ສານອຸທອນໄທໃຫ້ ໄຊຊະນະ ຕິດຄຸກຕະຫຼອດຊີວິດຄືເກົ່າ ເພາະຫຼັກຖານທີ່ຍື່ນອຸທອນບໍ່ມີນ້ຳໜັກ

ລາຍງານ 19 ທັນວາ 2019, ອີງຕາມການລາຍງານຂອງສຳນັກຂ່າວມະຕິຊົນໃຫ້ຮູ້ວ່າ: ສານອາຍາ ຖະໝົນຣັດຊະດາພິເສກ ອ່ານຄຳພິພາກສາສານອຸທອນ ທີ່ທ້າວ ໄຊຊະນະ ແກ້ວພິມພາ ສັນຊາດລາວເປັນຈຳເລີຍ ໃນຄວາມຜິດອາຍາມີຢາບ້າ 1.2 ລ້ານເມັດໄວ້ໃນຄອບຄອງເພື່ອຈຳໜ່າຍ, ເຊິ່ງສານຊັ້ນຕົ້ນໄປພິຈາລະນາແລ້ວໃຫ້ຈຳເລີຍຕິດຄຸກຕະຫຼອດຊີວິດ.

ເຊິ່ງຈຳເລີຍໄດ້ຍື່ນອຸທອນ ແລະ ສານອຸທອນໄດ້ພິຈາລະນາໃຫ້ຈຳເລີຍຕິດຄຸກຕະຫຼອດຊີວິດຕາມເດີມ ໂດຍໃຫ້ເຫດຜົນວ່າພະຍານຫຼັກຖານທີ່ຈຳເລີຍຍື່ນອຸທອນບໍ່ມີນ້ຳໜັກທີ່ຈະຫຼັກລ້າງພະຍານຫຼັກຖານຂອງໂຈດໄດ້ ເຖິງຈະເປັນຊາວຕ່າງປະເທດ ແລະ ການກະທຳເກີດຂຶ້ນນອກປະເທດໄທ ແຕ່ກໍ່ມີຈຸດປະສົງໃຫ້ເກີດຂຶ້ນໃນໄທ ຈຶ່ງຕ້ອງດຳເນີນຄະດີ ແລະ ນັບໂທດຕາມກົດໝາຍໃນປະເທດໄທ.

ເຊິ່ງກ່ອນໜ້ານີ້ ເມື່ອວັນທີ 20 ມີນາ 2018 ສານຊັ້ນຕົ້ນໄດ້ພິຈາລະນາປະຫານຊີວິດທ້າວ ໄຊຊະນະ ແກ້ວພິມພາ ເນື່ອງຈາກມີພະຍານຫຼັກຖານຊັດເຈນວ່າຈຳເລີຍເປັນຜູ້ສັ່ງການ ໃຫ້ມີການລຳລຽງຢາບ້າ ເພື່ອສົ່ງໃຫ້ລູກຄ້າໃນປະເທດໄທ ແຕ່ຈຳເລີຍໃຫ້ການເປັນປະໂຫຍດຕໍ່ສານຈຶ່ງຫຼຸດໂທດ 1 ໃນ 3 ໃຫ້ຕິດຄຸກຕະຫຼອດຊີວິດ.

HTML tutorial