ປ.ປູຕິນ ປາກົດຕົວທີ່ຊີຣີ ທ່າມກາງຄວາມເຄັ່ງຕຶງສຸດຂີດ ໃນຕາເວັນອອກກາງ

ລາຍງານ 8 ມັງກອນ 2020, ທ່ານ ວະລາດິເມຍ ປູຕິນ ປະທານປະເທດລັດເຊຍ ແລະ ທ່ານ ພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ເດີນທາງຢ້ຽມຢາມນະຄອນຫຼວງດາມັດສະກັດ ປະເທດຊີຣີ ເມື່ອວັນອັງຄານ 7 ມັງກອນ ທີ່ຜ່ານມາ ຖືເປັນການຢ້ຽມຢາມນະຄອນຫຼວງຂອງຊີຣີເປັນຄັ້ງທຳອິດຂອງທ່ານ ປູຕິນ ນັບຕັ້ງແຕ່ສົງຄາມກາງເມືອງໃນຊີຣີ ທີ່ກໍ່ຕົວມາຕັ້ງແຕ່ເດືອນມີນາ 2011 ແລະ ເປັນຄັ້ງທີ 2 ນັບຕັ້ງແຕ່ທະຫານລັດເຊຍຍົກທັບເຂົ້າສູ່ຊີຣີ ເພື່ອປະຕິບັດພາລະກິດຊ່ວຍເຫຼືອກອງທັບຝ່າຍລັດຖະບານຊີຣີ ພາຍໃຕ້ການນຳຂອງທ່ານປະທານປະເທດ ບາຊາ ອັນ-ອັສຊາດ ເພື່ອທວງຄືນພື້ນທີ່ຈາກກອງກຳລັງຝ່າຍກະບົດ ແລະ ກຸ່ມ IS, ໂດຍທ່ານ ປູຕິນ ເຄີຍຢ້ຽມຢາມຊີຣີເມື່ອເດືອນທັນວາ 2017 ເຊິ່ງເປັນການຢ້ຽມຢາມຖານທັບຮະໄມມິມ ແຄມຝັ່ງທະເລເມດິເຕີເຣນຽນ, ສ່ວນທ່ານ ບາຊາ ອັນ-ອັສຊາດ ໄດ້ຢ້ຽມຢາມລັດເຊຍແລ້ວ 3 ຄັ້ງ ຄືເດືອນຕຸລາ 2015, ພະຈິກ 2017 ແລະ ພຶດສະພາ 2018.

ໃນດ້ານຂອງທຳນຽບປະທານປະເທດລັດເຊຍອອກຖະແຫຼງການວ່າ ທ່ານ ປູຕິນໄດ້ສົນທະນາກັບທ່ານ ບາຊາ ອັນ-ອັສຊາດກ່ຽວກັບຄວາມເຊື່ອໝັ້ນ ໃນການຟື້ນຟູຄວາມເປັນລັດເອກະລາດໃຫ້ກັບຄືນສູ່ຊີຣີຢ່າງສົມບູນ ກໍ່ຄືການຮັກສາຜືນແຜ່ນດິນອັນຄົບຖ້ວນຂອງຊີຣີ, ນອກຈາກນີ້ ຜູ້ນຳຊີຣີຍັງໄດ້ນຳພາຜູ້ນຳລັດເຊຍໄດ້ຢ້ຽມຢາມສູນບັນຊາການທາງທະຫານຂອງລັດເຊຍ ທີ່ຕັ້ງຢູ່ໃນນະຄອນຫຼວງດາມັດສະກັດ ແລະ ຢ້ຽມຊົມເຂດເມືອງເກົ່າຂອງນະຄອນຫຼວງດາມັດສະກັດ, ພາຍຫຼັງສຳເລັດພາລະກິດໃນຊີຣີ ທ່ານ ປູຕິນ ມີກຳນົດຢ້ຽມຢາມຕວັກກີເປັນຈຸດໝາຍປາຍທາງຕໍ່ໄປ.

ເຖິງແມ່ນວ່າທ່ານ ປູຕິນ ຍັງບໍ່ໄດ້ສະແດງຄວາມຄິດເຫັນຢ່າງເປີດເຜີຍຕໍ່ສະຖານະການຄວາມເຄັ່ງຕຶງໃນຕາເວັນອອກກາງ ທີ່ມີສູນກາງຂອງຄວາມຂັດແຍ່ງຄື ສ.ອາເມຣິກາ ກັບ ອີຣານ ແລະ ມີທິດທາງລຸກລາມອອກໄປອີກຫຼາຍປະເທດໃນພູມມິພາກ, ໂດຍອິຣັກຖືກຕິດຕາມເປັນພິເສດ ເນື່ອງຈາກ ສ.ອາເມຣິກາໄດ້ໂຈມຕີທາງອາກາດໃນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງພາຍຫຼັງເກີດເຫດລັດຖະບານອີຣານປະກາດໃຫ້ ສ.ອາເມຣິກາກຽມຮັບມືກັບການລ້າງແຄ້ນຢ່າງເຖິງທີ່ສຸດ ທຸກຝ່າຍເຊື່ອວ່າການປາກົດຕົວຂອງທ່ານ ປູຕິນ ໃນຕາເວັນອອກກາງຕອນນີ້ ມີຄວາມໝາຍຄວາມສຳຄັນແອບແຝງຈາກລັດເຊຍ ທີ່ເປັນພັນທະມິດທາງທະຫານທີ່ສຳຄັນຂອງອີຣານ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube