ນາຍົກຍີ່ປຸ່ນສັ່ງໃຫ້ປະຕິບັດງານຕະຫຼອດ 24 ຊົ່ວໂມງ ເພື່ອຊ່ວຍຜູ້ປະສົບໄພຈາກພາຍຸໄຕ້ຝຸ່ນຮາກິບິສ

ລາຍງານ 14 ຕຸລາ 2019, ທ່ານ ຊິນໂຊ ອາເບະ ຖະແຫຼງເມື່ອວັນອາທິດ ທີ່ຜ່ານມາ ກ່ຽວກັບການປະຕິບັດການຂອງພາກລັດ ໃນການໃຫ້ຄວາມຊ່ວຍເຫຼືອຜູ້ປະສົບຈາກອິດທິພົນຂອງພາຍຸໄຕ້ຝຸ່ນຮາກິບິສ ທີ່ພັດເຂົ້າພື້ນທີ່ສ່ວນໃຫຍ່ຂອງເກາະຮອນຊູ ພາກກາງຂອງປະເທດ ເມື່ອວັນເສົາ 12 ຕຸລາ ທີ່ຜ່ານມາ ວ່າເຖິງແມ່ນວ່າພາຍຸໄດ້ເຄື່ອນຕົວອອກຈາກຍີ່ປຸ່ນ ແລະ ອ່ອນກຳລັງລົງເປັນພຽງຄວາມກົດດັນອາກາດຕ່ຳ ແຕ່ຍັງໄດ້ປະຄວາມເສຍຫາຍໄວ້ໃຫ້ຢ່າງມະຫາສານ ເຊິ່ງຕົນໄດ້ເນັ້ນໜັກໃຫ້ໜ່ວຍງານທີ່ກ່ຽວຂ້ອງທຸກແຫ່ງ ປະຕິບັດໜ້າທີ່ຕະຫຼອດ 24 ຊົ່ວໂມງ ເພື່ອໃຫ້ຂະບວນການຊ່ວຍເຫຼືອປະຊາຊົນບໍ່ຂາດວັກຂາດຕອນ.

ຂະນະດຽວກັນ, ນາຍົກລັດຖະມົນຕີຍີ່ປຸ່ນ ກ່າວອີກວ່າຜົນກະທົບຈາກມະຫາໄພພິບັດນ້ຳຖ້ວມຄັ້ງນີ້ ລໍຖາບໍ່ໄດ້ແມ່ນແຕ່ວິນາທີດຽວ ແລະ ຕົນຈະບໍ່ລໍຖ້າໃຫ້ໜ່ວຍງານລັດທ້ອງຖິ່ນທີ່ໄດ້ຮັບຜົນກະທົບຂໍຄວາມຊ່ວຍເຫຼືອ ຈະຈັດຕັ້ງຄະນະປະຕິບັດງານສະເພາະກິດລົງພື້ນທີ່ໃນແຂວງມິຢາງິ, ຟຸກຸຊິມະ, ໄຊຕາມະ, ອິບາຣາກິ, ໂທຈິງິ ແລະ ນາງາໂນະ ເພື່ອປະເມີນຄວາມເສຍຫາຍ ແລ້ວສົ່ງລາຍງານກັບມາ ເພື່ອລັດໃຫ້ຖະບານສູງກາງໄດ້ຈັດຕັ້ງກອງທຶນ ຫຼື ຈັດສັນງົບປະມານສຸກເສີນເພື່ອຊ່ວຍເຫຼືອຕໍ່ໄປ.

ໃນດ້ານຂອງສະຖານີໂທລະພາບ NHK ລາຍງານຈຳນວນຜູ້ເສຍຊີວິດຈາກອິດທິພົນພາຍຸໄຕ້ຝຸ່ນຮາກິບິສ ມີ 40 ຄົນແລ້ວ ແຕ່ລາຍງານຂອງລັດຖະບານຍັງລະບຸໄວ້ທີ່ 14 ຄົນ, ຂະນະທີ່ກອງກຳລັງປ້ອງກັນຕົນເອງຍີ່ປຸ່ນ (ກອງທັບຍີ່ປຸ່ນ) ໄດ້ລະດົມກຳລັງເຈົ້າໜ້າທີ່ຫຼາຍກວ່າ 30,000 ຄົນ ເຂົ້າສະໜັບສະໜູນການປະຕິບັດການຂອງໜ່ວຍກູ້ໄພ ແລະ ເຈົ້າໜ້າທີ່ຕຳຫຼວດທີ່ມີກວ່າ 110,000 ຄົນ ໃນການຊ່ວຍເຫຼືອຜູ້ປະສົບໄພ, ສ່ວນລະບົບຂົນສົ່ງທາລະນະທັງລົດໄຟ ແລະ ຖ້ຽວບິນ ໄດ້ເລີ່ມກັບມາໃຫ້ບໍລິການແລ້ວ ແຕ່ຍັງມີຄວາມຊັກຊ້າໃນຫຼາຍເສັ້ນທາງເນື່ອງຈາກລະບົບລາງໄດ້ຮັບຄວາມເສຍຫາຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube