ລັດຖະມົນຕີສາທາລະນະສຸກຢືນຢັນວ່າ ສປປ.ລາວ ຍັງບໍ່ມີຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່

ລາຍງານ 9 ກຸມພາ 2020, ອີງຕາມການລາຍງານຂອງສຳນັກຂ່າວສານປະເທດລາວ ແລະ ວິທະຍຸກະຈາຍສຽງແຫ່ງຊາດໃຫ້ຮູ້ວ່າ: ທ່ານ ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ຖະແຫຼງຕໍ່ສື່ມວນຊົນໂດຍຢືນຢັນວ່າ ປັດຈຸບັນ ສປປ.ລາວ ຍັງບໍ່ມີຜູ້ຕິດເຊື້ອພະຍາດປອດອັກເສບຈາກເຊື້ອຈຸລະໂລກໂຄໂຣນາສາຍພັນໃໝ່.

ລັດຖະມົນຕີກະຊວງສາທາລະນະສຸກຢັ້ງຢືນຕື່ມວ່າ: ລາວມີການລາຍງານກໍລະນີສົງໄສທັງໝົດ 19 ກໍລະນີ ແຕ່ຜ່ານການວິເຄາະແລ້ວ ບໍ່ພົບເຊື້ອຈຸລະໂລກໂຄໂຣນາສາຍພັນໃໝ່ ຫຼື ຜົນກວດອອກມາເປັນລົບທັງໝົດ (ບໍ່ມີເຊື້ອ), ສຳລັບການຕິດຕາມກໍລະນີສຳຜັດໃກ້ຊິດຄົນເຈັບທີ່ຖືກຢັ້ງຢືນວ່າຕິດເຊື້ອຈຸລະໂລກໂຄໂຣນາສານພັນໃໝ່ທີ່ເຂົ້າມາທ່ຽວລາວ ແລ້ວກັບຄືນເມືອກວດພົບຢູ່ຈີນນັ້ນ ໄດ້ມີການຕິດຕາມຢ່າງໃກ້ຊິດທັງບຸກຄົນທີ່ເຮັດວຽກໃນການບໍລິການກຸ່ມທ່ອງທ່ຽວ, ພະນັກງານຂັບລົດ, ຜູ້ບໍລິການໃນໂຮງແຮມ, ຮ້ານອາຫານ, ສະຖານທີ່ທ່ຽວທ່ຽວ ທຸກຄົນທີ່ມີການສຳຜັດຢູ່ແຂວງຫຼວງພະບາງຈຳນວນ 86 ຄົນ, ແຂວງຫຼວງນ້ຳທາ ແລະ ອຸດົມໄຊເຫັນວ່າທັງໝົດມີສຸຂະພາບແຂງແຮງດີ.

ທ່ານ ດຣ. ບຸນກອງ ສີຫາວົງ ຍັງກ່າວອີກວ່າ ຕໍ່ກັບກໍລະນີທີ່ມີຂ່າວທາງສື່ອອນລາຍ ວ່າແຂວງຜົ້ງສາລີມີກໍລະນີສົງໄສຕິດເຊື້ອຈຸລະໂລກໂຄໂຣນາສາຍພັນໃໝ່ຈຳນວນ 27 ຄົນ ແລະ ມີຜູ້ເສຍຊີວິດ 3 ຄົນທາງສູນວິເຄາະ ແລະ ລະບາດວິທະຍາ, ກະຊວງສາທາລະນະສຸກໄດ້ມີການປະຊຸມດ່ວນທາງໂທລະສັບ ເພື່ອສອບສວນຄືນກ່ຽວກັບສະພາບດັ່ງກ່າວ ພົບວ່າໃນຈຳນວນ 27 ຄົນແມ່ນເປັນອາການຂອງໄຂ້ຫວັດໃຫຍ່ ແລະ 3 ຄົນທີ່ເສຍຊີວິດແມ່ນຍ້ອນພະຍາດຂອງຜູ້ກ່ຽວເອງ.

ພ້ອມນີ້ທ່ານ ດຣ. ບຸນກອງ ສີຫາວົງ ຍັງໄດ້ເນັ້ນໝັກວ່າກະຊວງສາທາລະນະສຸກໄດ້ເຮັດວຽກຮ່ວມກັບອົງການອະນາໄມໂລກ ແລະ ອົງການຈັດຕັ້ງສາກົນທີກ່ຽວຂ້ອງກັບການລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ ຜົນການກວດແຕ່ລະຄັ້ງລ້ວນແຕ່ມີປະສິດທິພາບ ຜ່ານເຄື່ອງວິເຄາະຂໍ້ມູນທີ່ໄດ້ມາດຕະຖານ ແລະ ສາມາດຮັບປະກັນໄດ້ຢ່າງແນ່ນອນ, ສະນັ້ນ, ຈຶ່ງໝັ້ນໃຈໄດ້ວ່າ ປັດຈຸບັນຍັງບໍ່ມີລາຍງານການຕິດເຊື້ອຈຸລະໂລກໂຄໂຣນາສາຍພັນໃໝ່, ເຖິງຢ່າງໃດກໍ່ຕາມລັດຖະບານ ໄດ້ສືບຕໍ່ກຽມຄວາມພ້ອມ ເພື່ອຮັບມືກັບພະຍາດນີ້ຢ່າງເຂັ້ມງວດ ເພື່ອປ້ອງກັນບໍ່ໃຫ້ມີກໍລະນີການຕິດເຊື້ອໃນລາວ ແລະ ຖ້າຫາກພົບຄົນຕິດເຊື້ອຈະພະຍາຍາມຈຳກັດການລະບາດຢ່າງທັນການ.

ໃນດ້ານຂອງຄະນະກຳມາທິການສາທາລະນະສຸກແຫ່ງ ສປ.ຈີນ ໄດ້ລາຍງານສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ຈົນເຖິງວັນທີ 8 ກຸມພາ ທີ່ຜ່ານມາ ວ່າມີຈຳນວນຜູ້ເສຍຊີວິດແລ້ວ 811 ຄົນ (ສະເພາະໃນ ສປ.ຈີນ) ແລະ ມີຜູ້ຕິດເຊື້ອສະສົມ 37,198 ຄົນ, ປິ່ນປົວຊ່ວງເຊົາ 2,649 ຄົນ ແລະ ກຳລັງກວດກໍລະນີສົງໄສອີກກວ່າ 28,942 ຄົນ.

ໃນອີກດ້ານໜຶ່ງ ສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ ນອກເໜືອຈາກຮົງກົງ, ມາເກົ້າ ແລະ ໄຕ້ຫວັນ ໄດ້ລະບາດໄດ້ແລ້ວ 24 ປະເທດໄດ້ແກ່: ໄທ, ຍີ່ປຸ່ນ, ສິງກະໂປ, ເກົາຫຼີໃຕ້, ອົດສະຕຣາລີ, ມາເລເຊຍ, ເຢຍລະມັນ, ສ.ອາເມຣິກາ, ຝຣັ່ງ, ຫວຽດນາມ, ການາດາ, ສະຫະນະຄອນ ເອເມຣັດ ອາຣັບ, ອິຕາລີ, ລັດເຊຍ, ອັງກິດ, ກຳປູເຈຍ, ແຟງລັງ, ອິນເດຍ, ເນປານ, ຟິລິບປິນ, ແອັດສະປາຍ, ສີລັງກາ, ຊູແອດ ແລະ ແບນຊິກ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube