ຜົນການຄົ້ນຄວ້າໃໝ່ຂອງນັກວິທະຍາສາດລະບຸວ່າ ໂຕລິ່ນອາດເປັນຕົວກາງນຳໂລກໂຄໂຣນາສາຍພັນໃໝ່ສູ່ຄົນ

ລາຍງານ 8 ກຸມພາ 2020, ນັກວິທະຍາສາດໄດ້ຕັ້ງຂໍ້ສັງເກດກ່ຽວກັບເຊື້ອຈຸລະໂລກໂຄໂຣນາສາຍພັນໃໝ່ 2019 ທີ່ເຮັດໃຫ້ມີຜູ້ເສຍຊີວິດແລ້ວ 722 ຄົນ, ມີຜູ້ຕິດເຊື້ອ 34,546 ຄົນ ແລະ ຍັງແຜ່ລະບາດໄປແລ້ວ 24 ປະເທດທົ່ວໂລກ ໂດຍແຜ່ຈາກສັດສູ່ຄົນທີ່ຕະຫຼາດແຫ່ງໜຶ່ງໃນເມືອງອູຫັ້ນ ມົນທົນຫູເປີຍ ທາງພາກກາງຂອງ ສປ.ຈີນ ເມື່ອທ້າຍປີທີ່ຜ່ານມາ ແລະ ໄດ້ກາຍພັນເປັນການແຜ່ຈາກຄົນສູ່ຄົນ.

ນັກວິທະຍາສາດຈາກມະຫາວິທະຍາໄລກະເສດສາດຈີນໃຕ້ລະບຸວ່າ ໂຕລິ່ນອາດເປັນພາຫະຕົວກາງໃນການແຜ່ເຊື້ອ, ເຊິ່ງເຊື້ອຈຸລະໂລກໂຄໂຣນາສາຍພັນໃໝ່ 2019 ນັ້ນມີຕົ້ນຕໍມາຈາກເຈຍ.

ສຳນັກຂ່າວຊິນຫົວຂອງທາງການຈີນລາຍງານວ່າ ພາຍຫຼັງທີ່ນັກວິທະຍາສາດໄດ້ທົດສອບຕົວຢ່າງກວ່າ 1,000 ຕົວຢ່າງຂອງສັດປ່າ, ນັກວິທະຍາສາດຂອງມະຫາວິທະຍາໄລກະເສດສາດຈີນໃຕ້ ພົບວ່າລຳດັບພັນທຸກຳຂອງເຊື້ອຈຸລະໂລກໃນໂຕລິ່ນເຖິງ 99% ຢູ່ໃນເຊື້ອຈຸລະໂລກຂອງຜູ້ຕິດເຊື້ອ.

ເຊິ່ງລິ່ນຖືເປັນສັດປ່າທີ່ມີການລັກລອບຄ້າຂາຍຫຼາຍທີ່ສຸດກວ່າ 1 ລ້ານໂຕແລ້ວທີ່ຖືກຈັບໃນປ່າອາຟຣິກາ ແລະ ອາຊີຕະຫຼອດໄລຍະ 10 ປີຜ່ານມາ ເພື່ອສົ່ງອອກມາຍັງປະເທດຈີນ ແລະ ຫວຽດນາມ ເພາະເກັດຂອງມັນສາມາດນຳມາສະກັດເປັນຢາພື້ນເມືອງຈີນ, ເຖິງຊີ້ນຂອງລິ່ນຈະບໍ່ມີຄຸນຄ່າໃນທາງການແພດກໍ່ຕາມ ແຕ່ລິ່ນກໍ່ຖືກນຳມາບໍລິໂພກເປັນອາຫານ, ລັກລອບຄ້າຂາຍກັນໃນຕະຫຼາດມືດ.

HTML tutorial