ເກົາຫຼີເໜືອທົດສອບເຄື່ອງຈັກຂີປະນາວຸດໃໝ່ ໃນຂະນະທີ່ສະຫະລັດອາເມຣິກາລົ້ມເຫຼວໃນການທົດສອບລະບົບປ້ອງກັນຂີປະນາວຸດ

ສຳນັກຂ່າວຕ່າງປະເທດລາຍງານ 23 ມິຖຸນາ 2017 ໂດຍອ້າງຂໍ້ມູນຈາກແຫຼ່ງຂ່າວລະດັບສູງຂອງລັດຖະບານສະຫະລັດອາເມຣິກາວ່າ ເກົາຫຼີເໜືອໄດ້ມີການທົດລອງເຄື່ອງຈັກຈະຫຼວດປະສິດທິພາບສູງຄັ້ງໃໝ່ ເຖິງຈະບໍ່ມີການເປີດເຜີຍຂໍ້ມູນເພີ່ມເຕີມທີ່ຫຼາຍພໍ ແຕ່ຝ່າຍສະຫະລັດອາເມຣິກາເຊື່ອວ່າການທົດສອບທີ່ເກີດຂຶ້ນຄືຄວາມພະຍາຍາມຄັ້ງຫຼ້າສຸດຂອງລັດຖະບານເກົາຫຼີເໜືອໃນການພັດທະນາໂຄງການຜະລິດຂີປະນາວຸດຂ້າມທະວີບ (ICBM) ໃຫ້ສາມາດໂຈມຕີໄດ້ໄກເຖິງແຜ່ນດິນໃຫຍ່ຂອງສະຫະລັດອາເມຣິກາ.

ເຊິ່ງທ່ານ ໂດໂນ ທຣຳ ປະທານປະເທດສະຫະລັດອາເມຣິກາປະກາດວ່າ ການຢຸດຕິໂຄງການນິວເຄຼຍຂອງເກົາຫຼີເໜືອຄື ໜຶ່ງໃນວາລະສຳຄັນທີ່ສຸດໃນດ້ານນະໂຍບາຍຕ່າງປະເທດຂອງລັດຖະບານສະຫະລັດອາເມຣິກາຊຸດປັດຈຸບັນ, ສ່ວນໃນດ້ານຂອງທ່ານ ເຣັກ ທິວເລີສັນ ລັດຖະມົນຕີກະຊວງການຕ່າງປະເທດສະຫະລັດອາເມຣິກາກ່າວລະຫວ່າງການພົບປະຫາລືກັບເຈົ້າໜ້າທີ່ລະດັບສູງຂອງລັດຖະບານຈີນ ທີ່ນະຄອນຫຼວງວໍຊິງຕັນເມື່ອວັນພຸດທີ່ຜ່ານມາວ່າ ຈີນມີພາລະກິດທາງການທູດໃນການເພີ່ມແຮງກົດດັນທັງທາງດ້ານການເມືອງ ແລະ ເສດຖະກິດຕໍ່ເກົາຫຼີເໜືອ ເພື່ອປ້ອງກັນບໍ່ໃຫ້ເກີດເຫດການຮຸນແຮງຢູ່ແຫຼມເກົາຫຼີ.

ໃນຂະນະດຽວກັນສຳນັກງານປ້ອງກັນຂີປະນາວຸດ (MDA) ຂອງກະຊວງປ້ອງກັນປະເທດສະຫະລັດອາເມຣິກາໄດ້ລາຍງານເມື່ອວັນພະຫັດທີ່ຜ່ານມາວ່າ ເຮືອຮົບ USS John Paul Jones ປະສົບຄວາມລົ້ມເຫຼວໃນການທົດສອບປະສິດທິພາບຂອງລະບົບປ້ອງກັນຂີປະນາວຸດ ໂດຍຂີປະນາວຸດນຳວິຖີ  Standard Missile-3 (SM-3) ທີ່ເດີນທາງອອກຈາກເຮືອ ພາດເປົ້າໝາຍຄືການທຳລາຍຂີປະນາວຸດວິຖີໂຄ້ງ (MRBM) ທີ່ມີການຍິງອອກຈາກຖານທັບເກາະຄາວາຍອິ ເຊິ່ງເປັນເກາະຂະໜາດໃຫຍ່ທີ່ສຸດຂອງກຸ່ມເກາະຮາວາຍ.