ອີຣານຊັກທຸງແດງແຫ່ງສົງຄາມຂຶ້ນຍອດສຸເຫຼົ່າສັກສິດ ພ້ອມປະກາດເປົ້າໝາຍ 35 ແຫ່ງໃນຕາເວັນອອກກາງ

ລາຍງານ 5 ມັງກອນ 2020, ທ່ານນາຍພົນ ໂກລາມາລີ ອາບູຮຳເຊ ຜູ້ບັນຊາການລະດັບສູງຂອງກອງທັບປະຕິວັດອີຣານ ປະຈຳແຂວງເຄີມານ ທາງພາກໃຕ້ຂອງປະເທດ ກ່າວເມື່ອວັນເສົາ 4 ມັງກອນ ທີ່ຜ່ານມາ ວ່າຊ່ອງແຄບຮໍມຸສ ທີ່ຕັ້ງຢູ່ທາງພາກໃຕ້ຂອງອີຣານ ລະຫວ່າງອ່າວໂອມານ ກັບ ອ່າວເປີເຊຍ ເປັນພື້ນທີ່ທາງຍຸດທະສາດການທະຫານ ທີ່ ສ.ອາເມຣິກາ ແລະ ພັນທະມິດຕາເວັນຕົກໃຫ້ຄວາມສຳຄັນຫຼາຍ ເຫັນໄດ້ຈາກການທີ່ມີເຮືອຮົບຂອງ ສ.ອາເມຣິກາ ແລະ ຫຼາຍປະເທດໃນຕາເວັນຕົກໄດ້ແລ່ນຜ່ານຢ່າງສະໝ່ຳສະເໝີ.

ເຖິງຢ່າງໃດກໍ່ຕາມ, ຝ່າຍຄວາມໝັ້ນຄົງຂອງອີຣານໄດ້ຕິດຕາມ ແລະ ປະເມີນເປົ້າໝາຍທີ່ຖືເປັນຜົນປະໂຫຍດສຳຄັນຂອງ ສ.ອາເມຣິກາໄວ້ປະມານ 35 ແຫ່ງໃນພູມມິພາກ ລວມມີນະຄອນຫຼວງເທວອາວີບ ຂອງອິດສະຣາແອນ ທີ່ຖືວ່າຢູ່ໃນລັດສະໝີການໂຈມຕີ, ໂດຍການຖະແຫຼງດັ່ງກ່າວຂອງທ່ານນາຍພົນ ໂກລາມາລີ ອາບູຮຳເຊ ເກີດຂຶ້ນໃນເວລາໃກ້ຄຽງກັບທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວວ່າ ສ.ອາເມຣິກາພ້ອມໂຈມຕີເປົ້າໝາຍ 52 ແຫ່ງໃນອີຣານ ຫາກລັດຖະບານອີຣານສ້າງຄວາມເສຍຫາຍໃຫ້ກັບຜົນປະໂຫຍດຂອງອາເມຣິກາໃນຕາເວັນອອກກາງ.

ຂະນະທີ່ອິດສະຣາແອນ ຍັງບໍ່ສະແດງຈຸດຢືນຕໍ່ສະຖານະການຄວາມເຄັ່ງຕຶຶງລະຫວ່າງ ສ.ອາເມຣິກາ ກັບ ອີຣານໃນຄັ້ງນີ້, ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຢືນຢັນວ່າລັດຖະບານ ສ.ອາເມຣິກາ ມີຄວາມພະຍາຍາມຫຼຸດຜ່ອນຄວາມເຄັ່ງຕຶງໃນຕາເວັນອອກກາງ ແລະ ການຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິດເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກ ທີ່ມີຄວາມໃກ້ຊິດກັບອີຣານ ຈະຊ່ວຍຫຼຸດອິດທິພົນຂອງອີຣານໃນພູມມິພາກໄດ້, ສ່ວນທ່ານ ໂຣເບິດ ໂອໄບຣອັນ ທີ່ປຶກສາດ້ານຄວາມໝັ້ນຄົງແຫ່ງຊາດ ສ.ອາເມຣິກາ ປະຈຳທຳນຽບຂາວ ກ່າວວ່າປະຕິບັດການໂຈມຕີດັ່ງກ່າວເປັນໄປຕາມ “ມະຕິອິຣັກ” ຂອງສະພາສູງ ເມື່ອປີ 2002 ແລະ ນັກກົດໝາຍປະຈຳກະຊວງຍຸຕິທຳ ສ.ອາເມຣິກາ ລົງນາມເປັນພະຍານໃຫ້ກັບການໃຊ້ຄຳສັ່ງຂອງທ່ານ ໂດໂນ ທຣຳ.

ນອກຈາກນີ້, ສຳນັກຂ່າວຕ່າງປະເທດໄດ້ເຜີຍແຜ່ວິດີໂອ ທີ່ອີຣານຊັກທຸງແດງຂຶ້ນຢູ່ຍອດສຸເຫຼົ່າສັກສິດຈາມຄາຣານ ເປັນຄັ້ງທຳອິດໃນປະຫວັດສາດ ໂດຍທຸງນີ້ເປັນທຸງສັກສິດເພື່ອສະແດງວ່າອີຣານພ້ອມປະກາດສົງຄາມເຕັມຮູບແບບ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube