ສະພາປະຊາຊົນຈີນ ຮັບຮອງເອົາກົດໝາຍວ່າດ້ວຍ ການປົກປ້ອງຄວາມໝັ້ນຄົງຂອງຮົງກົງ

ລາຍງານ 30 ພຶດສະພາ 2020, ສະພາປະຊາຊົນແຫ່ງຊາດຈີນ ໃນນະຄອນຫຼວງປັກກິ່ງ ມີມະຕິໃນກອງປະຊຸມເມື່ອວັນພະຫັດ (28 ພຶດສະພາ) ທີ່ຜ່ານມາ ເຊິ່ງເປັນມື້ສຸດທ້າຍຂອງກອງປະຊຸມທີ່ດຳເນີນມາໄດ້ 1 ອາທິດ ດ້ວຍຄະແນນສຽງສ່ວນໃຫຍ່ 2,878 ສຽງ ຄັດຄ້ານ 1 ສຽງ ແລະ ງົດອອກສຽງ 6 ສຽງ ເຫັນດີກັບຫຼັກການພື້ນຖານເພື່ອບັນຍັດກົດໝາຍວ່າດ້ວຍ “ການຈັດຕັ້ງ ແລະ ປະຕິຮູບກົດໝາຍ ແລະ ການບັງຄັບໃຊ້ກົນໄກຄຸ້ມຄອງ ເພື່ອປົກປັກຮັກສາຄວາມໝັ້ນຄົງແຫ່ງຊາດ ພາຍໃນເຂດບໍລິຫານພິເສດຮົງກົງ”.

ເຊິ່ງຮ່າງກົດໝາຍສະບັບດັ່ງກ່າວທີ່ສະເໜີເຂົ້າສູ່ກອງປະຊຸມສະພາປະຊາຊົນຈີນເມື່ອອາທິດທີ່ຜ່ານມາ ມີເນື້ອໃນສຳຄັນບາງມາດຕາລະບຸວ່າ: ຫ້າມບໍ່ໃຫ້ມີບຸກຄົນ ຫຼື ກຸ່ມຄົນໃດຈັດກິດຈະກຳທີ່ຖືເປັນການທ້າທ້າຍຢ່າງຮ້າຍແຮງຕໍ່ຫຼັກການໜຶ່ງປະເທດ ສອງລະບອບ, ການທຳລາຍຫຼັກນິຕິກຳແຫ່ງລັດ, ການເປັນໄພຕໍ່ຄວາມໝັ້ນຄົງແຫ່ງຊາດ.

ຂະນະດຽວກັນ, ຮ່າງກົດໝາຍັງລະບຸໃຫ້ພຶດຕິກຳທີ່ມີເຈດຕະນາລົ້ມລ້າງອຳນາດການປົກຄອງ, ການແບ່ງແຍກດິນແດນ ແລະ ການເຄື່ອນໄຫວທີ່ໄດ້ຮັບການສະໜັບສະໜູນຈາກກອງກຳລັງພາຍນອກ ເພື່ອລົ້ມລ້າງລັດຖະບານ ສປ.ຈີນ ລ້ວນເປັນສິ່ງທີ່ຜິດກົດດໝາຍ, ນອກຈາກນີ້ ຮ່າງກົດໝາຍຍັງລະບຸເຖິງການກຽມຈັດຕັ້ງໜ່ວຍງານດ້ານຄວາມໝັ້ນຄົງ ໃນຮົງກົງອີກດ້ວຍ ເຖິງແມ່ນວ່າຍັງບໍ່ມີການເປີດເຜີຍຢ່າງເປັນທາງການ ແຕ່ຫຼາຍຝ່າຍເຊື່ອວ່າຄືການໃຫ້ໜ່ວຍງານດ້ານຂ່າວກອງຂອງ ສປ.ຈີນມີສຳນັກງານໃນຮົງກົງໄດ້ຢ່າງເປັນທາງການ.

ເຊິ່ງຮ່າງກົດໝາຍດັ່ງກ່າວແມ່ນອີງຕາມສິດໃນມາດຕາ 23 ຂອງກົດໝາຍພື້ນຖານຂອງກົງຮົງ (ລັດຖະທຳມະນູນຮົງກົງ) ວ່າຄະນະຜູ້ບໍລິຫານຕ້ອງດຳເນີນການໂດຍໃຊ້ອຳນາດອັນຊອບທຳ ເພື່ອຢຸດຢັ້ງ ແລະ ປ້ອງກັນບໍ່ໃຫ້ມີການເຄື່ອນໄຫວເພື່ອລົ້ມລ້າງລະບອບການປົກຄອງ.

ຫຼັງຈາກນີ້ ຮ່າງກົດໝາຍຈະເຂົ້າສູ່ການພິຈາລະນາ ແລະ ອະນຸມັດຂັ້ນສຸດທ້າຍໂດຍຄະນະກຳມະການກົມການເມືອງສູນກາງພັກຄອມມູນິດຈີນ ທີ່ປະກອບມີ 7 ທ່ານ ນຳໂດຍທ່ານ ສີ ຈິ້ນຜິງ ປະທານປະເທດ, ທ່ານ ຫຼີ ເຄີ້ສຽງ ນາຍົກລັດຖະມົນຕີ, ທ່ານ ຫຼີ ຈ້ານຊູ, ທ່ານ ຫວັງ ຫຍາງ, ທ່ານ ຫວັງ ຫູໜິງ, ທ່ານ ຈ້າວ ເລີຈີ້ ແລະ ທ່ານ ຫານ ເຈິ້ງ.

ການເຄື່ອນໄຫວດັ່ງກ່າວຂອງສະພາປະຊາຊົນຈີນ ເກີດຂຶ້ນພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວເມື່ອວັນພຸດ (27 ພຶດສະພາ) ວ່າ: ເມື່ອປະເມີນຈາກສະຖານະຖານທີ່ເກີດຂຶ້ນໃນເວລານີ້ ຢູ່ຮົງກົງໄດ້ສູນເສຍອິດສະຫຼະພາບແລ້ວ ແລະ ລັດຖະບານ ສ.ອາເມຣິກາ ຈະດຳເນີນການທີ່ອາດລວມເຖິງການຫຼຸດລະດັບການຮ່ວມມືທາງການຄ້າກັບຮົງກົງ.