ປ.ປູຕິນ ໂທຂອບໃຈ ປ.ທຣຳ ສະໜອງຂໍ້ມູນຊ່ວຍປ້ອງກັນເຫດກໍ່ການຮ້າຍ ທີ່ນະຄອນເຊັນປີເຕີສະເບີກ

ລາຍງານ 1 ມັງກອນ 2020, ທຳນຽບປະທານປະເທດລັດເຊຍ ອອກຖະແຫຼງການ ເມື່ອວັນທີ 29 ທັນວາ 2019 ທີ່ຜ່ານມາວ່າ ທ່ານ ວະລາດິເມຍ ປູຕິນ ປະທານປະເທດລັດເຊຍ ໂທລະສັບເຖິງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ສະແດງຄວາມຂອບໃຈທີ່ແຈ້ງຂໍ້ມູນຜ່ານທາງໜ່ວຍຂ່າວກອງຂອງແຕ່ລະປະເທດ ຈົນສາມາດຊ່ວຍປ້ອງກັນເຫດກໍ່ການຮ້າຍໃນລັດເຊຍໄດ້ສຳເລັດ.

ສຳນັກຂ່າວຫຼາຍແຫ່ງຂອງລັດເຊຍລາຍງານ ໂດຍອ້າງແຫຼ່ງຂ່າວກອງ FSB ລະບຸວ່າ: ພົນລະເມືອງລັດເຊຍ 2 ຄົນ ຖືກຈັບກຸມເມື່ອວັນທີ 27 ທັນວາ 2019 ທີ່ຜ່ານມາ ຖານຕ້ອງສົງໄສວ່າ ກຳລັງວາງແຜນ ແລະ ກະກຽມກໍ່ການຮ້າຍທີ່ນະຄອນເຊັນປີເຕີສະເບີກ ຂອງລັດເຊຍ ໃນລະຫວ່າງການສະເຫຼີມສະຫຼອງສົ່ງທ້າຍປີເກົ່າ-ຕ້ອນຮັບປີໃໝ່.

ເຖິງແມ່ນວ່າ ລັດເຊຍ ແລະ ສ.ອາເມຣິກາ ຈະມີຄວາມຂັດແຍ່ງກັນໃນຫຼາຍດ້ານ ແຕ່ທັງສອງປະເທດກໍ່ເນັ້ນຢ້ຳສະເໝີມາ ເຖິງຄວາມຕັ້ງໃຈໃນການຮ່ວມກັນຕໍ່ສູ້ກັບລັດທິກໍ່ການຮ້າຍ.