ເຈົ້າມະຫາຊີວິດໄທ ມອບເຄື່ອງລາດໃຫ້ແກ່ກູ້ໄພ 1623 ທີ່ຊ່ວຍເຫຼືອທີມໝູ່ປ່າ ຕິດຖ້ຳຫຼວງ

ລາຍງານ 27 ກັນຍາ 2019, ອີງຕາມການລາຍງານຂອງສະຖານເອກອັກຄະລາຊະທູດແຫ່ງລາຊະອານາຈັກໄທ ປະຈຳ ສປປ.ລາວ ໃຫ້ຮູ້ວ່າ: ເມື່ອວັນພະຫັດ 26 ກັນຍາ ທີ່ຜ່ານມາ ທ່ານ ກຽດຕິຄຸນ ຊາດປະເສີດ ເອກອັກຄະລາຊະທູດໄທ ປະຈຳ ສປປ.ລາວ ໄດ້ເປັນປະທານໃນພິທີຮັບພະລາຊະທານເຄື່ອງລາຊະອິດສະລິຍາພອນ ອັນເປັນທີ່ສັນລະເສີນຍິ່ງຊັ້ນຫຼຽນທອງດິເຣກຄຸນາພອນ ເຊິ່ງພະບາດສົມເດັດພະວະຊິຣະເກົ້າເຈົ້າຢູ່ຫົວ ເຈົ້າມະຫາຊີວິດໄທ ຊົງມອບໃຫ້ແກ່ທ່ານ ໄພຈິດ ກ້ອນປະທຸມ ແລະ ທ່ານ ອາເຢັນ ວິຊຸນດາລາ ຜູ້ເຂົ້າຮ່ວມປະຕິບັດການພາລະກິດຄົ້ນຫານັກກິລາບານເຕະເຍົາວະຊົນ ແລະ ຜູ້ເຝິກສອນຊາວໄທ ຈຳນວນ 13 ຄົນ ທີ່ຕິດຢູ່ໃນອຸທິຍານຖໍ້າຫຼວງ – ຂຸນນ້ຳນາງນອນ ຈັງຫວັດຊຽງລາຍ ລະຫວ່າງວັນທີ 23 ມິຖຸນາ 2018 – 10 ກໍລະກົດ 2018 ໂດຍມີຜູ້ເຂົ້າຮ່ວມໄດ້ແກ່: ຂ້າລາຊະການສະຖານເອກອັກຄະລາຊະທູດໄທ ປະຈຳ ສປປ.ລາວ ແລະ ທີມປະເທດໄທ ພ້ອມດ້ວຍຄູ່ສົມລົດ, ຜູ້ແທນຈາກກະຊວງການຕ່າງປະເທດ ສປປ.ລາວ ແລະ ຜູ້ແທນຈາກມູນລະນິທິຊ່ວຍເຫຼືອຄົນທຸກຍາກແຫ່ງ ສປປ.ລາວ ຫຼື ກູ້ໄພ 1623 ເຊິ່ງເປັນມູນນິທິ ທີ່ຜູ້ຮັບພະລາຊະທານເຄື່ອງລາຊະອິດສະລິຍາພອນ.

ໃນໂອກາດນີ້, ເອກອັກຄະລາຊະທູດ ໄດ້ກ່າວສະແດງຄວາມຍິນດີແກ່ທ່ານ ໄພຈິດ ກ້ອນປະທຸມ ແລະ ທ່ານ ອາເຢັນ​ ວິຊຸນດາລາ ທີ່ໄດ້ຮັບເຄື່ອງລາຊະອິດສະຣິຍາພອນ ອັນເປັນທີ່ສັນລະເສີນຍິ່ງຊັ້ນຫຼຽນທອງດິເຣກຄຸນາພອນ ເຊິ່ງສະແດງໃຫ້ເຫັນເຖິງນ້ຳໃຈໄມຕີຈິດຂອງປະຊາຊົນລາວທີ່ມີຕໍ່ຊາວໄທ ແລະ ຊ່ວຍສົ່ງເສີມຄວາມສຳພັນລະຫວ່າງສອງປະເທດໃຫ້ແໜ້ນແຟ້ນຍິ່ງຂຶ້ນດ້ວຍ. ໂດຍພາຍຫຼັງພິທີຈົບຮຽບຮ້ອຍ ເອກອັກຄະລາຊະທູດ ແລະ ພັນລະຍາ ໄດ້ເປັນເຈົ້າພາບລ້ຽງອາຫານທ່ຽງໃຫ້ແກ່ຜູ້ໄດ້ຮັບເຄື່ອງລາຊະອິດສະລິຍາພອນທັງສອງທ່ານ ແລະ ແຂກຜູ້ມີກຽດທີ່ເຂົ້າຮ່ວມພິທີດ້ວຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube