ສ.ອາເມຣິກາລະດົມກຳລັງປ້ອງກັນຊາດກວ່າ 17,000 ຄົນ ເຂົ້າຮັກສາຄວາມສະຫງົບຈາກການປະທ້ວງສີຜິວ

ລາຍງານ 2 ມິຖຸນາ 2020, ທ່ານ ພົນເອກ ໂຈເຊັບ ເລງເຢວ (Joseph Lengyel) ຜູ້ບັນຊາການກອງກຳລັງປ້ອງກັນຊາດ ກ່າວເມື່ອວັນຈັນ ທີ່ຜ່ານມາ ວ່າກອງບັນຊາການກອງກຳລັງປ້ອງກັນຊາດຮຽກກຳລັງເຂົ້າປະຈຳການເພີ່ມຂຶ້ນຫຼາຍເທົ່າຈາກປົກກະຕິຕັ້ງແຕ່ອາທິດທີ່ຜ່ານມາ ຕາມຄຳສັ່ງຂອງເຈົ້າຄອງລັດ ແລະ ເຈົ້າເມືອງ ໃນການສະໜັບສະໜູນພາລະກິດຂອງເຈົ້າໜ້າທີ່ຕຳຫຼວດ ແລະ ເຈົ້າໜ້າທີ່ຮັກສາກົດໝາຍໃນທ້ອງຖິ່ນ, ຄວບຄຸມສະຖານະການ ແລະ ຟື້ນຟູຄວາມສະຫງົບ ຈາກເຫດຄວາມຮຸນແຮງ ແລະ ວຸ້ນວາຍທີ່ມີຊະນວນເຫດຈາກການເສຍຊີວິດຂອງທ້າວ ຈອສ ຟລອຍ ທີ່ເມືອງມິນນິແອໂພລິສ ໃນລັດມິນນິໂຊຕາ.

ເຊິ່ງການປະທ້ວງທີ່ກໍ່ຕົວຂຶ້ນຢູ່ເມືອງມິນແອໂພລິສເປັນບ່ອນທຳອິດ ເມື່ອວັນທີ 26 ພຶຶດສະພາ ຫຼື 1 ວັນຫຼັງຈາກການເສຍຊີວິດຂອງທ້າວ ຟລອຍ ເຊິ່ງເປັນຜົນຈາກການຖືກຕຳຫຼວດຜິວຂາວໃຊ້ຫົວເຂົ່າກົດລຳຄໍ 9 ນາທີ ເປັນຂ່າວແຜ່ກະຈາຍອອກໄປ ນັບຈາກນັ້ນຈົນເຖິງຕອນນີ້ ເຈົ້າໜ້າທີ່ກອງກຳລັງປ້ອງກັນຊາດຫຼາຍກວ່າ 17,000 ຄົນ ທີ່ທຸກຄົນຜ່ານການເຝິກຊ້ອມທາງທະຫານມາເປັນຢ່າງດີ ໄດ້ກະຈາຍໃນພື້ນທີ່ຢ່າງໜ້ອຍ 23 ລັດໄດ້ແກ່: ແອຣິໂຊນາ, ອະແລສກາ, ຄາລິຟໍເນຍ, ໂຄໂລຣາໂດ, ຟໍຣິດາ, ຈໍເຈຍ, ອິນດີແອນາ, ເຄນທັກກີ, ມິຊິແກນ, ມິນນິໂຊຕາ, ເນວາດາ, ນໍແຄໂຣໄລນາ, ໂອໄຮໂອ, ເພນຊິນເວເນຍ, ເຊົາແຄໂຣໄລນາ, ເຊົາດາໂກຕາ, ເທນເນສຊີ, ເທັກຊັສ, ຢູທາ, ເວີຈິເນຍ, ວໍຊິງຕັນ, ວິສຄອນຊິນ ແລະ ຍັງມີນະຄອນຫຼວງຊິງຕັນເຊິ່ງເປັນເຂດປົກຄອງພິເສດອີກດ້ວຍ.