ຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ຍັງມີຈຳນວນເພີ່ມຂຶ້ນ ແລະ ແຜ່ອອກໄປ 23 ປະເທດແລ້ວ

ລາຍງານ 2 ກຸມພາ 2020, ຄະນະກຳມາທິການສາທາລະນະສຸກແຫ່ງ ສປ.ຈີນ ລາຍງານສະຖານະການຂອງເຊື້ອຈຸລະໂລກໂຄໂຣນາສາຍພັນໃໝ່ ທີ່ແຜ່ລະບາດໃນປະເທດມາຕັ້ງແຕ່ເດືອນທັນວາ ປີທີ່ຜ່ານມາ ຈົນເຖິງວັນທີ 1 ກຸມພາ 2020 ທີ່ຜ່ານມາ ວ່າມີຈຳນວນຜູ້ເສຍຊີວິດເພີ່ມເປັນ 304 ຄົນ ແລະ ຜູ້ຕິດເຊື້ອສະສົມທົ່ວປະເທດເພີ່ມຂຶ້ນເປັນ 14,380 ຄົນ.

ເຖິງຢ່າງໃດກໍ່ຕາມ, ມີຜູ້ໄດ້ຮັບການປິ່ນປົວຈົນຊ່ວງເຊົາ ແລະ ອອກຈາກໂຮງໝໍໄດ້ແລ້ວ 328 ຄົນ, ຂະນະດຽວກັນ ເຈົ້າໜ້າທີ່ສາທາລະນະສຸກທົ່ວປະເທດກຳລັງກວດສອບກໍລະນີຕ້ອງສົງໄສອີກຢ່າງໜ້ອຍ 19,544 ກໍລະນີ, ໂດຍພື້ນທີ່ວິກິດທີ່ສຸດຍັງເປັນມົນທົນຫູເປີຍ ທາງພາກກາງຂອງປະເທດ ທີ່ມີເມືອງເອກຄືເມືອງອູຫັ້ນ ແລະ ທຸກຝ່າຍເຊື້ອວ່າຕະຫຼາດຂາຍສົ່ງອາຫານທະເລປະຈຳເມືອງຄືແຫຼ່ງກຳເນີດເຊື້ອ ແລະ ເປັນສູນກາງການແຜ່ລະບາດຂອງໂລກ.

ສ່ວນສະຖານະການຕິດເຊື້ອໃນຕ່າງປະເທດ ນອກເໜືອຈາກຮົງກົງ, ມາເກົ້າ ແລະ ໄຕ້ຫວັນ ຍັງໄດ້ແຜ່ລະບາດອອກໄປອີກ 23 ປະເທດໄດ້ແກ່: ໄທ, ຍີ່ປຸ່ນ, ເກົາຫຼີໃຕ້, ອົດສະຕຣາລີ, ມາເລເຊຍ, ເຢຍລະມັນ, ສ.ອາເມຣິກາ, ຝຣັ່ງ, ຫວຽດນາມ, ການາດາ, ສະຫະນະຄອນ ເອເມຣັດ ອາຣັບ, ອິຕາລີ, ລັດເຊຍ, ອັງກິດ, ກຳປູເຈຍ, ແຟັງລັງ, ອິນເດຍ, ເນປານ, ຟິລິບປິນ, ແອັດສະປາຍ, ສີລັງກາ ແລະ ຊູແອດ ເຊິ່ງກໍ່ມີຫຼາຍປະເທດທີ່ພົບຜູ້ຕິດເຊື້ອເພີ່ມຂຶ້ນ.

ໃນດ້ານຂອງອົງການອະນາໄມໂລກ (WHO) ໄດ້ອອກຖະແຫຼງໃນອາທິດນີ້ວ່າ ໄດ້ມີຜູ້ເສຍຊີວິດຈາກເຊື້ອຈຸລະໂລກໂຄໂຣນາສາຍພັນໃໝ່ນອກແຜ່ນດິນ ສປ.ຈີນ ເປັນຄົນທຳອິດ ເມື່ອວັນທີ 1 ກຸມພາ ທີ່ຜ່ານມາ, ເຊິ່ງເປັນຊາຍຊາວຈີນຈາກເມືອງອູຫັ້ນ ທີ່ເດີນທາງໄປຍັງປະເທດຟິລິບປິນ.

ນອກຈາກນີ້, ອົງການອະນາໄມໂລກ (WHO) ປະກາດເມື່ອວັນທີ 30 ມັງກອນ ທີ່ຜ່ານມາ ໃຫ້ສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ຈາກເມືອງອູຫັ້ນ ເປັນພາວະສຸກເສີນດ້ານສາທາລະນະສຸກລະຫວ່າງປະເທດ, ໃນດ້ານຂອງລັດຖະບານຈີນກໍ່ໄດ້ບັງຄັບໃຊ້ມາດຕະການຄວບຄຸມໂລກຂັ້ນເດັດຂາດ ຕັ້ງແຕ່ທ້າຍເດືອນທີ່ຜ່ານມາ ດ້ວຍການໂຈະບໍ່ໃຫ້ເຄື່ອນໄຫວລະບົບຂົນສົ່ງສາທາລະນະເກືອບທັງໝົດໃນມົນທົນຫູເປີຍ ແລະ ຈຳກັດການເດີນທາງຂອງພົນລະເມືອງທົ່ວປະເທດທີ່ມີຫຼາຍກວ່າ 1,400 ລ້ານຄົນ.