ຕຳຫຼວດຟິລິບປິນຂ້າຜູ້ຄ້າຢາເສບຕິດພາຍໃນວັນດຽວ 13 ຄົນ ພ້ອມຈັບກຸ່ມອີກວ່າ 100 ຄົນ
ສຳນັກຂ່າວຕ່າງປະເທດລາຍງານ 22 ມີນາ 2018 ວ່າ: ຕຳຫຼວດຟິບິລປິນຂ້າຜູ້ຕ້ອງສົງໄສຄ້າຢາເສບຕິດ 13 ຄົນ ແລະ ຈັບກຸມອີກກວ່າ 100 ຄົນ ໃນປະຕິບັດການກວາດລ້າງອາຊະຍາກຳເມື່ອວັນພຸດ (21 ມີນາ) ທີ່ຜ່ານມາ ໃນແຂວງບູລາຄັນ ທີ່ຕັ້ງຢູ່ທິດເໜືອຂອງນະຄອນຫຼວງມະນິລາ.
ປະຊາຊົນກວ່າ 4,000 ຄົນ ຖືກຕຳຫຼວດຟິລິບປິນຂ້າ ໃນປະຕິບັດການສົງຄາມປາບປາມຢາເສບຕິດໃນໄລຍະເວລາ 20 ເດືອນຜ່ານມາ ແລະ ອີກຫຼາຍພັນຄົນຖືກຂ້າໂດຍກຸ່ມມືປືນລຶກລັບ ຜູ້ເສຍຊີວິດສ່ວນໃຫຍ່ຢູ່ໃນເຂດຊຸມຊົນແອອັດຂອງມະຫານະຄອນມະນິລາ ລວມທັງແຂວງບູລາຄັນ ແລະ ແຂວງຄາບີເຕ ທີ່ຢູ່ໃກ້ຄຽງກັນ.
ກຸ່ມສິດທິມະນຸດ ແລະ ຝ່າຍກົງກັນຂ້າມທາງການເມືອງຂອງທ່ານ ໂຣດຼິໂກ ດູເຕເຕ ປະທານປະເທດຟິລິບປິນຄົນປັດຈຸບັນກ່າວວ່າ ການປະຫານຜູ້ເສບຢາເສບຕິດ ແລະ ນັກຄ້າລາຍຍ່ອຍໄດ້ແຜ່ຂະຫຍາຍເປັນວົງກວ້າງ ແຕ່ຕຳຫຼວດຢືນຢັນວ່າ ຈະຂ້າສະເພາະຜູ້ຄ້າທີ່ຕໍ່ສູ້ຂັດຂືນການຈັບກຸມຂອງເຈົ້າໜ້າທີ່ເທົ່ານັ້ນ.
ຕຳຫຼວດແຂວງບູລາຄັນກ່າວວ່າ: ຕຳຫຼວດໃຊ້ວິທີລໍ້ຊື້ 60 ຈຸດ ໃນ 9 ເມືອງຂອງແຂວງບູລາຄັນ ເມື່ອວັນພຸດ (21 ມີນາ) ທີ່ຜ່ານມາ ໂດຍທ່ານ ໂຣເມໂຣ ຄາຣາມັດ ຜູ້ບັນຊາການຕຳຫຼວດບູລາຄັນກ່າວວ່າ: ປະຕິບັດການເຫຼົ່ານີ້ເປັນສ່ວນໜຶ່ງຂອງການເພີ່ມທະວີຄວາມເຂັ້ມງວດ ໃນການປາບປາມກວາດລ້າງຢາເສບຕິດ ແລະ ອາຊະຍາກຳໃນຮູບແບບອື່ນໆໃນເຂດແຂວງບູລາຄັນ.
ທ່ານ ໂມເມໂຣ ຄາຣາມັດ ກ່າວອີກວ່າ ປະຕິບັດ 24 ຊົ່ວໂມງທີ່ຜ່ານມາຂອງວັນທີ 21 ມີນາ 2018 ມີຜູ້ຕ້ອງສົງໄສເສຍຊີວິດແລ້ວ 13 ຄົນ ໂດຍແຕ່ລະຄົນເປີດສາກຍິງກ່ອນ ເຮັດໃຫ້ເຈົ້າໜ້າທີ່ຕ້ອງຍິງຕອບໂຕ້ເພື່ອປ້ອງກັນຕົນເອງ ແລະ ມີຜູ້ຖືກຈັບກຸມກວ່າ 100 ຄົນ ເຈົ້າໜ້າທີ່ຢຶດຂອງກາງອາວຸປືນໄດ້ 19 ກະບອກ ແລະ ຢາເສບຕິດປະມານ 250 ຖົງ.
ເມື່ອເດືອນສິງຫາ 2017 ທີ່ຜ່ານມາ ຕຳຫຼວດຂ້າຜູ້ຕ້ອງສົງໄສຄ້າຢາເສບຕິດໃນແຂວງບູລາຄັນ ເສຍຊີວິດ 32 ຄົນ ໃນມື້ດຽວ ແລະ ອີກ 10 ຄົນເມື່ອເດືອນກຸມພາ 2018 ທີ່ຜ່ານມາ
ສະແດງຄວາມຄິດເຫັນ