ໄຟໄໝ້ເຮືອໂດຍສານໃນແມ່ນ້ຳຂອງ ຄົນລາວຖືກໄຟລວກບາດເຈັບ 8 ຄົນ

ລາຍງານ 2 ຕຸລາ 2019, ອີງຕາມການລາຍງານຂອງສຳນັກຂ່າວມະຕິຊົນໃຫ້ຮູ້ວ່າ: ເຈົ້າໜ້າທີ່ຮັກສາຄວາມສະຫງົບຕາມລ້ຳແມ່ນ້ຳຂອງ ຈັງຫວັດຊຽງຣາຍ ໄດ້ຮັບແຈ້ງວ່າເກີດເຫດໄຟໄໝ້ເຮືອໂດຍສານໃນແມ່ນ້ຳຂອງ ບໍວິເວນບ້ານຫ້ວຍລຶກ ອຳເພີວຽງແກ່ນ ຈັງຫວັດຊຽງຮາຍ ເຊິ່ງເປັນຊາຍແດນໄທ-ລາວ ຈຶ່ງໄດ້ໄປກວດສອບພົບວ່າເຮືອໂດຍສານຂະໜາດກາງ ທີ່ບັນທຸກຄົນໄດ້ 10-20 ຄົນ ກຳລັງຈອດທຽບທ່າເຮືອຊົ່ວຄາວຢູ່ຝັ່ງໄທ ສະພາບໄຟລຸກໄໝ້ບໍລິເວນກາງເຮືອຂ້ອນໄປທາງທ້າຍ ເຊິ່ງເປັນຈຸດຂອງເຄື່ອງຈັກ ແລະ ຫຼັງຄາ ໂດຍພາຍໃນເຮືອມີຜູ້ໂດຍສານ 10 ຄົນ.

ຈາກການກວດສອບພົບຕົ້ນໄຟມາຈາກທ້າຍເຮືອທີ່ມີຫຼັງຄາ ໂດຍເປັນຖັງແກັດທີ່ມີແປວໄຟລຸກອອກມາຢ່າງໜັກ ລວມທັງມີການລຸກໄໝ້ຈົນຄວັນຄຸ້ມໄປທົ່ວບໍລິເວນ ເຈົ້າໜ້າທີ່ເທິງຝັ່ງໄທຈຶ່ງໄດ້ລະດົມກຳລັງກັນສີດນ້ຳ ແລະ ມີລົດດັບເພີງເຂົ້າຊ່ວຍສະໜັບສະໜູນຈົນສາມາດຄວບຄຸມໄຟໄວ້ໄດ້ ແຕ່ກໍ່ມີຜູ້ໂດຍສານເທິງເຮືອຊັນຊາດລາວ ໄດ້ຮັບບາດເຈັບຈຳນວນ 8 ຄົນ ທາງໂຮງໝໍວຽງແກ່ນຈຶ່ງຈັດລົດໂຮງໝໍມາຮັບໄປປິ່ນປົວຢ່າງເລັ່ງດ່ວນແລ້ວ.

ຈາກການສືບສວນເບື້ອງຕົ້ນຮູ້ວ່າ ກ່ອນເກີດເຫດ ເຮືອໂດຍສານດັ່ງກ່າວໄດ້ຈອດທຽບທ່າຝັ່ງໄທ ແຕ່ປາກົດວ່າຂະນະທີ່ມີຜູ້ໂດຍສານຢູ່ນັ້ນຖັງແກັດທີ່ຢູ່ໃນເຮືອໄດ້ຮົ່ວອອກມາຢ່າງກະທັນຫັນ ແລະ ເກີດແປວໄຟລຸກສຸມເຂົ້າໃສ່ຄົນໃນເຮືອ ເຮັດໃຫ້ມີຜູ້ບາດເຈັບຄືດັ່ງກ່າວ, ເຈົ້າໜ້າທີ່ໄດ້ກວດສອບເບື້ອງຕົ້ນພົບວ່າຈັກເຮືອ ທີ່ໃຊ້ແກັດເປັນເຊື້ອໄຟມີຮ່ອງຮອຍການຖືກໄຟໄໝ້ ແຕ່ໄດ້ແຈ້ງໜ່ວຍງານທີ່ກ່ຽວຂ້ອງໄປກວດສອບຫາສາເຫດຂອງການຮົ່ວ ແລະ ການເກີດໄຟລຸກໄໝ້ຕໍ່ໄປ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube