ເກຣຕ້າ ທັນເບີກ ຕຳນິຜູ້ນຳໂລກ ຫ່ວງແຕ່ເລື່ອງເງິນໆຄຳໆ ບໍ່ໃສ່ໃຈແກ້ໄຂບັນຫາໂລກຮ້ອນ

ລາຍງານ 24 ກັນຍາ 2019, ນາງ ເກຣຕ້າ ທັນເບີກ ນັກເຄື່ອນໄຫວດ້ານສິ່ງແວດລ້ອມຊາວຊູແອດ (ສະວີເດນ) ກ່າວຕໍ່ກອງປະຊຸມສະຫະປະຊາຊາດ ວ່າດ້ວຍການປ່ຽນແປງສະພາບດິນຟ້າອາກາດໂລກ ເມື່ອວັນທີ 23 ກັນຍາ ທີ່ຜ່ານມາ ຢູ່ນະຄອນນິວຢອກ, ສະຫະລັດ ອາເມຣິກາ ວ່າ:

Climate Action Summit 2019: Programme

“ມັນເປັນສິ່ງທີ່ ຂ້ອຍບໍ່ຄວນມາຢູ່ເທິງເວທີແຫ່ງນີ້ ຂ້ອຍຄວນກັບໄປຮຽນໜັງສື ຢູ່ອີກຟາກຝັ່ງຂອງມະຫາສະໝຸດ ແຕ່ພວກທ່ານກໍ່ເດີນທາງມາຫາຄວາມຫວັງຈາກພວກເຮົາເຍົາວະຊົນ, ທ່ານກ້າໄດ້ແນວໃດ ທີ່ລັກໂລບເອົາຄວາມຝັນ ແລະ ໄວເດັກຂອງພວກເຮົາດ້ວຍຄຳເວົ້າອັນຈອມປອມ, ຂ້ອຍກໍ່ຍັງຖືວ່າຕົນເອງໂຊກດີຢູ່ ແຕ່ຜູ້ຄົນທີ່ຢູ່ຢ່າງທໍລະມານ, ຄົນບາດເຈັບລົ້ມຕາຍ ແລະ ລະບົບນິເວດກຳລັງລົ້ມສະຫຼາຍ ພວກເຮົາກຳລັງຈະສູນພັນ ແຕ່ພວກທ່ານຜັດພາກັນເວົ້າແຕ່ເລື່ອງເງິນໆ ຄຳໆ, ພວກທ່ານກ້າໄດ້ແນວໃດ” ນາງກ່າວທັງນ້ຳຕາ ແລະ ກ່ອນທີ່ຈະໄດ້ຮັບສຽງຕົບມືຈາກຜູ້ຮັບຟັງ.

ນາງ ເກຣຕ້າ ທັນເບີກ ອາຍຸ 16 ປີ ໄດ້ກາຍເປັນສັນຍາລັກຂອງການເຄື່ອນໄຫວເພື່ອສິ່ງແວດລ້ອມ ນັບຕັ້ງແຕ່ໄດ້ອອກມານັ່ງປະທ້ວງຢູ່ໜ້າອາຄານສະພາ ໃນປະເທດຊູແອດ ເມື່ອເດືອນສິງຫາ 2018 ຮຽກຮ້ອງໃຫ້ນັກການເມືອງຫາທາງຢຸດຢັ້ງການປ່ອຍກາກບອນສູ່ຊັ້ນບັນຍາກາດ ແລະ ປ້ອງກັນໂລກຮ້ອນ.

ເມື່ອເດືອນທີ່ຜ່ານມາ ນາງໄດ້ເດີນທາງດ້ວຍເຮືອຢອສທີ່ບໍ່ມີການປ່ອຍກາກບອນ ຂ້າມມະຫາສະໝຸດອາກລັງຕິກ ໄປຍັງນະຄອນນິວຢອກ ໂດຍໃຊ້ເວລາ 15 ວັນ ແລະ ຍັງບໍ່ຮູ້ວ່າຈະເດີນທາງກັບດ້ວຍເສັ້ນທາງ ຫຼື ພາຫະນະໃດ ທັງນີ້ນາງໃຫ້ເຫດຜົນວ່າບໍ່ຢາກໂດຍສານມາກັບຍົນທີ່ປ່ອຍກາກບອນສູ່ຊັ້ນບັນຍາກາດ.