ນາຍົກອິຣັກເປີດເຜີຍແລ້ວ ນາຍພົນອີຣານໄປອິຣັກ ເພື່ອສົ່ງສານລັດຖະບານເຖິງຊາອູດິດ

ລາຍງານ 6 ມັງກອນ 2020, ທ່ານ ອາເດວ ອັບດຸນ-ມາດີ ນາຍົກລັດຖະມົນຕີອິຣັກ ກ່າວຕໍ່ກອງປະຊຸມສະພາປະຊາຊົນ ໃນນະຄອນຫຼວງແບກແດດ ເມື່ອວັນອາທິດ 5 ມັງກອນ ທີ່ຜ່ານມາ ກ່ອນຈະມີການລົງມະຕິຄັ້ງສຳຄັນ ວ່າດ້ວຍການໃຫ້ກອງທັບ ສ.ອາເມຣິກາ ແລະ ພັນທະມິດຕາເວັນຕົກທຸກປະເທດຍຸຕິກິດຈະກຳທາງທະຫານ ແລະ ຖອນກຳລັງອອກຈາກອິຣັກ ວ່າຕົນມີກຳນົດພົບປະກັບທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ເມື່ອວັນທີ 3 ມັງກອນ ທີ່ຜ່ານມາ ເພື່ອຮັບຈົດໝາຍຈາກທ່ານ ພົນຕີ ກັສເຊັມ ໂຊໄລມານີ ເຊິ່ງເປັນຄຳຕອບຂອງລັດຖະບານອີຣານ ຕໍ່ສານຂອງອາຣັບບີ ຊາອູດິດ ທີ່ສົ່ງຜ່ານກ່ອນໜ້ານີ້ມາຍັງລັດຖະບານອິຣັກ ເພື່ອປຶກສາຫາລືກ່ຽວກັບການຫາແນວທາງຫຼຸດຜ່ອນສະຖານະການຄວາມເຄັ່ງຕຶງໃນຕາເວັນອອກກາງ.

ເຊິ່ງທ່ານ ອາເດວ ອັບດຸນ-ມາດີ ກ່າວອີກວ່າ ເດີມທີ່ຕົນເຊື່ອໝັ້ນກັບແຜນການດັ່ງກ່າວ ໃນການເປັນຄົນກາງເຈລະຈາຄວາມຂັດແຍ່ງລະຫວ່າງອາຣັບບີ ຊາອູດິດ ກັບ ອີຣານ ພາຍຫຼັງທີ່ໄດ້ຢ້ຽມຢາມນະຄອນຫຼວງຣິຢາດ ເມື່ອເດືອນກັນຍາ ປີທີ່ຜ່ານມາ, ເຖິງຢ່າງໃດກໍ່ຕາມ ທ່ານ ພົນຕີ ກັສເຊັມ ໂຊໄລມານີເສຍຊີວິດກ່ອນຈາກການໂຈມຕີທາງອາກາດໂດຍກອງທັບ ສ.ອາເມຣິກາ ທີ່ສະໜາມບິນສາກົນນະຄອນຫຼວງແບກແດດ ພ້ອມກັບທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກທີ່ມີຄວາມໃກ້ຊິດກັບອີຣານ.

ນອກຈາກນີ້, ຜູ້ນຳອິຣັກຍັງກ່າວອີກວ່າ ລັດຖະບານ ສ.ອາເມຣິກາ ເປີດເຜີຍກັບລັດຖະບານອິຣັກ ວ່າອິດສະຣາແອນຢູ່ເບື້ອງຫຼັງການໂຈມຕີຫຼາຍຄັ້ງໃນປະເທດ ລວມເຖິງການຖິ້ມລະເບີດໃສ່ຄັງແສງຂອງກອງກຳລັງຮັສ ເມື່ອລະດູຮ້ອນປີທີ່ຜ່ານມາ, ເຖິງຢ່າງໃດກໍ່ຕາມ, ນາຍົກລັດຖະມົນຕີອິຣັກບໍ່ໄດ້ກ່າວຢ່າງຊັດເຈນວ່າ ສ.ອາເມຣິກາແຈ້ງເລື່ອງນີ້ເມື່ອໃດ, ຂະນະທີ່ລັດຖະບານ ສ.ອາເມຣິກາ ແລະ ອິດສະຣາແອນຍັງບໍ່ສະແດງຈຸດຢືນຕໍ່ຄຳກ່າວຂອງຜູ້ນຳອິຣັກ, ສ່ວນສຳນັກຂ່າວແຫ່ງຊາດຂອງອາຣັບບີ ຊາອູດິດລາຍງານໂດຍແຫ່ງຂ່າວໃນກະຊວງການຕ່າງປະເທດວ່າ ລັດຖະບານອາຣັບບີ ຊາອູດິດບໍ່ຮັບຮູ້ມາກ່ອນກ່ຽວກັບແຜນການຂອງ ສ.ອາເມຣິກາ ໃນການລອບຂ້າທ່ານ ພົນຕີ ກັສເຊັມ ໂຊໄລມານີ.