ຜູ້ຊ່ຽວຊານເປັນຫ່ວງສະພາບອາກາດໂລກຮ້ອນ ພາຍຫຼັງທີ່ອາເມຣິກາ ຖອນຕົວຈາກສົນທິສັນຍາປາຣີສ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEiu2wFRVyA5jwqkiIuvIyA6SD5L5ZWWGa0HYJhA6GpBYlaJHzpTA2gBEGS4tSU0utGkPc6yq2A_s-bjfA4r2XK91NQrs5bw4-3VeMH4eaUDLNThiDra9weh91zYd8OdlC5-JGo04gD7DwU/s1600/372.jpg)
ບັນດາໜ່ວຍງານດ້ານວິທະຍາສາດເປີດເຜີຍວ່າ ມີຫຼັກຖານທາງວິທະຍາສາດຊັດເຈນທີ່ບົ່ງບອກວ່າ ກິດຈະກຳຂອງມະນຸດເປັນຕົ້ນເຫດຂອງການປ່ຽນແປງສະພາບດິນຟ້າອາກາດໂລກ, ຄະນະກຳມະການລະຫວ່າງປະເທດວ່າດ້ວຍ ການປ່ຽນແປງສະພາບດິນຟ້າອາກາດໂລກ (Intergovernmental Panel on Climate Change) ຫຼື IPCC ເປັນຄະນະກຳມະການອິດສະຫຼະດ້ານວິທະຍາສາດລະຫວ່າງປະເທດ ເຕືອນວ່າຫາກຍັງບໍ່ມີມາດຕະການເພີ່ມເຕີມເພື່ອຫຼຸດຜ່ອນແກັດເຮືອນແກ້ວທີ່ປ່ອຍສູ່ຊັ້ນບັນຍາກາດ ຈະມີຄວາມສຽງສູງຫຼາຍທີ່ພາວະໂລກຮ້ອນຈະເຮັດໃຫ້ເກີດຜົນກະທົບທີ່ຮຸນແຮງ, ກິນວົງກວ້າງ ແລະ ແກ້ໄຂບໍ່ໄດ້.
ທ່ານ ໂຈນາທານ ລິນ ໂຄສົກຂອງ IPCC ກ່າວວ່າ ທາງຄະນະກຳມະການເຫັນວ່າ ການຄວບຄຸມພາວະໂລກຮ້ອນ ແລະ ຜົນກະທົບ ຈະປະສົບຄວາມສຳເລັດໄດ້ກໍ່ຕໍ່ເມື່ອເຮົາສາມາດຫຼຸດຜ່ອນປະລິມານແກັດເຮືອນແກ້ວທີ່ປ່ອຍສູ່ຊັ້ນບັນຍາກາດລົງໃນປະລິມານທີ່ຫຼາຍພໍ ແລະ ຕ້ອງຫຼຸດລົງຢ່າງຍືນຍົງ, ນອກຈາກນີ້ທ່ານ ລິນ ຍັງກ່າວອີກວ່າ ບັນຫາພາວະໂລກຮ້ອນເປັນບັນຫາຂອງທຸກຄົນ ແລະ ຕ້ອງມີການຄວາມຮ່ວມມືກັນໃນລະດັບທົ່ວໂລກ, ການຫຼຸດຜ່ອນພາວະໂລກຮ້ອນທີ່ໄດ້ຜົນບໍ່ມີທາງສຳເລັດ ຫາກປະເທດໃດປະເທດໜຶ່ງຈະເຫັນແຕ່ຜົນປະໂຫຍດຂອງຕົນເທົ່ານັ້ນເປັນສຳຄັນ.
ໃນຂະນະນີ້ຍັງບໍ່ຊັດເຈນວ່າການຖອນຕົວຂອງສະຫະລັດອາເມຣິກາ ອອກຈາກສົນທິສັນຍາປາຣີສວ່າດ້ວຍ ການປ່ຽນແປງສະພາບດິນຟ້າອາກາດ ຈະມີຜົນກະທົບແບບໃດຕໍ່ການຫຼຸດປະລິມານແກັດເຮືອນແກ້ວທີ່ປ່ອຍສູ່ຊັ້ນບັນຍາກາດໃນອະນາຄົດ.
ທ່ານ ດີລອນ ເທີບລອງ ຫົວໜ້າຝ່າຍການວິໄຈດ້ານຊັ້ນບັນຍາກາດໂລກ ແລະ ສິ່ງແວດລ້ອມຂອງອົງການອຸຕິນິຍົມວິທະຍາໂລກ (World Meteorological Organization) ກ່າວວ່າ ພາວະໂລກຮ້ອນຍັງຈະເກີດຂຶ້ນຕໍ່ໄປຢ່າງຕໍ່ເນື່ອງ ຕາບໃດທີ່ຄົນເຮົາຍັງປ່ອຍແກັດເຮືອນແກ້ວສູ່ຊັ້ນບັນຍາກາດ, ການຫຼຸດຜ່ອນການປ່ອຍແກັດເຮືອນແກ້ວສູ່ຊັ້ນບັນຍາກາດຈະບໍ່ຊ່ວຍໃຫ້ປະລິມານແກັດເຮືອນແກ້ວທີ່ສະສົມໃນຊັ້ນບັນຍາກາດຫຼຸດລົງແຕ່ຢ່າງໃດ ເນື່ອງຈາກມັນຈະຄົງຢູ່ໃນຊັ້ນບັນຍາກາດເປັນເວລາດົນຫຼາຍຮ້ອຍປີ.
ທ່ານ ເທີບລອງ ກ່າວວ່າ ພາວະໂລກຮ້ອນຈະຍັງດຳເນີນຕໍ່ໄປ ແລະ ເຊື່ອວ່າຜົນກະທົບທີ່ຮຸນແຮງທີ່ສຸດຈາກການຖອດຕົວຈາກສົນທິສັນຍາປາຣີສວ່າດ້ວຍ ການປ່ຽນແປງດິນຟ້າອາກາດ ຂອງສະຫະລັດອາເມຣິກາ ອາດຈະເຮັດໃຫ້ສະພາບອາກາດຂອງໂລກຮ້ອນຂຶ້ນອີກ 0.3 ອົງສາເຊ ສູງກວ່າລະດັບອຸນຫະພູມໃນຕອນກ່ອນຍຸກອຸດສາຫະກຳ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ