ສ.ອາເມຣິກາ ອະນຸມັດຂາຍ F-35 ຈຳນວນ 12 ລຳ ໃຫ້ສິງກະໂປ

ລາຍງານ 10 ມັງກອນ 2020, ເມື່ອປີທີ່ຜ່ານມາສິງກະໂປມີແຜນທີ່ຈະຊື້ຍົນຂັບໄລ່ 4 ລຳ ແລະ ມີແຜນຈະຊື້ເພີ່ມອີກ 8 ລຳ ໂດຍພິຈາລະນາຈາກຍົນຂັບໄລ່ຂອງບໍລິສັດ ລັອກຮີດມາຕິນ ຂອງ ສ.ອາເມຣິກາ ເມື່ອທຽບກັບບໍລິສັດຜູ້ຜະລິດຍົນອື່ນໆຈາກເອີຣົບ ແລະ ຈີນ, ເຖິງແມ່ນວ່າສິງກະໂປຈະເປັນປະເທດທີ່ນ້ອຍຫຼາຍ ແຕ່ກໍ່ເປັນໜຶ່ງໃນປະເທດທີ່ກອງກຳລັງຕິດອາວຸດທີ່ນຳສະໄໝທີ່ສຸດ ແລະ ໃຊ້ງົບປະມານມະຫາສານໃນດ້ານປ້ອງກັນປະເທດ.

ຫຼ້າສຸດກະຊວງການຕ່າງປະເທດ ສ.ອາເມຣິກາ ອອກຖະແຫຼງວ່າ ສ.ອາເມຣິກາໄດ້ອະນຸມັດໃຫ້ຂາຍຍົນຂັບໄລ່ F-35 ໜຶ່ງໃນຍົນຂັບໄລ່ທີ່ທັນສະໄໝທີ່ສຸດໃນໂລກ ຈຳນວນ 12 ລຳ, ມູນຄ່າ 2,750 ລ້ານໂດລາສະຫະລັດ ໃຫ້ກັບສິງກະໂປ ແລະ ສຳນັກງານການຮ່ວມມືດ້ານປ້ອງກັນປະເທດຂອງ ສ.ອາເມຣິກາ ແຈ້ງວ່າ ລັດຖະສະພາ ສ.ອາເມຣິກາຮັບຊາບເລື່ອງການອະນຸມັດຂາຍຍົນຂັບໄລ່ແລ້ວ ແລະ ຈະຕ້ອງໄດ້ລົງມະຕິໃນຂັ້ນຕໍ່ໄປ, ເຊິ່ງສິງກະໂປຖືເປັນປະເທດຍຸດທະສາດ ແລະ ພັນທະມິດດ້ານຄວາມໝັ້ນຄົງຂອງ ສ.ອາເມຣິກາ ແລະ ໃຫ້ຄວາມສຳຄັນກັບສະຖຽນລະພາບທາງການເມືອງ ແລະ ຄວາມກ້າວໜ້າທາງເສດຖະກິດໃນພູມມິພາກອາຊີ-ປາຊີຟິກ ເຊິ່ງຂໍ້ຕົກລົງຊື້-ຂາຍອາວຸດຄັ້ງນີ້ຈະບໍ່ປ່ຽນແປງດຸນອຳນາດທາງທະຫານໃນພາກພື້ນ.

ສິງກະໂປໄດ້ໃຊ້ເວລາຫຼາຍປີໃນການສຶກສາ ເພື່ອປະເມີນຄວາມສາມາດຂອງຍົນຂັບໄລ່ ເພື່ອມາທົດແທນຍົນຂັບໄລ່ F-16 ທີ່ກຳລັງຈະປົດປະຈຳການ ໂດຍເລືອກຍົນຂັບໄລ່ F-35 ມີຄວາມໄວເໜືອສຽງ, ເຕັກໂນໂລຊີລ່ອງຫົນເຮັດໃຫ້ນັກບິນສາມາດຫຼົບຫຼີກການກວດຈັບຂອງຣາດາ ຕາມລາຍງານຂອງບໍລິສັດຜູ້ຜະລິດ.

HTML tutorial