ຄວາມຄືບໜ້າ ໂຄງການຂົນສົ່ງແບບຍືນຍົງ ໃນຕົວເມືອງນະຄອນຫຼວງວຽງຈັນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEjuFm4HVGgPD1hcMEvxj15VCMFYYMtBuusx3egQoHIYxQmuCtgqddxAwb_S22XYfpB4arlfembv8aGUHVB9PiMBe80SJFkEvDt2hxHIKyC2rcWUXBEqxOG1CEWCou8QHHiZNZ-Qw8fE9Egr/s1600/333.jpg)
ໂຄງການຂົນສົ່ງແບບຍືນຍົງໃນຕົວເມືອງນະຄອນຫຼວງວຽງຈັນ (Vientiane Sustainable Urban Transport Project) ຖືກຈັດຕັ້ງປະຕິບັດໂດຍ ກະຊວງໂຍທາທິການ ແລະ ຂົນສົ່ງ, ໂຄງການດັ່ງກ່າວຈະເປັນການປັບປຸງບໍລິການ ແລະ ການຄຸ້ມຄອງການຂົນສົ່ງໃນຕົວເມືອງນະຄອນຫຼວງວຽງຈັນ ໂດຍການສ້າງໜ່ວຍງານຄຸ້ມຄອງການຂົນສົ່ງ, ໃຫ້ບໍລິການດ້ວຍລົດເມສາທາລະນະ ທີ່ມີຄຸນນະພາບສູງ ແລະ ລົດເມດ່ວນ, ໂດຍການປັບປຸງການບໍລິຫານຈັດການການສັນຈອນ, ລະບົບການຄຸ້ມຄອງບ່ອນຈອດລົດ ແລະ ນຳໃຊ້ລະບົບການຂຶ້ນທະບຽນຍານພາຫະນະ ລວມທັງການປັບປຸງທາງຄົນຍ່າງ ແລະ ຂົນສົ່ງແບບບໍ່ໃຊ້ເຄື່ອງຈັກ.
![](https://blogger.googleusercontent.com/img/b/R29vZ2xl/AVvXsEimyMlYfKrEZ2nTaaiQxunIC15W1FM09xfQTUNPCNVA9YOV-enyhdBlzwFONOB4-cnNwsPyrYbY9Xm6U0j5TswNREq0rKrB4fUpLP0GWfZ3dPJX6R9UEFVppfQ3NEdXBaPcpxp2Pm62gv7u/s1600/334.jpg)
ໂຄງການຍັງໃຫ້ຄວາມສຳຄັນຕໍ່ບົດບາດຍິງ-ຊາຍ, ການຫຼຸດຜ່ອນອາຍພິດເຮືອນແກ້ວ ແລະ ການຮ່ວມມືລະຫວ່າງພາກລັດ ແລະ ເອກະຊົນ.
ໂຄງການດັ່ງກ່າວມີມູນຄ່າທັງໝົດ 99.7 ລ້ານໂດລາສະຫະລັດ. ລັດຖະບານລາວສົມທົບທຶນ ຈຳນວນ 14.55 ລ້ານໂດລາສະຫະລັດ, ການລົງທຶນຂອງພາກເອກະຊົນຈຳນວນ 6.41 ລ້ານໂດລາສະຫະລັດ ລວມທັງທຶນກູ້ຢືມ ແລະ ຊ່ວຍເຫຼືອລ້າຈຳນວນໜຶ່ງ. ລາຍລະອຽດັ່ງນີ້:
1. ທະນາຄານພັດທະນາອາຊີ (ADB) ຈຳນວນ 35 ລ້ານໂດລາສະຫະລັດ
2. ທະນາຄານເອີຣົບເພື່ອການລົງທຶນ ຈຳນວນ 20 ລ້ານໂດລາສະຫະລັດ
3. ກອງທຶນກຸ່ມປະເທດສົ່ງນ້ຳມັນອອກເປັນສິນຄ້າ (OFID) ຈຳນວນ 15 ລ້ານໂດລາສະຫະລັດ
4. ສະຫະພາບເອີຣົບ-ກອງທຶນສະໜັບສະໜູນການລົງທຶນໃນອາຊີ ຈຳນວນ 5 ລ້ານເອີໂຣ (6.9 ລ້ານໂດລາສະຫະລັດ)
5. ກອງທຶນສິ່ງແວດລ້ອມໂລກ ຈຳນວນ 1.84 ລ້ານໂດລາສະຫະລັດ.
ໂຄງການດັ່ງກ່າວມີແຜນເລີ່ມປະຕິບັດມາຕັ້ງແຕ່ເດືອນມິຖຸນາ 2015 ແລະ ສຳເລັດໃນເດືອນມິຖຸນາ ປີ 2020. ແຕ່ເນື່ອງຈາກການລົງນາມໃນຂໍ້ຕົກລົງດ້ານການເງິນມີຄວາມຊັກຊ້າ, ໂຄງການຈຶ່ງຖືກຈັດຕັ້ງປະຕິບັດໃນເດືອນສິງຫາ 2016.
ຄະນະຊີ້ນຳໂຄງການໄດ້ຖືກສ້າງຕັ້ງຂຶ້ນຢ່າງເປັນທາງການ ເຊິ່ງປະກອບດ້ວຍພາກສ່ວນຕ່າງໆເຊັ່ນ: ກະຊວງໂຍທາທິການ ແລະ ຂົນສົ່ງ, ຫ້ອງວ່າການນະຄອນຫຼວງວຽງຈັນ, ກະຊວງການເງິນ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງປ້ອງກັນຄວາມສະຫງົບ ແລະ ກະຊວງແຜນການ ແລະ ການລົງທຶນ. ພ້ອມດຽວກັນນັ້ນ, ໜ່ວຍງານປະສານງານໂຄງການກໍ່ໄດ້ຮັບການສ້າງຕັ້ງຂຶ້ນ ເພື່ອຈັດຕັ້ງປະຕິບັດໂຄງການ ປະກອບດ້ວຍກົມຂົນສົ່ງ, ກົມເຄຫາ-ຜັງເມືອງ, ກົມການເງິນ, ພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນ ແລະ ຫ້ອງວ່າການນະຄອນຫຼວງວຽງຈັນ.
ຊ່ຽວຊານທີ່ປຶກສາໂຄງການດ້ານການຂົນສົ່ງໃນຕົວເມືອງ (UTA-A) ໄດ້ເລີ່ມເຮັດວຽກໃນເດືອນຕຸລາ 2016 ເພື່ອສະໜັບສະໜູນການຈັດຕັ້ງປະຕິບັດໂຄງການ.
ກະຊວງໂຍທາທິການ ແລະ ຂົນສົ່ງກຳລັງຈັດຈ້າງບໍລິສັດທີ່ປຶກສາໂຄງການ (PIC) ເພື່ອສຳຫຼວດອອກແບບດ້ານເຕັກນິກ ແລະ ຕິດຕາມການຈັດຕັ້ງປະຕິບັດໂຄງການຂອງບໍລິສັດຜູ້ຮັບເໝົາ ເຊິ່ງຄາດວ່າຈະສາມາດເລີ່ມປະຈຳການແຕ່ເດືອນພະຈິກ 2017 ເປັນຕົ້ນໄປ. ນອກຈາກນັ້ນ, ກຳລັງຈັດຈ້າງບໍລິສັດກວດສອບພາຍນອກ ເພື່ອກວດສອບການນຳໃຊ້ງົບປະມານໂຄງການ.
ຜ່ານມາ, ໂຄງການໄດ້ໃຊ້ເງິນພຽງແຕ່ບ້ວງກູ້ຢືມຈາກທະນາຄານພັດທະນາອາຊີ, ເປັນເງິນທັງໝົດ 127,904 ໂດລາສະຫະລັດ ເຊິ່ງເປັນໄປຕາມແຜນງົບປະມານເບື້ອງຕົ້ນທີ່ໄດ້ກຳນົດ.
![](https://blogger.googleusercontent.com/img/b/R29vZ2xl/AVvXsEiYC42e7QC9cPuuDIkvv7CCTkkzj0pT5QIifBqLg4IEBuKBnG9cp2JAz1g8wKBhufftfDXSi0fvJ4SKgHsOh40y6VPAQjf39y5Ek1dO5VOcffhCUVnQrHx8neyWFNbfOL2Ub_ByXt-y9bQU/s1600/335.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ