ຫວຽດນາມວ່າ ໄດ້ຊ່ວຍເຫຼືອ ສປປ.ລາວແລ້ວ 3.2 ລ້ານລ້ານດົງ ໃນໄລຍະປີ 2016-2020

ອີງຕາມການລາຍງານຂອງວິທະຍຸກະຈາຍສຽງແຫ່ງຊາດໃຫ້ຮູ້ວ່າ: ໃນວັນທີ 4 ມັງກອນ 2020 ທີ່ນະຄອນຫຼວງຮ່າໂນ້ຍ, ສສ.ຫວຽດນາມ ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ທ່ານ ຫງວຽນ ຊວັນ ຟຸກ ນາຍົກລັດຖະມົນຕີຫວຽດນາມ ໄດ້ຮ່ວມເປັນປະທານກອງປະຊຸມ ຄັ້ງທີ 42 ປະຈຳປີ 2020 ຂອງຄະນະກຳມະການຮ່ວມມືທະວິພາຄີລະຫວ່າງລັດຖະບານແຫ່ງ ສປປ.ລາວ ແລະ ລັດຖະບານ ສສ.ຫວຽດນາມ.

ສຳລັບປີ 2020 ສອງຝ່າຍໄດ້ຕົກລົງເຫັນດີເປັນເອກະພາບ ສືບຕໍ່ຈັດຕັ້ງປະຕິບັດຕາມທິດຊີ້ນຳຂອງສອງກົມການເມືອງ ແລະ ຂໍ້ຕົກລົງວ່າດ້ວຍແຜນການຮ່ວມມືລະຫວ່າງສອງລັດຖະບານໃຫ້ປະກົດຜົນເປັນຈິງ, ໃນນັ້ນເອົາໃຈໃສ່ສືບຕໍ່ເພີ່ມທະວີການພົວພັນດ້ານການເມືອງ, ປ້ອງກັນຊາດ-ປ້ອງກັນຄວາມສະງຫົບ, ຍົກສູງປະສິດທິຜົນຂອງບັນດາກົນໄກການຮ່ວມມື ແລະ ການຈັດຕັ້ງຜັນຂະຫຍາຍເນື້ອໃນຖະແຫຼງການຮ່ວມ ແລະ ບັນດາຂໍ້ຕົກລົງຕ່າງໆໃຫ້ເປັນຮູບປະທຳຍິ່ງຂຶ້ນ, ໂດຍສະເພາະແມ່ນການຜັນຂະຫຍາຍບົດບັນທຶກຄວາມເຂົ້າໃຈ ກ່ຽວກັບການຮ່ວມມືດ້ານຄົມມະນາຄົມ ແລະ ຂົນສົ່ງ, ການຮ່ວມມືພັດທະນາບັນດາໂຄງການໄຟຟ້າຢູ່ລາວ, ເຊື່ອມຕໍ່ລະບົບໄຟຟ້າ ແລະ ການຊື້-ຂາຍໄຟຟ້າ ດັ່ງນີ້ເປັນຕົ້ນ.

ຄຽງຄູ່ກັນນີ້, ສອງຝ່າຍກໍ່ພ້ອມກັນສືບຕໍ່ເພີ່ມທະວີການຮ່ວມມື ແລະ ສ້າງເງື່ອນໄຂເພື່ອເອື້ອອຳນວຍຄວາມສະດວກໃຫ້ແກ່ການຮ່ວມມືດ້ານການຄ້າ, ການລົງທຶນ, ການສຶກສາ ກໍ່ຄືການພັດທະນາຊັບພະຍາກອນມະນຸດສອງປະເທດ ແລະ ການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງບົ່ມຊ້ອນ.

ໃນໂອກາດກອງປະຊຸມຄັ້ງນີ້, ສອງນາຍົກລັດຖະມົນຕີລາວ-ຫວຽດນາມ ໄດ້ຖະແຫຼງຂ່າວຮ່ວມຜົນສຳເລັດ ແລະ ຮ່ວມເປັນສັກຂີພະຍານໃນການລົງນາມເອກະສານຮ່ວມມືເຖິງ 8 ສະບັບໃນນັ້ນມີ: ຂໍ້ຕົກລົງວ່າດ້ວຍການຮ່ວມມືລະຫວ່າງລັດຖະບານ ສປປ.ລາວ ແລະ ສສ.ຫວຽດນາມ, ບົນບັນທຶກກອງປະຊຸມຄະນະກຳມະການຮ່ວມມືດັ່ງກ່າວ, ສົນທິສັນຍາສອງຝ່າຍວ່າດ້ວຍການໂອນຕົວຜູ້ຖືກຕັດສິນລົງໂທດ ແລະ ສັນຍາກ່ຽວກັບການຊື້-ຂາຍໄຟຟ້າຂອງ 5 ໂຄງການ.

ໂດຍອີງຕາມການລາຍງານຂອງລັດຖະບານຫວຽດນາມໃຫ້ຮູ້ວ່າ: ມູນຄ່າການຄ້າສອງຝ່າຍ 10 ເດືອນທຳອິດ 2019 ບັນລຸ 940 ລ້ານໂດລາສະຫະລັດ ແລະ ໝົດປີຄາດວ່າຈະມີມູນຄ່າປະມານ 1.2 ພັນລ້ານໂດລາສະຫະລັດ ເຊິ່ງທັງສອງຝ່າຍໄດ້ຕົກຍົກລະດັບການຄ້າສອງຝ່າຍໃຫ້ເພີ່ມຂຶ້ນ 10%-15% ໃນປີໜ້າ.

ມາຮອດປັດຈຸບັນ, ການລົງທຶຶນຂອງບັນດາວິສາຫະກິດຫວຽດນາມ ຢູ່ ສປປ.ລາວ ມີທັງໝົດ 413 ໂຄງການ ມູນຄ່າການລົງທຶນ 4.2 ພັນລ້ານໂດລາສະຫະລັດ ເຮັດໃຫ້ຫວຽດນາມເປັນຜູ້ລົງທຶນລາຍໃຫຍ່ອັນດັບສາມ ໃນ ສປປ.ລາວ.

ນອກຈາກນີ້, ລັດຖະບານຫວຽດນາມຍັງໄດ້ລະບຸວ່າ: ຫວຽດນາມໄດ້ໃຫ້ການຊ່ວຍເຫຼືອລ້າແກ່ ສປປ.ລາວ ເຖິງ 3.2 ລ້ານລ້ານດົງ (ປະມານກວ່າ 138 ລ້ານໂດລາສະຫະລັດ) ໃນໄລຍະປີ 2016-2020.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube