ຜູ້ນຳເກົາຫຼີໃຕ້ສະເໜີຕໍ່ UN ປ່ຽນເຂດປອດທະຫານແຫຼມເກົາຫຼີ ເປັນເຂດສັນຕິພາບ

ລາຍງານ 25 ກັນຍາ 2019, ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ ເມື່ອວັນອັງຄານ 24 ກັນຍາ ທີ່ຜ່ານມາ ມີເນື້ອໃນສຳຄັນກ່ຽວກັບສະຖານະການຢູ່ແຫຼມເກົາຫຼີ ໂດຍທ່ານ ມູນ ແຈ-ອິນ ສະເໜີແນວຄິດສ້າງຕັ້ງ “ເຂດສັນຕິພາບລະຫວ່າງປະເທດ” ເພື່ອຫຼຸດຜ່ອນຄວາມຮູ້ສຶກແບ່ງແຍກລະຫວ່າງປະຊາຊົນສອງເກົາຫຼີ ທີ່ອາໄສຢູ່ໃນແຫຼມດຽວກັນ ເຊິ່ງເຂດສັນຕິພາບຕາມຄວາມຄິດຂອງທ່ານ ມູນ ແຈ-ອິນ ຄື ການປ່ຽນແປງຈາກ “ເຂດປອດທະຫານ” ທີ່ມີຄວາມຍາວ 250 ກິໂລແມັດ ແລະ ກວ້າງເບື້ອງລະ 4 ກິໂລແມັດ ທີ່ແບ່ງແຫຼມເກົາຫຼີອອກເປັນ 2 ສ່ວນຕະຫຼອດໄລຍະເວລາກວ່າ 6 ທົດສະວັດທີ່ຜ່ານມາ.

ເຊິ່ງຜູ້ນຳເກົາຫຼີໃຕ້ ມີຄວາມເຊື່ອໝັ້ນວ່າ ເຂດສັນຕິພາບລະຫວ່າງປະເທດ ອາດຈະສ້າງແຮງຈູງໃຈທີ່ດີໃຫ້ກັບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໃນການດຳເນີນການປົດອາວຸດນິວເຄຼຍ ທີ່ຖືວ່າເກືອບບໍ່ມີຫຍັງຄືບໜ້າເປັນຮູບປະທຳ ນັບຕັ້ງແຕ່ການພົບປະຫາລືຄັ້ງທຳອິດຢ່າງເປັນທາກງານ ລະຫວ່າງທ່ານ ຄິມ ຈອງ-ອຶນ ກັບ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ເມື່ອເດືອນມິຖຸນາ ປີທີ່ຜ່ານມາ ທີ່ສິງກະໂປ, ນອກຈາກນັ້ນ ທ່ານ ມູນ ແຈ-ອິນ ຍັງເຊື່ອວ່າການສ້າງເຂດສັນຕິພາບ ຖືເປັນການຮັບປະກັນເຖິງສະຖຽນລະພາບ ແລະ ຄວາມປອດໄພໃຫ້ກັບລັດຖະບານເກົາຫຼີເໜືອ ແລະ ອາດເປັນໜຶ່ງໃນເສັ້ນທາງທີ່ຈະນຳໄປສູ່ສັນຕິພາບຢ່າງຖາວອນຢູ່ແຫຼມເກົາຫຼີກໍ່ເປັນໄດ້ ເຊິ່ງຫາກມີຄວາມຄືບໜ້າຢ່າງເປັນຮູບປະທຳ ເກົາຫຼີໃຕ້ມີແນວຄິດສະເໜີພື້ນທີ່ແຫ່ງນີ້ເຂົ້າຮັບການພິຈາລະນາຈາກອົງການ UNESCO ໃຫ້ເປັນມໍລະດົກໂລກ.

ຂະນະທີ່, ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ຂຶ້ນເວທີຖະແຫຼງຕໍ່ UNGA ໃນວັນດຽວກັນ ແລະ ມີຕອນໜຶ່ງທີ່ກ່າວເຖິງເກົາຫຼີເໜືອ ວ່າຕົນມີຄວາມພ້ອມໂດຍບໍ່ມີເງື່ອນໄຂ ໃນການພົບປະຫາລືແບບຕົວຕໍ່ຕົວ ກັບຜູ້ນຳເກົາຫຼີເໜືອ ເພື່ອຟື້ນຟູສາຍພົວພັນທີ່ຫ່າງເຫີນມາຕັ້ງແຕ່ສະໄໝສົງຄາມ ທີ່ຈັກກະພັດຍີ່ປຸ່ນເຄີຍປົກຄອງແຫຼມເກົາຫຼີ ກ່ອນເກີດເຫດໃຫ້ຕ້ອງແບ່ງອອກເປັນ 2 ປະເທດ.