ປ.ທຣຳ ກ່າວວ່າຈີນ ບໍ່ເຄົາລົບກົດລະບຽບການຄ້າໂລກ ພ້ອມກ່າວວ່າ ອີຣານກະຫາຍເລືອດ

ລາຍງານ 25 ກັນຍາ 2019, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ສະໄໝສາມັນ ຄັ້ງທີ 74 ທີ່ນະຄອນນິວຢອກ ເມື່ອວັນອັງຄານ 24 ກັນຍາ ທີ່ຜ່ານມາ ໂດຍມີເນື້ອໃນສຳຄັນຂອງການຖະແຫຼງໃນປີນີ້ເຊິ່ງເປັນຄັ້ງທີ 3 ແລ້ວທີ່ທ່ານ ໂດໂນ ທຣຳ ຂຶ້ນເວທີ UNGA ຄືການໂຈມຕີຈີນ ວ່າບໍ່ຮັກສາສັນຍາ ຕາມແນວທາງການເຈລະຈາການຄ້າ ເຊິ່ງການປຶກສາຫາລືຮອບຫຼ້າສຸດເກີດຂຶ້ນພຽງ 4 ວັນກ່ອນຈະເປີດກອງປະຊຸມ UNGA ແລະ ກ່າວວ່າລັດຖະບານຈີນບໍ່ປະຕິບັດຕາມກົດລະບຽບຂອງອົງການການຄ້າໂລກ (WTO) ຕະຫຼອດໄລຍະ 18 ປີທີ່ເປັນສະມາຊິກ ຫຼື ນັບຕັ້ງແຕ່ປີ 2001 ແລະ ພຶດຕິກຳດ້ານການຄ້າຂອງຈີນກໍ່ໃຫ້ເກີດຄວາມເສຍຫາຍໃນດ້ານລົບຢ່າງມະຫາສານຕໍ່ເສດຖະກິດໂລກ ທີ່ລວມເຖິງເສດຖະກິດຂອງ ສ.ອາເມຣິກາ ພ້ອມທັງວິຈານ WTO ວ່າເອົາໃຈຈີນຫຼາຍເກີນໄປ.

ຂະນະດຽວກັນ, ທ່ານ ໂດໂນ ທຣຳ ຍັງກ່າວໂຈມຕີຈີນກ່ຽວກັບສະຖານະການດ້ານສິດທິມະນຸດໃນເຂດປົກຄອງຕົນເອງຊິນຈຽງອຸຍກູ ວ່າຍັງມີການກົດຂີ່ເສລີພາບຂອງກຸ່ມຊົນຊາດຊົນເຜົ່າໃນພື້ນທີ່ ໂດຍສະເພາະຊາວອຸຍກູ ຈາກສິດທິໃນການດຳລົງຊີວິດ ແລະ ການນັບຖືສາສະໜາ, ນອກຈາກນີ້ ຜູ້ນຳ ສ.ອາເມຣິກາ ຍັງກ່າວເຖິງສະຖານະການໃນຮົງກົງ ຮຽກຮ້ອງໃຫ້ລັດຖະບານຈີນ ຢຶດໝັ້ນຕາມຂໍ້ຕົກລົງກັບອັງກິດ ວ່າດ້ວຍການມອບເສລີພາບ ແລະ ປະຊາທິປະໄຕໃຫ້ກັບຊາວຮົງກົງ ແລະ ເວົ້າໃນລັກສະນະກົດດັນວ່າ ບໍ່ວ່າ ສປ.ຈີນ ຈະແກ້ໄຂສະຖານະການໃນຮົງກົງດ້ວຍວິທີໃດ ແລະ ການຊຸມນຸມປະທ້ວງທີ່ແກ່ຍາວມາກວ່າ 4 ເດືອນຈະຢຸດຕິລົງແບບໃດ ບັນຫານີ້ຈະເປັນປະຫວັດສາດ ທີ່ກຳນົດອະນາຄົດ ແລະ ພາບລັກຂອງຈີນໃນເວທີໂລກ.

ນອກຈາກນີ້, ທ່ານ ໂດໂນ ທຣຳ ຍັງກ່າວເຖິງສະຖານະການໃນຕາເວັນອອກກາງ ວ່າລັດຖະບານອີຣານ ກ່ຽວຂ້ອງໂດຍກົງກັບເຫດໂຈມຕີໂຮງກັ່ນນ້ຳມັນຂະໜາດໃຫຍ່ 2 ແຫ່ງຂອງອາຣັບບີ ຊາອູດິດ ເມື່ອວັນທີ 14 ກັນຍາ ທີ່ຜ່ານມາ ແລະ ປະນາມອີຣານວ່າເປັນປະເທດທີ່ກະຫາຍເລືອດ ພ້ອມທັງຮຽກຮ້ອງໃຫ້ປະຊາຄົມໂລກຮ່ວມກັບ ສ.ອາເມຣິກາ ໃນການໃຊ້ມາດຕະການຂວໍ້າບາດອີຣານ ແຕ່ກໍ່ຍັງກ່າວວ່າພ້ອມເຈລະຈາກັບອີກຝ່າຍ ກ່ອນປິດທ້າຍໃນຄຳເວົ້າກ່ຽວກັບອີຣານວ່າ ອາເມຣິກາຮັບຮູ້ດີວ່າ ທຸກປະເທດສາມາດເປັນຜູ້ຈູດຊະນວນສົງຄາມໄດ້ ແຕ່ຄົນສະຫຼາດທີ່ສຸດເທົ່ານັ້ນຈຶ່ງຈະຮູ້ວ່າຕ້ອງເລືອກເສັ້ນທາງສັນຕິພາບ.

HTML tutorial