ສ.ອາເມຣິກາ ສົ່ງທະຫານ 750 ຄົນເຂົ້າອິຣັກ ປ້ອງກັນສະຖານທູດ ທີ່ຖືກກຸ່ມຜູ້ປະທ້ວງຕໍ່ຕ້ານບຸກ

ລາຍງານ 2 ມັງກອນ 2020, ຈາກເຫດການທີ່ປະຊາຊົນອິຣັກຫຼາຍພັນຄົນໂຮມຊຸມນຸມປະທ້ວງໜ້າສະຖານເອກອັກຄະລັດຖະທູດສະຫະລັດ ອາເມຣິກາ ທີ່ຕັ້ງຢູ່ໃນເຂດຄວາມໝັ້ນຄົງສູງ ຫຼື ພື້ນທີ່ສີຂຽວ ໃນນະຄອນຫຼວງແບກແດດ ປະເທດອິຣັກ ແຕ່ວັນອັງຄານ 31 ທັນວາ 2019 ທີ່ຜ່ານມາ ເພື່ອສະແດງຄວາມບໍ່ພໍໃຈຕໍ່ປະຕິບັດການໂຈມຕີທາງອາກາດຂອງ ສ.ອາເມຣິກາ ເມື່ອວັນທີ 29 ທັນວາ 2019 ທີ່ຜ່ານມາ.

ໂດຍ ສ.ອາເມຣິກາ ໄດ້ໂຈມຕີເຂດທີ່ໝັ້ນໃນອິຣັກ ແລະ ຊີຣີຂອງກຸ່ມຄາຕາອິບ ຮິສບອນເລາະ ກອງກຳລັງຕິດອາວຸດຝັກໃຝ່ອີຣານ ເພື່ອຕອບໂຕ້ການທີ່ກຸ່ມຕິດອາວຸດດັ່ງກ່າວລະດົມຍິງຈະຫຼວດໂຈມຕີຖານທັບໃນເມືອງເຄີຄຸກ ທາງທິດເໜືອຂອງນະຄອນຫຼວງແບກແດດ ເຮັດໃຫ້ເຈົ້າໜ້າທີ່ສັນຍາຈ້າງຂອງ ສ.ອາເມຣິກາເສຍຊີວິດ 1 ຄົນ, ທະນານອາເມຣິກາ 4 ຄົນ ແລະ ອິຣັກ 2 ຄົນໄດ້ຮັບບາດເຈັບ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວວ່າ “ອິຣານ ຕ້ອງຊົດໃຊ້ຢ່າງເຖິງທີ່ສຸດ ແລະ ຄຳເວົ້າຂອງນີ້ ບໍ່ແມ່ນຄຳເຕືອນ ແຕ່ເປັນການຂົ່ມຂູ່”.

ເຖິງຢ່າງໃດກໍ່ຕາມ, ຜູ້ນຳ ສ.ອາເມຣິກາບໍ່ໄດ້ກ່າວວ່າມາດຕະການທີ່ວ່ານັ້ນຈະເປັນມາດຕະການທາງທະຫານຫຼືບໍ່, ແຕ່ທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ ສ.ອາເມຣິກາ ກ່າວວ່າໄດ້ລະດົມກຳລັງທະຫານໜ່ວຍຮົບພິເສດປະມານ 750 ຄົນ ສ່ວນໃຫຍ່ມາຈາກຖານທັບ ສ.ອາເມຣິກາໃນກູເວດ ໃຫ້ເລັ່ງດ່ວນເດີນທາງໄປຍັງອິຣັກແລ້ວ ເພື່ອກຽມພ້ອມຮັບມືກັບສະຖານະການຄວາມຮຸນແຮງທີ່ສະຖານທູດ ໃນອິຣັກ, ທີ່ເຮັດໃຫ້ທ່ານ ແມັດທິວ ທຸນເລີ ເອກອັກຄະລັດຖະທູດ ແລະ ນັກການທູດລະດັບສູງອີກຫຼາຍທ່ານຕ້ອງອົບພະຍົບອອກຈາກສະຖານທູດຊົ່ວຄາວ, ຂະນະທີ່ທະຫານອາເມຣິກາໃນພື້ນທີ່ໄດ້ຍິງແກັດນ້ຳຕາສະຫຼາຍກຸ່ມຜູ້ປະທ້ວງ ທີ່ຈູດທຳລາຍລົດ ແລະ ສາມາດທຳລາຍຮົ້ວຊັ້ນນອກຂອງສະຖານເອກອັກຄະລັດຖະທູດ.

ຂະນະທີ່ທ່ານ ອັບບາສ ມູຊາວີ ໂຄສົກກະຊວງການຕ່າງປະເທດອີຣານ ປະຕິເສດຂໍ້ກ່າວຫາຂອງທ່ານ ໂດໂນ ທຣຳ ວ່າລັດຖະບານອີຣານຢູ່ເບື້ອງຫຼັງເຫດການທີ່ສະຖານເອກອັກຄະລັດຖະທູດໃນອິຣັກ ແລະ ເຕືອນໃຫ້ທຳນຽບຂາວທົບທວນນະໂຍບາຍ ທີ່ເປັນການທຳລາຍຕາເວັນອອກກາງ ເພື່ອຫຼີກລ້ຽງການຕອບໂຕ້ຈາກຝ່າຍໃດກໍ່ຕາມໃນພູມມິພາກ.

ເຊິ່ງ ສ.ອາເມຣິກາ ບໍ່ໄດ້ໃຫ້ຂໍ້ມູນເປັນທາງການວ່າ ມີຜູ້ເສຍຊີວິດຈາກການໂຈມຕີທາງອາກາດຄັ້ງນີ້ເທົ່າໃດ ແຕ່ໃນສ່ວນຂອງອິຣັກມີລາຍງານຜູ້ເສຍຊີວິດຢ່າງໜ້ອຍ 25 ຄົນ ແລະ ໄດ້ຮັບບາດເຈັບ 55 ຄົນ ຫຼັງເກີດເຫດທ່ານ ອາເດວ ອັບດຸນ-ມາດີ ນາຍົກລັດຖະມົນຕີອິຣັກ ປະນາມ ສ.ອາເມຣິກາວ່າລະເມີດອະທິປະໄຕ ເພາະເປັນປະຕິບັດການທີ່ລັດຖະບານອິຣັກບໍ່ໄດ້ອະນຸຍາດ ແລະ ກຽມທົບທວນສາຍພົວພັນສອງຝ່າຍ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube