ຊ້າງໄທຕົກເຫວນາລົກ ຕາຍ 6 ໂຕ ແລະ ທາງການໄທເລັ່ງຊ່ວຍເຫຼືອໂຕທີ່ລອດ

ລາຍງານ 5 ຕຸລາ 2019, ທ່ານ ທັນຍາ ເນຕິທຳມະກຸນ ອະທິບໍດີກົມອຸທິຍານແຫ່ງຊາດ, ສັດປ່າ ແລະ ພັນພືດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຂອງໄທ ໃຫ້ຮູ້ວ່າ: ຊ້າງປ່າປະສົບເຫດຕົກລົງໃນນ້ຳຕົກຕາດເຫວນາລົກ ອຸທະຍານແຫ່ງຊາດເຂົາໃຫຍ່ ເຮັດໃຫ້ຊ້າງຕາຍ 6 ໂຕ.

ທ່ານ ທັນຍາ ກ່າວວ່າອີກວ່າ: ເມື່ອວັນທີ 3-4 ຕຸລາ ທີ່ຜ່ານມາ ເນື່ອງຈາກມີຊ້າງອອກປ່າມາເປັນຈຳນວນຫຼາຍ ເຈົ້າໜ້າທີ່ຈຶ່ງໄດ້ຕ້ອນຊ້າງ ບໍລິເວນເສັ້ນທາງເລກທີ 3077 ຈັງຫວັດປຣາຈີນບຸຣີ ກັບເຂົ້າປ່າ,  ຕໍ່ມາເວລາ 03:00 ໂມງຂອງວັນທີ 5 ຕຸລານີ້ ເຈົ້າໜ້າທີ່ໄດ້ຍິນສຽງຊ້າງບໍລິເວນຫ້ວຍສະໝໍປູນ ທີ່ໄຫຼໄປສູ່ນ້ຳຕົກຕາດເຫວນາລົກ ແລະ ເມື່ອເວລາ 06:00 ເຈົ້າໜ້າທີ່ໄດ້ເຂົ້າກວດສອບບໍລິເວນລຳຫ້ວຍ ຈົນເຖິງນ້ຳຕົກເຫວນາລົກ ພົບລູກຊ້າງປ່າຈຳນວນ 1 ໂຕ ອາຍຸປະມານ 3 ປີ ຈົມນ້ຳບໍລິເວນຊັ້ນທຳອິດຂອງນ້ຳຕົກ ແລະ ພົບຊ້າງອີກ 2 ໂຕ ຢູ່ເທິງຝັ່ງໜ້າຜາຂອງນ້ຳຕົກ ທີ່ພະຍາຍາມຈະລົງໄປຊ່ວຍລູກຊ້າງທີ່ຢູ່ໃນນ້ຳຕົກ ແລະ ມີສະພາບອ່ອນແຮງ ແລະ ໄດ້ກວດສອບຕາມລຳນ້ຳຈົນເຖິງຊັ້ນລຸ່ມພົບຊ້າງປ່າອີກ 5 ຕົວ ຈົມນ້ຳຕາຍ ລວມທັງໝົດຕາຍ 6 ໂຕ.

ຂະນະນີ້ທາງອຸທະຍານແຫ່ງຊາດເຂົາໃຫຍ່ ໄດ້ປະກາດປິດການທ່ອງທ່ຽວບໍລິເວນນ້ຳຕົກຕາດເຫວນາລົກ ແລະ ມອບໃຫ້ເຈົ້າໜ້າທີ່, ໜ່ວຍກູ້ໄພ ແລະ ສັດຕະວະແພດ ດຳເນີນການຊ່ວຍເຫຼືອຊ້າງ 2 ໂຕທີ່ຍັງຄາຢູ່ໃນເຫວນາລົກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube