ສ.ອາເມຣິກາ ຂວ້ຳບາດຕວັກກີ ຈາກກໍລະນີເປີດບັ້ນຮົບຢູ່ພາກເໜືອຂອງຊີຣີ ໂຈມຕີຊາວເຄິດ

ລາຍງານ 14 ຕຸລາ 2019, ກະຊວງການເງິນສະຫະລັດ ອາເມຣິກາ ອອກຖະແຫຼງການເມື່ອວັນຈັນ 14 ຕຸລາ ທີ່ຜ່ານມາ ປະກາດມາດຕະການຂວໍ້າບາດທາງເສດຖະກິດຕໍ່ເຈົ້າໜ້າທີ່ລະດັບສູງຂອງກະຊວງປ້ອງກັນປະເທດ, ກະຊວງພາຍໃນ ແລະ ກະຊວງພະລັງງານຂອງຕວັກກີ ທີ່ເປັນການອາຍັດຊັບສິນຂອງບຸກຄົນທີ່ມີຊື່ຢູ່ໃນບັນຊີດຳດັ່ງກ່າວ ໃນກໍລະນີຄອບຄອງຊັບສິນໃນ ສ.ອາເມຣິກາ ແລະ ປະກາດໃຫ້ບຸກຄົນ ແລະ ບໍລິສັດໃດກໍ່ຕາມໃນ ສ.ອາເມຣິກາ ທີ່ເຮັດທຸລະກຳຮ່ວມກັບບຸກຄົນເຫຼົ່ານີ້ຖືເປັນອາຊະຍາກຳທາງເສດຖະກິດ.

ໃນເວລາດຽວກັນ, ທຳນຽບຂາວໄດ້ເຜີຍແຜ່ຖະແຫຼງການຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ວ່າທ່ານມີຄວາມພ້ອມລະດັບສູງສຸດໃນການທຳລາຍລ້າງເສດຖະກິດຕວັກກີ ຕາບໃດທີ່ລັດຖະບານຕວັກກີຍັງເລືອກເສັ້ນທາງອັນຕະລາຍ ທີ່ໝາຍເຖິງປະຕິບັດການທາງທະຫານຂ້າມເຂດແດນເພື່ອທຳລາຍເຂດທີ່ໝັ້ນຂອງກອງກຳລັງປ້ອງກັນຕົນເອງຊາວເຄິດ ຕາມແນວຊາຍແດນທາງພາກເໜືອຂອງຊີຣີ, ຂະນະທີ່ທ່ານ ໄມ ເພນ ຮອງປະທານປະເທດ ສ.ອາເມຣິກາ ກ່າວວ່າຖະແຫຼງການຂອງຜູ້ນຳ ສ.ອາເມຣິກາ ຄືການສົ່ງສັນຍານທີ່ຊັດເຈນວ່າ ລັດຖະບານ ສ.ອາເມຣິກາ ຕ້ອງການໃຫ້ຕວັກກີຍຸຕິປະຕິບັດການທາງທະຫານທີ່ເປັນການຮຸກຮານເຂດທີ່ໝັ້ນຂອງກອງກຳລັງຊາວເຄິດ ແລະ ເຈລະຈາກັບອີກຝ່າຍຢ່າງສັນຕິ ເພື່ອຫຼຸດຜ່ອນຄວາມຮຸນແຮງ.

ເຖິງຢ່າງໃດກໍ່ຕາມ, ທະຫານອາເມຣິກາປະມານ 1,000 ຄົນ ພ້ອມອາວຸດຍຸດໂທປະກອນຈຳນວນໜຶ່ງ ໄດ້ຖອນກຳລັງອອກຈາກແນວຮົບທາງພາກເໜືອຂອງຊີຣີ ແລະ ຈະເດີນທາງກັບໄປປະຈຳການຕາມຖານທັບໃນຕາເວັນອອກກາງ ຕາມການເປີດເຜີຍຂອງທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ ສ.ອາເມຣິກາ, ເຊິ່ງການຖອນກຳລັງພົນຂອງກອງທັບ ສ.ອາເມຣິກາ ເປັນໄປຕາມການສົນທະນາທາງໂທລະສັບລະຫວ່າງທ່ານ ໂດໂນ ທຣຳ ກັບທ່ານ ເຣເຊບ ເທຢິບ ເອີໂດກັນ ປະທານປະເທດຕວັກກີ ແລະ ຜູ້ນຳຕວັກກີຖືວ່າ ເປັນການເປີດທາງໃຫ້ລັດຖະບານຂອງຕົນເປີດສາກປະຕິບັດການທາງທະຫານ ເມື່ອກາງອາທິດທີ່ຜ່ານມາແລ້ວ, ໂດຍທ່ານ ເຣເຊບ ເທຢິບ ເອີໂດກັນ ກ່າວຢ້ຳວ່າຕ້ອງການໃຫ້ກອງກຳລັງນັກຮົບຊາວເຄິດຖອຍອອກໄປຈາກເຂດຊາຍແດນ ເພື່ອເປັນການກຳນົດພື້ນທີ່ປອດໄພ ຫຼື ເຂດກັນຊົນ ຕະຫຼອດແນວຊາຍແດນ ທີ່ຈະຊ່ວຍໃຫ້ຜູ້ລີ້ໄພຊາວຊີຣີປະມານ 3.6 ລ້ານຄົນໃນຕວັກກີສາມາດເດີນທາງກັບພູມລຳເນົາໄປຢ່າງປອດໄພ.

ໃນດ້ານອົງກອນສັງເກດການດ້ານສິດທິມະນຸດຊີຣີ ລາຍງານວ່າກອງທັບຊີຣີໄດ້ເລີ່ມເຄື່ອນທັບເຂົ້າສູ່ຊາຍແດນພາກເໜືອ ຕາມຂໍ້ຕົກລົງກັບຜູ້ແທນເຈລະຈາຊາວເຄິດແລ້ວ ເພື່ອສະໜັບສະໜູນການສູ້ຮົບກັບກອງທັບຕວັກກີ ທີ່ມີທິດທາງວ່າຈະກໍ່ໃຫ້ເກີດການນອງເລືອດ ແລະ ວິກິດການດ້ານມະນຸດຄັ້ງໃໝ່.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube