ສປປ.ລາວ ໃຫ້ສັດຕະຍາບັນການເກືອດຫ້າມອາວຸດນິວເຄຼຍ ແລະ ຮ່ວມພາຄີຊື້-ຂາຍສິນຄ່າລະຫວ່າງປະເທດ

ອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ໃນໂອກາດເຂົ້າຮ່ວມກອງປະຊຸມສະມັດຊາໃຫຍ່ສະຫະປະຊາຊາດ ຄັ້ງທີ 74, ທີ່ ນະຄອນນິວຢອກ, ສະຫະລັດ ອາເມຣິກາ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ໄດ້ຕາງໜ້າໃຫ້ລັດຖະບານ ແຫ່ງ ສປປ.ລາວ ຍື່ນສານເຂົ້າຮ່ວມເປັນພາຄີສົນທິສັນຍາສະຫະປະຊາຊາດ ວ່າດ້ວຍສັນຍາຊື້-ຂາຍສິນຄ້າລະຫວ່າງປະເທດ (The United Nations Convention on Contracts for International Sales of Goods) ແລະ ຍື່ນສານໃຫ້ສັດຕະຍາບັນຕໍ່ສົນທິສັນຍາ ວ່າດ້ວຍການເກືອດຫ້າມອາວຸດນິວເຄຼຍ (Treaty on the Prohibition of Nuclear Weapons) ໃຫ້ແກ່ທ່ານ Miguel de Serpa Soares, ຮອງເລຂາທິການໃຫຍ່ UN ຜູ້ຮັບຜິດຊອບວຽກງານກົດໝາຍ ທັງເປັນທີ່ປຶກສາທາງດ້ານກົດໝາຍຂອງ UN ໃນວັນທີ 24 ແລະ 26 ກັນຍາ 2019 ຕາມລຳດັບ.

ສົນທິສັນຍາສະຫະປະຊາຊາດ ວ່າດ້ວຍສັນຍາຊື້-ຂາຍສິນຄ້າລະຫວ່າງປະເທດ ໄດ້ຖືກຮັບຮອງເອົາໃນປີ 1980 ທີ່ ນະຄອນຫຼວງວຽນ, ປະເທດໂອຕຣິດ ແລະ ມີຜົນສັກສິດໃນປີ 1988 ໂດຍມີຈຸດປະສົງ ເພື່ອກໍານົດລະບຽບການຊື້-ຂາຍສິນຄ້າລະຫວ່າງປະເທດ ລວມທັງພັນທະຂອງຜູ້ຊື້-ຜູ້ຂາຍ. ປັດຈຸບັນ, ມີປະເທດເຂົ້າເປັນພາຄີ ທັງໝົດ 89 ປະເທດ. ການເຂົ້າຮ່ວມສົນທິສັນຍາດັ່ງກ່າວ ແມ່ນມີຄວາມສໍາຄັນ ເນື່ອງຈາກເປັນໂອກາດດີໃຫ້ບັນດາປະເທດພາຄີ ສາມາດນຳໃຊ້ບົດບັນຍັດພາຍໃຕ້ສົນທິສັນຍາດັ່ງກ່າວ ເປັນພື້ນຖານ ແລະ ເປັນບ່ອນອີງໃນການເຮັດສັນຍາຊື້-ຂາຍ ລະຫວ່າງປະເທດ ເຊິ່ງຈະຫລຸດຜ່ອນຄວາມຫຍຸ້ງຍາກ ແລະ ຄວາມສ່ຽງໃນການເລືອກໃຊ້ກົດໝາຍ ຫຼື ສັນຍາ ທີ່ບໍ່ເປັນມາດຕະຖານດຽວກັນ ລະຫວ່າງຜູ້ຊື້-ຜູ້ຂາຍ. ນອກຈາກນັ້ນ, ກໍ່ຈະເຮັດໃຫ້ ສປປ.ລາວ ປັບປຸງລະບົບກົດໝາຍຂອງຕົນ ໃຫ້ເປັນສາກົນຫຼາຍຂຶ້ນ ດ້ວຍການນຳໃຊ້ມາດຕະຖານດຽວກັນຂອງຄູ່ສັນຍາ, ໂດຍສະເພາະໃນປັດຈຸບັນທີ່ ສປປ.ລາວ ຍັງບໍ່ທັນມີກົດໝາຍສະເພາະ ກ່ຽວກັບ ການຊື້-ຂາຍລະຫວ່າງປະເທດ, ເປັນຕົ້ນແມ່ນດ້ານສິດ ແລະ ພັນທະຂອງຄູ່ຄ້າທີ່ຢູ່ຄົນລະປະເທດ ລວມທັງກົນໄກໃນການແກ້ໄຂຂໍ້ຂັດແຍ່ງ ກ່ຽວກັບ ການຊື້-ຂາຍ ລະຫວ່າງປະເທດ.

ສົນທິສັນຍາ ວ່າດ້ວຍການເກືອຫ້າມອາວຸດນິວເຄຼຍ ໄດ້ຖືກຮັບຮອງເອົາໃນກອງປະຊຸມສະມັດຊາໃຫຍ່ສະປະຊາຊາດ ຄັ້ງທີ 72 ໃນປີ 2017 ພາຍຫຼັງສໍາເລັດຂະບວນການເຈລະຈານັບແຕ່ປີ 2010 ເປັນຕົ້ນມາ. ສົນທິສັນຍາດັ່ງກ່າວ ໄດ້ເປີດໃຫ້ປະເທດສະມາຊິກ UN ລົງນາມເປັນພາຄີ ໃນວັນທີ 20 ກັນຍາ 2017 ທີ່ ສໍານັກງານໃຫຍ່ UN. ປັດຈຸບັນມີ 79 ປະເທດ ໄດ້ລົງນາມ ແລະ ໃນນັ້ນມີ 32 ປະເທດໃຫ້ສັດຕະຍາບັນ. ພາຍຫລັງ 50 ປະເທດໄດ້ໃຫ້ສັດຕະຍາບັນ, ສົນທິສັນຍາດັ່ງກ່າວ ຈະມີຜົນບັງຄັບໃຊ້ພາຍໃນ 90 ວັນ. ຈຸດປະສົງຫຼັກຂອງສົນທິສັນຍານີ້ ແມ່ນເພື່ອເກືອດຫ້າມອາວຸດນິວເຄຼຍ ຄືຫ້າມບໍ່ໃຫ້ມີການພັດທະນາ, ທົດລອງ, ຜະລິດ, ຄອບຄອງ, ສະສົມ, ສົ່ງຕໍ່, ຮັບເອົາ ຫຼື ນຳໃຊ້ຢູ່ໃນດິນແດນຂອງຕົນ. ການໃຫ້ສັດຕະຍາບັນສົນທິສັນຍາດັ່ງກ່າວຂອງ ສປປ.ລາວ ແມ່ນສະແດງໃຫ້ເຫັນເຖິງຄວາມໝາຍໝັ້ນທາງດ້ານການເມືອງ ອັນສະເໝີຕົ້ນສະເໝີປາຍ ທີ່ຢາກສ້າງໃຫ້ໂລກນີ້ປອດອາວຸດນິວເຄຼຍ, ກໍ່ຄືເປັນການປະກອບສ່ວນສະໜັບສະໜູນຄວາມພະຍາຍາມຂອງວົງຄະນາຍາດສາກົນ ກ່ຽວກັບການເກືອດຫ້າມ ແລະ ການລຶບລ້າງອາວຸດນິວເຄຼຍ ທີ່ເປັນໄພຂົ່ມຂູ່ອັນຮ້າຍແຮງຕໍ່ມວນມະນຸດໃນໂລກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube