ສານສັ່ງໃຫ້ຜູ້ນຳອິນໂດເນເຊຍ ຂໍໂທດປະຊາຊົນທີ່ຈຳກັດຄວາມໄວອິນເຕີເນັດ ເພື່ອຄວບຄຸມປະທ້ວງ

ລາຍງານ 3 ມິຖຸນາ 2020, ສານນະຄອນຫຼວງຈາກາຕາ ມີຄຳຕັດສິນໃນວັນພຸດນີ້ ວ່າການທີ່ລັດຖະບານ ພາຍໃຕ້ການນຳຂອງທ່ານປະທານປະເທດ ໂຈໂກ ວິໂດໂດ ຈຳກັດຄວາມໄວຂອງອິນເຕີເນັດໃນພູມມິພາກປາປົວ ເຊິ່ງຢູ່ທາງພາກຕາເວັນອອກສຸດຂອງປະເທດ ເພື່ອຄວບຄຸມສະຖານະການຈະລາຈົນເມື່ອເດືອນສິງຫາ ປີທີ່ຜ່ານມາ ເປັນການກະທຳທີ່ຜິດກົດໝາຍ ໂດຍສານສັ່ງໃຫ້ທ່ານ ໂຈໂກ ວິໂດໂດ ແລະ ຄະນະລັດຖະມົນຕີມີຖະແຫຼງການຢ່າງເປັນທາງການ ຂໍໂທດຕໍ່ຊາວອິນໂດເນເຊຍ ແລະ ພາກສ່ວນອື່ນໃນສັງຄົມທີ່ໄດ້ຮັບຜົນກະທົບຈາກສິ່ງທີ່ເກີດຂຶ້ນ ລວມທັງສື່ມວນຊົນ.

ສຳລັບຂັ້ນຕອນການຂໍໂທດຂອງລັດຖະບານນັ້ນ ຄືການລົງຖະແຫຼງການເປັນລາຍລັກອັກສອນຜ່ານໜັງສືພິມແຖວໜ້າຂອງປະເທດ 3 ສະບັບ ແລະ ຖະແຫຼງຜ່ານໂທລະພາບ 6 ຊ່ອງ ເຊິ່ງລັດຖະບານຕ້ອງປະຕິບັດໃຫ້ສຳເລັດພາຍໃນ 1 ເດືອນ ນັບຕັ້ງແຕ່ວັນທີສານປະກາດຕັດສິນ, ໃນດ້ານຂອງທຳນຽບປະທານປະເທດອິນໂດເນເຊຍຍັງບໍ່ສະແດງຈຸດຢືນຢ່າງເປັນທາງການ, ເຊິ່ງໂຈດຄືພັນທະມິດຜູ້ສື່ຂ່າວອິນໂດເນເຊຍ ແລະ ຈຳເລີຍຄືລັດຖະບານອິນໂດເນເຊຍ ຍັງສາມາດອຸທອນຄຳຕັດສິນພາຍໃນ 14 ວັນລັດຖະການ.

ສະຖານະການຄວາມບໍ່ສະຫງົບໃນພູມມິພາກປາປົວເມື່ອກາງປີທີ່ຜ່ານມາ ເກີດຂຶ້ນຈາກການທີ່ຕຳຫຼວດໃນເມືອງສຸຣາບາຢາຈັບກຸມນັກສຶກສາຊາວປາປົວ 43 ຄົນ ຮ່ວມກັນປະທ້ວງລັດຖະບານອິນໂດເນເຊຍ ດ້ວຍການທຳລາຍທຸງຊາດອິນໂດເນເຊຍທີ່ໜ້າຫໍພັກ ແລະ ມີການປະທະກັບກຸ່ມນັກສຶກສາຊາວປາປົວໃນພື້ນທີ່ອີກດ້ວຍ, ຂະນະທີ່ຝ່າຍຄວາມໝັ້ນຄົງເດີນໜ້າເສີມກຳລັງທະຫານ ແລະ ຕຳຫຼວດເຂົ້າສູ່ພູມມິພາກປາປົວ ໂດຍເນັ້ນທີ່ແຂວງປາປົວຕາເວັນຕົກ ໃນດ້ານຂອງກະຊວງການສື່ສານ ກໍ່ໄດ້ຄວບຄຸມສັນຍານອິນເຕເນັດ ແລະ ໂທລະສັບໃນພື້ນທີ່ຕໍ່ເນື່ອງເປັນເວລາດົນເພື່ອປ້ອງກັນການປຸກລະດົມ.

ສຳລັບພູມມິພາກປາປົວ ຖືເປັນເຂດອ່ອນໄຫວທາງສັງຄົມ ແລະ ການເມືອງທີ່ສຸດຂອງອິນໂດເນເຊຍ, ລັດຖະບານອິນໂດເນເຊຍຍຶດຄອງພູມມິພາກແຫ່ງນີ້ ໂດຍອ້າງຜົນການລົງປະຊາມະຕິເມື່ອປີ 1969 ທີ່ຫຼາຍຝ່າຍວິຈານວ່າເປັນການບັງຄັບຫຼາຍກວ່າ, ຂະນະທີ່ພູມມິພາກປາປົວເດີມທີ່ມີພຽງແຂວງປາປົວ ແຕ່ດ້ວຍສະຖານະການຄວາມບໍ່ສະຫງົບທີ່ຮຸນແຮງ ແລະ ແກ່ຍາວ ລັດຖະບານອິນໂດເນເຊຍຈຶ່ງອະນຸມັດການແບ່ງແຍກເຂດບາງສ່ວນຂອງແຂວງປາປົວໃຫ້ຕັ້ງເປັນແຂວງປາປົວຕາເວັນຕົກ ເມື່ອປີ 2003 ແຕ່ອຳນາດບໍລິຫານເກືອບທັງໝົດຍັງຂຶ້ນໂດຍກົງກັບລັດຖະບານສູນກາງ.

HTML tutorial