ອີຣານຕອບໂຕ້ ສ.ອາເມຣິກາ ຫຼັງຖືກຫາວ່າຢູ່ເບື້ອງຫຼັງພວກບຸກສະຖານທູດ ສ.ອາເມຣິກາ ຢູ່ອິຣັກ

ລາຍງານ 2 ມັງກອນ 2020, ທ່ານ ຢາຕອນເລາະອາລີ ຄາເມເນອີ ຜູ້ນຳສູງສຸດຂອງອີຣານ ກ່າວເມື່ອວັນພຸດ 1 ມັງກອນ ທີ່ຜ່ານມາ ກ່ຽວກັບການທີ່ລັດຖະບານສະຫະລັດ ອາເມຣິກາ ກ່າວຫາວ່າອີຣານຢູ່ເບື້ອງຫຼັງເຫດກຸ່ມຜູ້ປະທ້ວງຕໍ່ຕ້ານຫຼາຍພັນຄົນ ທີ່ບຸກສະຖານເອກອັກຄະລັດຖະທູດ ສ.ອາເມຣິກາ ປະຈຳນະຄອນຫຼວງແບກແດດ ປະເທດອິຣັກ ເມື່ອວັນທີ 31 ທັນວາ 2019 ທີ່ຜ່ານມາ ເພື່ອສະແດງຄວາມບໍ່ພໍໃຈຕໍ່ການທີ່ກອງທັບ ສ.ອາເມຣິກາ ປະຕິບັດການໂຈມຕີທາງອາກາດຕໍ່ກອງກຳລັງຄາຕາອິບ ຮິສບອນເລາະ ໃນອິຣັກ ເຮັດໃຫ້ມີຜູ້ເສຍຊີວິດຢ່າງໜ້ອຍ 25 ຄົນ ເຊິ່ງລັດຖະບານ ສ.ອາເມຣິກາຢືນຢັນວ່າ ເປັນການຕອບໂຕ້ການທີ່ພົນລະເມືອງອາເມຣິກາຕ້ອງເສຍຊີວິດຈາກການຖືກໂຈມຕີດ້ວຍຈະຫຼວດກອງກຳລັງດັ່ງກ່າວ ວ່າຫາກອີຣານຕັດສິນໃຈປະຈັນໜ້າກັບປະເທດໃດ ຈະກະທຳຢ່າງເປີດເຜີຍເທົ່ານັ້ນ.

ຂະນະທີ່ກະຊວງການຕ່າງປະເທດອີຣານ ໄດ້ເຊີນອຸປະທູດສະວິດ ປະຈຳນະຄອນຫຼວງເຕຫະຣານເຂົ້າພົບ ເພື່ອປະທ້ວງຢ່າງເປັນທາງການ ຕໍ່ຂໍ້ກ່າວຫາຂອງ ສ.ອາເມຣິກາ ວ່າລັດຖະບານອີຣານມີອິດທິພົນເໜືອລັດຖະບານອິຣັກນັ້ນນອກຈາກບໍ່ມີມູນຄວາມຈິງແລ້ວ ຍັງເປັນການລະເມີດກົດບັດສະຫະປະຊາຊາດອີກດ້ວຍ, ເຊິ່ງອີຣານ ແລະ ສ.ອາເມຣິກາບໍ່ມີສາຍພົວພັນການທູດຕໍ່ກັນຕັ້ງແຕ່ປີ 1979 ແລະ ສະວິດເຮັດໜ້າທີ່ເປັນຄົນກາງໃນການຄຸ້ມຄອງຜົນປະໂຫຍດໃຫ້ກັບທັງສອງປະເທດຈົນເຖິງປັດຈຸບັນ.

ເຊິ່ງທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ຕ້ອງການໄຊຊະນະການເລືອກຕັ້ງຢູ່ນຳ ສ.ອາເມຣິກາ ໃນເດືອນພະຈິກ 2020 ນີ້ ເພື່ອຮັກສາຕຳແໜ່ງໃຫ້ຕໍ່ເນື່ອງ 2 ສະໄໝ ກ່າວວ່າລັດຖະບານອີຣານ ຕ້ອງຊົດໃຊ້ຢ່າງເຖິງສຸດທີ່ ກັບຄວາມເສຍຫາຍທັງໝົດທີ່ເກີດຂຶ້ນກັບສະຖານທູດ ສ.ອາເມຣິກາໃນອິຣັກ ເຊິ່ງໄດ້ໂຈະການໃຫ້ບໍລິການຊົ່ວຄາວ ເຖິງແມ່ນວ່າຜູ້ປະທ້ວງໄດ້ສະຫຼາຍຕົວແລ້ວ ແຕ່ຕໍ່ມາໄດ້ຫຼຸດລະດັບຄຳຂູ່ຂອງຕົນເອງລົງ ດ້ວຍການກ່າວວ່າຕົນຕ້ອງການສັນຕິພາບ.

ໃນດ້ານຂອງກະຊວງປ້ອງກັນປະເທດ ສ.ອາເມຣິກາ ໄດ້ເສີມກຳລັງທະຫານໜ່ວຍຮົບພິເສດ 750 ຄົນໃນອິຣັກ ໂດຍເປັນການເຄື່ອນຍ້າຍກຳລັງພົນຈາກກູເວດ, ສ່ວນທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຮຽກຮ້ອງໃຫ້ລັດຖະບານອິຣັກເພີ່ມໃສ່ໃຈການປົກປ້ອງຜົນປະໂຫຍດຂອງ ສ.ອາເມຣິກາ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube