ຄະນະສະເພາະກິດຕ້ານໂຄວິດ-19 ຊີ້ແຈ້ງກ່ຽວກັບກໍລະນີທີ 14 ທີ່ມີເຊື້ອຄືນ ເພື່ອໃຫ້ສັງຄົມເຂົ້າໃຈ

ລາຍງານ 3 ພຶດສະພາ 2020, ອີງຕາມການຖະແຫຼງຂ່າວຂອງທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ປະຈຳວັນອາທິດນີ້ໃຫ້ຮູ້ວ່າ: ໃນວັນທີ 2 ພຶດສະພາ ທີ່ຜ່ານມາໄດ້ມີການເກັບກຳຕົວຢ່າງມາກວດຫາເຊື້ອໂຄວິດ-19 ທັງໝົດ 19 ຄົນ ໃນນັ້ນປະກອບມີ: ຜູ້ໃກ້ຊິດກັບກໍລະນີທີ 14 ທີ່ປິ່ນປົວດີແລ້ວແຕ່ກັບມາມີເຊື້ອຄືນຈຳນວນ 4 ຄົນ, ແຮງງານທີ່ກັບມາຈາກປະເທດໄທຈຳນວນ 15 ຄົນ ເຊິ່ງທັງໝົດຜົນກວດອອກມາເປັນລົບ “ບໍ່ມີເຊື້ອ”.

ຖືເປັນມື້ທີ 21 ແລ້ວ ທີ່ບໍ່ຄົບຜູ້ຕິດເຊື້ອລາຍໃໝ່ໃນ ສປປ.ລາວ, ໂດຍນັບແຕ່ເດືອນມັງກອນ ເຖິງ 2 ພຶດສະພາ 2020 ໄດ້ເກັບກຳຕົວຢ່າງມາກວດແລ້ວ 2,184 ຕົວ, ພົບຜູ້ຕິດເຊື້ອ 19 ຄົນ, ປົວດີແລ້ວ 9 ຄົນ ແລະ ຍັງປິ່ນປົວຢູ່ໂຮງໝໍ 10 ຄົນ.

ທ່ານ ຮສ. ດຣ. ພູທອນ ເມືອງປາກ ຊີ້ແຈ້ງຕື່ມຕໍ່ກັບກໍລະນີທີ 14 ທີ່ກັບມາມີເຊື້ອຄືນໃໝ່ນັ້ນ ບໍ່ໄດ້ໝາຍວ່າຜູ້ກ່ຽວກັບຕິດເຊື້ອໃໝ່ ເຊິ່ງເປັນບັນຫາທີ່ນັກວິທະຍາສາດໃນທົ່ວໂລກກຳລັງຄົ້ນຄວ້າກັນຢູ່ ແລະ ກໍ່ມີຫຼາຍປະເທດທີ່ພົບກໍລະນີແບບນີ້ຄືກັນເຊັ່ນ: ສປ.ຈີນ, ເກົາຫຼີໃຕ້, ຍີ່ປຸ່ນ, ຫວຽດນາມ, ບຣູໄນ ເຊິ່ງຈະໄດ້ມີການນຳເອົາເຊື້ອມາປູກໃນຫ້ອງທົດລອງ ຫາກເຊື້ອທີ່ເປັນ (ຍັງບໍ່ຕາຍ) ມັນຈະເກີດຂຶ້ນໃນຫ້ອງທົດລອງຄືກັບດັ່ງເຮົາປູກຕົ້ນໄມ້ ຫາກປູກແລ້ວເຊື້ອບໍ່ເກີດ ນັ້ນໝາຍຄວາມວ່າເຊື້ອນັ້ນຕາຍແລ້ວ ແຕ່ຍັງມີເສດຊິ້ນສ່ວນຂອງເຊື້ອໃນຮ່າງກາຍຜົນກວດຈຶ່ງອອກມາເປັນບວກ.

ສະເພາະກໍລະນີຢູ່ ສປປ.ລາວ ຂອງພວກເຮົາເປັນກໍລະນີທຳອິດທີ່ກວດພົບ ໂດຍຜູ້ກ່ຽວບໍ່ມີອາກາດຫຍັງບໍ່ວ່າຈະເປັນໄຂ, ໄອ ຫຼື ເຈັບຄໍ ແລະ ຜູ້ກ່ຽວບໍ່ສາມາດສົ່ງເຊື້ອໃຫ້ຜູ້ອື່ນໄດ້ ເຖິງຢ່າງໃດກໍ່ຕາມຄະນະສະເພາະກິດກໍ່ບໍ່ໄດ້ຖືເບົາ ແມ່ນໄດ້ນຳເອົາຜູ້ກ່ຽວກັບມາຕິດຕາມໃນໂຮງໝໍຄືນແລ້ວ ແລະ ໄດ້ນຳເອົາບຸກຄົນໃກ້ຊິດທັງໝົດມາກວດຫາເຊື້ອແລ້ວເຊິ່ງທັງໝົດບໍ່ພົບເຊື້ອ.




ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube