ຈີນ-ລັດເຊຍ ຈະສະເໜີໃຫ້ສະພາຄວາມໝັ້ນຄົງ UN ຫຼຸດຜ່ອນການຂວໍ້າບາດເກົາຫຼີເໜືອ

ລາຍງານ 17 ທັນວາ 2019, ຮ່າງມະຕິທີ່ຈີນ ແລະ ລັດເຊຍ ຮ່ວມກັນວາງອອກ ເຊິ່ງທັງສອງປະເທດເປັນສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໄດ້ມີການສະເໜີໃຫ້ກອງປະຊຸມປັບປຸງມາດຕະການຂວໍ້າບາດທາງເສດຖະກິດຕໍ່ເກົາຫຼີເໜືອຕາມຄວາມຈຳເປັນ ເພື່ອໃຫ້ສອດຄ່ອງກັບການທີ່ລັດຖະບານເກົາຫຼີເໜືອປະຕິບັດຕາມມະຕິຂອງ UNSC, ພ້ອມທັງສະເໜີວ່າ ມາດຕະການທີ່ຈຳເປັນທີ່ສຸດ ຄືການຫຼຸດຜ່ອນ ຫຼື ຍົກເວັ້ນມາດຕະການຂວໍ້າບາດດ້ານມະນຸດສະທຳ ແລະ ດ້ານທີ່ກ່ຽວຂ້ອງກັບການດຳລົງຊີວິດຂອງພົນລະເມືອງເກົາຫຼີເໜືອ ເຊິ່ງລວມເຖິງການສົ່ງອອກອາຫານທະເລ ແລະ ຜະລິດຕະພັນຕ່ຳແຜ່ນ.

ນອກຈາກນີ້, ຮ່າງມະຕີດັ່ງກ່າວຍັງລະບຸໃຫ້ຍົກເວັ້ນການຂວ້ຳບາດເກົາຫຼີເໜືອ ຈາກໂຄງການເສັ້ນທາງຄົມມະນາຄົມ ທີ່ລວມເຖິງເສັ້ນທາງລົດໄຟ ແລະ ເສັ້ນທາງຫຼວງເຊື່ອມຕໍ່ກັບເກົາຫຼີໃຕ້ ໂດຍຮ່າງມະຕິໄດ້ປິດທ້າຍວ່າ UNSC ມີຄວາມຍິນດີ ແລະ ສະໜັບສະໜູນການເຈລະຈາຢ່າງຕໍ່ເນື່ອງລະຫວ່າງ ສ.ອາເມຣິກາ ກັບ ເກົາຫຼີເໜືອໃນທຸກລະດັບ.

ເຖິງຢ່າງໃດກໍ່ຕາມ ຍັງບໍ່ຊັດເຈນວ່າຮ່າງມະຕິນີ້ຈະໄດ້ເຂົ້າສູ່ການອະພິປາຍ ແລະ ລົງມະຕິຢ່າງເປັນທາກງານຂອງກອງປະຊຸມຫຼືບໍ່ ເນື່ອງຈາກໃນຂັ້ນທຳອິດຕ້ອງໄດ້ຮັບການສະໜັບສະໜູນຈາກສະມາຊິກຢ່າງໜ້ອຍ 9 ປະເທດ ແລະ ຕ້ອງບໍ່ມີການໃຊ້ສິດຢຸດຢັ້ງຈາກສະມາຊິກຖາວອນ ທີ່ໄດ້ແກ່: ສ.ອາເມຣິກາ, ຈີນ, ລັດເຊຍ, ອັງກິດ ແລະ ຝຣັ່ງ.

ການເຄື່ອນໄຫວທີ່ UNSC ເກີດຂຶ້ນໃນວັນດຽວກັບທີ່ທ່ານ ສະຕີເຟນ ບີກັນ ຜູ້ແທນພິເສດດ້ານການເຈລະຈາກັບເກົາຫຼີເໜືອຂອງ ສ.ອາເມຣິກາ ເດີນທາງຢ້ຽມຢາມເກົາຫຼີໃຕ້ໃນອາທິດນີ້ ເຊິ່ງທ່ານ ສະຕີເຟນ ບີກັນ ເຕືອນເກົາຫຼີເໜືອໃຫ້ຢຸດເຊົາສະແດງພຶຶດຕິກຳອັນເປັນປໍລະປັກໂດຍບໍ່ຈຳເປັນ ແລະ ຮຽກຮ້ອງໃຫ້ກັບມາເຈລະຈາກັບ ສ.ອາເມຣິກາ, ເຊິ່ງການທີ່ທ່ານ ສະຕີເຟນ ບີກັນ ກ່າວວ່າລັດຖະບານ ສ.ອາເມຣິກາບໍ່ມີເສັ້ນຕາຍ ໄດ້ຮັບການຕີຄວາມຈາກຫຼາຍຝ່າຍວ່າ ເປັນການປະຕິເສດຂໍ້ຮຽກຮ້ອງຂອງລັດຖະບານເກົາຫຼີເໜືອ ທີ່ຕ້ອງການໃຫ້ ສ.ອາເມຣິກາ ປ່ຽນແປງພຶດຕິກຳພາຍໃນທ້າຍປີນີ້.

ໃນເວລາດຽວກັນ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວເຖິງການທີ່ເກົາຫຼີເໜືອທົດລອງອາວຸດຫຼາຍກວ່າ 10 ຄັ້ງ ຕັ້ງແຕ່ເດືອນພຶດສະພາ ທີ່ຜ່ານມາ ວ່າເປັນສິ່ງທີ່ໜ້າຜິດຫວັງ ຫາກອີກຝ່າຍຍັງບໍ່ຢຸດຕິ ແຕ່ ສ.ອາເມຣິກາຈະຄວບຄຸມສະຖານະການໄດ້, ຂະນະທີ່ທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ ສ.ອາເມຣິກາ ກ່າວວ່າການທົດລອງຂີປະນາວຸດ ຫຼື ສິ່ງປິດສະໜາຂອງເກົາຫຼີເໜືອ ສາມາດເກີດຂຶ້ນໄດ້ຕະຫຼອດເວລາ ເມື່ອໃດກໍ່ຕາມທີ່ທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອມີຄວາມຮູ້ສຶກບໍ່ພໍໃຈ.

HTML tutorial