ເກົາຫຼີເໜືອ ປະສົບຄວາມສຳເລັດ ຍິງຂີປະນາວຸດ “ປຸກກຸກຊອງ-3” ຈາກເຮືອດຳນ້ຳ

ລາຍງານ 3 ຕຸລາ 2019, ອີງຕາມການລາຍງານຂອງສຳນັກຂ່າວກາງເກົາຫຼີ (KCNA) ໃຫ້ຮູ້ວ່າ: ກອງທັບປະຊາຊົນເກົາຫຼີ (KPA) ປະສົບຄວາມສຳເລັດໃນການທົດລອງປະສິດທິພາບຂອງຂີປະນາວຸດແບບຍິງຈາກເຮືອດຳນ້ຳ (SLBM) ລຸ້ນຫຼ້າສຸດ ປຸກກຸກຊອງ-3 (Pukgukson-3), ໂດຍຂີປະນາວຸດສາມາດທັ່ງຂຶ້ນຟ້າໃນແນວຕັ້ງໄດ້ຢ່າງໝັ້ນຄົງ ແລະ ການທົດລອງຄັ້ງນີ້ເກີດຂຶ້ນນອກຝັ່ງອ່າວວອນຊານ ທາງຕາເວັນອອກສຽງໃຕ້ຂອງເກົາຫຼີເໜືອ ແລະ ເປັນການທົດລອງ SLBM ຄັ້ງທຳອິດໃນຮອບກວ່າ 2 ປີ ຕໍ່ຈາກຄວາມສຳເລັດໃນການທົດລອງຂີປະນາວຸດ ປຸກກຸກຊອງ-2 ເມື່ອເດືອນກຸມພາ 2017, ສ່ວນການທົດລອງປຸກກຸກຊອງລຸ້ນທຳອິດ ເກີດຂຶ້ນເມື່ອເດືອນສິງຫາ 2016.

ເຖິງຢ່າງໃດກໍ່ຕາມ, ກະຊວງປ້ອງກັນປະເທດເກົາຫຼີໃຕ້ ອອກຖະແຫຼງການກ່ອນໜ້ານັ້ນພຽງບໍ່ພໍເທົ່າໃດຊົ່ວໂມງ ວ່າການທົດລອງຂີປະນາວຸດຄັ້ງດັ່ງກ່າວຂອງລັດຖະບານເກົາຫຼີເໜືອ ທີ່ເກີດຂຶ້ນເມື່ອຕອນເຊົ້າຂອງວັນພຸດ 2 ຕຸລາ ທີ່ຜ່ານມາ ຕາມເວລາທ້ອງຖິ່ນ ອາດຈະເປັນການທົດລອງ SLBM ລຸ້ນໃດລຸ້ນໜຶ່ງ ແລະ ການເຄື່ອນໄຫວທາງທະຫານຄືດັ່ງກ່າວ ຍິ່ງຈະເພີ່ມຄວາມຫຍຸ້ງຍາກໃຫ້ກັບຄວາມພະຍາຍາມຂອງທຸກຝ່າຍທີ່ກ່ຽວຂ້ອງ ຕໍ່ການຜ່ອຍຄາຍບັນຍາກາດຄວາມເຄັ່ງຕຶງຢູ່ແຫຼມເກົາຫຼີ.

ຂະນະທີ່ທ່ານ ຊິນ ໂຊ ອາເບະ ນາຍົກລັດຖະມົນຕີຍີ່ປຸ່ນ ສະແດງຄວາມບໍ່ພໍໃຈເປັນຢ່າງຍິ່ງ ເນື່ອງຈາກມີລາຍງານວ່າຂີປະນາວຸດມີພິໄສການຍິງປະມານ 450 ກິໂລແມັດ ກ່ອນແຕກອອກເປັນ 2 ສ່ວນ ແລະ ສ່ວນໜຶ່ງຂອງຈະຫຼວດຕົກລົງໃນເຂດນ່ານນ້ຳທີ່ຖືເປັນເຂດເສດຖະກິດສະເພາະ (EEC) ຂອງຍີ່ປຸ່ນ.

ການປະກາດຢືນຢັນການທົດລອງ SLBM ລຸ້ນໃໝ່ຂອງເກົາຫຼີເໜືອ ເກີດຂຶ້ນພຽງວັນດຽວ ກ່ອນຈະເຖິງກຳນົດການພົບປະຫາລືລະດັບເຈົ້າໜ້າທີ່ລະຫວ່າງລັດຖະບານສະຫະລັດ ອາເມຣິກາ ກັບ ລັດຖະບານເກົາຫຼີເໜືອ ລະຫວ່າງວັນທີ 4-5 ຕຸລານີ້ ເຊິ່ງຄະນະຂອງຝ່າຍເກົາຫຼີເໜືອນຳໂດຍທ່ານ ນາງ ໂຊ ຊອນ-ຮີ ຮອງລັດຖະມົນຕີກະຊວງການຕ່າງປະເທດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube