິກາ ຄົນທີ 4 ນັບຕັ້ງແຕ່ລັດຖະບານພາຍໃຕ້ການນຳຂອງທ່ານ ໂດໂນ ທຣຳ ເຂົ້າມາບໍລິຫານປະເທດ ເມື່ອທ້າຍເດືອນມັງກອນ 2017.

ເຊິ່ງທ່ານ ໂດໂນ ທຣຳ ກ່າວເຖິງ ທ່ານ ໂຣເບິດ ໂອບຼຽນ ວ່າເຄີຍປະຕິບັດງານຮ່ວມກັນມາດົນ ແລະ ເຊື່ອໝັ້ນວ່າອີກຝ່າຍຈະປະຕິບັດໜ້າທີ່ໃນຕຳແໜ່ງສຳຄັນໃໝ່ນີ້ໄດ້ຢ່າງດີເລີດ, ຂະນະທີ່ພາຍຫຼັງປົດທ່ານ ຈອນ ໂບຕັ້ນ ຈາກຕຳແໜ່ງບໍ່ພໍເທົ່າໃດວັນ, ຜູ້ນຳ ສ.ອາເມຣິກາ ຍອມເປີດເຜີຍເຫດຜົນວ່າທ່ານ ຈອນ ໂບຕັ້ນ ເປັນຄົນທີ່ “ຍອມຫັກ ແຕ່ບໍ່ຍອມງໍ” ເກີນໄປ ຈົນສົ່ງຜົນໃຫ້ຮ່ວມງານກັບເຈົ້າໜ້າທີ່ທີ່ກ່ຽວຂ້ອງຫຼາຍຄົນບໍ່ໄດ້ດີ ແລະ ເຮັດໃຫ້ນະໂຍບາຍບໍ່ເປັນໄປຕາມແນວທາງທີ່ກຳນົດໄວ້ຮ່ວມກັນ ເຊິ່ງໂດຍສ່ວນຕົວຖືວ່າເປັນສິ່ງທີ່ສຳຄັນຫຼາຍ.

ຂະນະທີ່ທ່ານ ໂຣເບິດ ໂອບຼຽນ ທີ່ເຮັດວຽກໃນທຳນຽບຂາວມາຕັ້ງແຕ່ສະໄໝລັດຖະບານພາຍໃຕ້ການນຳຂອງທ່ານ ຈອສ ດັບເບິນຢູ ບຸສ ແລະ ເຄີຍເປັນໜຶ່ງໃນຄະນະສະໄໝທີ່ທ່ານ ຈອນ ໂບຕັ້ນ ດຳລົງຕຳແໜ່ງເອກອັກຄະລັດຖະທູດ ສ.ອາເມຣິກາ ປະຈຳສະປະຊາຊາດ, ໂດຍທ່ານ ໂຣເບິດ ໂອບຼຽນ ກ່າວພຽງວ່າເປັນກຽດຢ່າງຍິ່ງ ທີ່ໄດ້ຮັບຕຳແໜ່ງດັ່ງກ່າວ, ເຊິ່ງການປະຕິບັດໜ້າທີ່ຂອງທີ່ປຶກສາຄົນໃໝ່ນີ້ ແມ່ນຢູ່ໃນຊ່ວງທີ່ສາຍພົວພັນລະຫວ່າງ ສ.ອາເມຣິກາ ກັບຫຼາຍປະເທດບໍ່ຄ່ອຍດີປານໃດ ແລະ ເຖິງຂັ້ນເຄັ່ງຕຶງໃນຫຼາຍກໍລະນີ ໂດຍສະເພາະກັບກຸ່ມປະເທດໃນຕາເວັນອອກກາງ ໄປຈົນເຖິງອາຟະການິດສະຖານ.

ສຳລັບຜົນງານດ້ານການເຈລະຈາຕົວປະກັນຂອງທ່ານ ໂຣເບິດ ໂອບຼຽນ ລວມເຖິງການຊ່ວຍເຫຼືອທ່ານ ແດນນີ ເບິສ ເຊິ່ງໄດ້ຮັບອິດສະຫຼະພາບເມື່ອເດືອນກຸມພາ ທີ່ຜ່ານມາ ພາຍຫຼັງຫາຍຕົວໄປ 18 ດືອນໃນເຢເມນ ແລະ ທ່ານ ໂຣເບິດ ໂອບຼຽນເປັນເຈົ້າໜ້າທີ່ຂອງລັດຖະບານ ສ.ອາເມຣິກາ ຄົນທຳອິດ ແລະ ຄົນດຽວໃນຕອນນີ້ທີ່ຢືນຢັນວ່າ ທ່ານ ອອສຕິນ ໄທ ນັກຂ່າວອິດສະຫຼະຊາວອາເມຣິກາ ທີ່ຖືກລັກພາຕົວໃນຊີຣີ ເມື່ອປີ 2012 ຍັງມີຊີວິດຢູ່ ແລະ ກຳລັງດຳເນີນການຊ່ວຍເຫຼືອ.