ອີຣານຂາບຂູ່ຈະຕີອິດສະຣາແອນ ແລະ ດູໄບ ຫາກ ສ.ອາເມຣິກາ ໂຕ້ຕອບການຕີຖານທັບທີ່ອິຣັກ

ລາຍງານ 8 ມັງກອນ 2020, ກອງກຳລັງປະຕິວັດອີຣານ ອອກຖະແຫຼງການວ່າ ຫາກກອງທັບ ສ.ອາເມຣິກາ ປະຕິບັດການທາງທະຫານຕອບໂຕ້ການທີ່ຖານທັບຂອງ ສ.ອາເມຣິກາ 2 ແຫ່ງໃນແຂວງອັນບາ ແລະ ເມືອງເອີບິວ ເຊິ່ງເປັນເມືອງເອກຂອງເຂດປົກຄອງຕົນເອງເຄີດິດສະຖານ ໃນອິຣັກ ຖືກກອງທັບປະຕິວັດອີຣານໂຈມຕີ ຂອບເຂດຂອງການໂຈມຕີດ້ວຍຈະຫຼວດຈະຂະຫຍາຍໄປເຖິງພັນທະມິດຂອງ ສ.ອາເມຣິກາ ໃນພູມມິພາກ ລວມໄປເຖິງເມືອງໄຮຟາ ຂອງອິດສະຣາແອນ ແລະ ນະຄອນດູໄບ ຂອງສະຫະນະຄອນ ເອເມຣັດ ອາຣັບ (UAE).

ຂະນະທີ່ກຸ່ມຮິສບອນເລາະ ທີ່ມີຖານປະຕິບັດການຢູ່ໃນລີບັງ ອອກຖະແຫຼງການປະກາດກຽມປະຕິບັດການຕໍ່ຂະບວນການໄຊອໍນິສ ເຊິ່ງໝາຍເຖິງອິດສະຣາແອນ ຫາກ ສ.ອາເມຣິກາໂຈມຕີທາງທະຫານໃນອີຣານ ແລະ ກອງກຳລັງຮັສທີ່ເປັນເຄືອຂ່າຍນັກຮົບຊີອະໃນອິຣັກທີ່ມີຄວາມໃກ້ຊິດກັບອີຣານ ສະແດງຄວາມພ້ອມໂຈມຕີຖານທັບ ສ.ອາເມຣິກາໃນອິຣັກເຊັ່ນກັນ.

ໃນດ້ານຂອງອິດສະຣາແອນຍັງບໍ່ສະແດງຈຸດຢືນຢ່າງເປີດເຜີຍຕໍ່ຄຳຂູ່ດັ່ງກ່າວ ແຕ່ສື່ທ້ອງຖິ່ນຫຼາຍແຫ່ງລາຍງານວ່າ ກອງກຳລັງປ້ອງກັນອິດສະຣາແອນ ຢູ່ໃນສະຖານະພ້ອມລະດັບສູງສຸດ ເຊິ່ງອິດສະຣາແອນກັບກຸ່ມຮິສບອນເລາະເຄີຍເຮັດສົງຄາມໃຫຍ່ກັນແລ້ວຄັ້ງໜຶຶ່ງ ເມື່ອປີ 2006.

ເຊິ່ງສະຖານະການໃນຕາເວັນອອກກາງເຄັ່ງຕຶງຂຶ້ນສຸດຂີດໃນຮອບຫຼາຍທົດສະວັດ ນັບຕັ້ງແຕ່ກອງທັບ ສ.ອາເມຣິກາ ໂຈມຕີທາງອາກາດໃນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ພາຍຫຼັງເກີດເຫດອີຣານປະກາດຈະລ້າງແຄ້ນຢ່າງເຖິງທີ່ສຸດ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube