ຄຳທຳນາຍ ປີໃໝ່ລາວ ພ.ສ 2561 (2018) ຕາມປະຕິທິນລາວບູຮານ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEhP3XhvVa3KbPrI2mXRTHyyERD3WnDlTglRFIZmVZNywrUUVynK8R0izgL32tD4U-7ww1bb_Ge0g1IKh2Q6X0M38hDQV5a-GLo_FSkAZ1dpL0HFy8qdVU8wTh_wXe4ARx6SlvtLwXDbqkA/s1600/564.jpg)
ຄຳທຳນາຍບຸນປີໃໝ່ລາວ (ຄ.ສ 2018) ຕາມປະຕິທິນລາວ ວັດປ່າໂພນເພົາ ວະນາຮາມ ຫຼວງພະບາງ ປີຈໍ - ເປີກເສັດ - ສຳລິດທິສົກ - ອະທິກະມາດ, ພ.ສ 2560-2561, ຈ.ສ 1379-1380, ຄ.ສ 2018 ວັນສັງຂານລ່ວງກົງກັບວັນເສົາ ແຮມ 14 ຄ່ຳ ເດືອນ 5 ພ.ສ 2560 - ກົງກັບວັນທີ 14 ເມສາ ຄ.ສ 2018, ເວລາ 09 ໂມງ 01 ນາທີ 48 ວິນາທີ.
ວັນສັງຂານເນົາ ກົງກັບວັນອາທິດ (ມື້ເມິງເປົ້າ) ຂຶ້ນ 1 ຄ່ຳ ເດືອນ 6 ພ.ສ 2560 - ກົງກັບວັນທີ 15 ເມສາ ຄ.ສ 2018
ວັນສັງຂານຂຶ້ນ: ກົງກັບວັນຈັນ (ມື້ເບີກຍີ່) ຂຶ້ນ 2 ຄ່ຳ ເດືອນ 6 ພ.ສ 2560 - ກົງກັບວັນທີ 16 ເມສາ ຄ.ສ 2018, ເວລາ 12 ໂມງ 59 ນາທີ 24 ວິນາທີ, ປ່ຽນວັນຖະເຫຼີງສົກປີໃໝ່ລາວ ຈຸນລະສັກກະລາດ ເປັນ 1380.
ນາມມະຫາສົງການ ນາງເທບພະທິດາທີ 7 ຊົງພະນາມວ່າ ມະໂຫທອນເທວີ ຊົງພາຫຸລັດທັດດອກສາມຫາວ (ດອກຜັກຕົບ), ອາພອນໄປດ້ວຍແກ້ວ ນິນລັດ (ແກ້ວສີດອກຜັກຕົບ), ສະເຫວີຍເນື້ອຊາຍ (ກວາງຊະນິດໜຶ່ງ) ເປັນພັກສາຫານ, ພະຫັດຂວາຊົງກົງຈັກ, ພະຫັດຊ້າຍຊົງຕີສູນ (ຫາກ 3 ງ່າມ), ສະເດັດນັ່ງມາເທິງຫຼັງມະຍຸລະປັກ (ນົກຍຸງ) ເປັນພາຫະນະ.
ເກນພິລຸນະສາດ: ພະພຸດ ເປັນອະທິບໍດີ, ນາກຫຼິ້ນນ້ຳ 5 ໂຕ, ບັນດານໃຫ້ຝົນຕົກ 500 ຫ່າ, ຕົກໃນຂອບຈັກກະວານ 200 ຫ່າ, ຕົກໃນປ່າຫິມະພານ 150 ຫ່າ, ຕົກໃນມະຫາສະໝຸດ 100 ຫ່າ, ຕົກໃນມະນຸດໂລກ 50 ຫ່າ.
ເກນທາລາທິຄຸນ: ຕົກລາສີເຕໂຊ, ນ້ຳຈະໜ້ອຍ, ຝົນຈະມີອຸດົມທຸກໆແຫ່ງ, ນາດອນ ແລະ ນາລຸ່ມຈະດີທັງສອງຢ່າງເໝືອນກັນ, ຈະມີລົມພັດບາງຄັ້ງບາງຄາວຈາກທິດທັງ 4 ຕາມລະດູການ.
ເກນທັນຍາຫານ: ຊື່ວ່າ ລາພະ, ເຂົ້າກ້າໄຮ່ນາຈະໄດ້ຜົນ 10 ສ່ວນ ເສຍແຕ່ສ່ວນດຽວ, ປະຊາຊົນຈະມີຄວາມສຸກສະບາຍດີ, ທັນຍາຫານຈະມີບໍລິບູນອຸດົມດີ.
ຜະລາມັດສະມັງສາຫານ: ໝາກໄມ້ຈະບໍ່ດົກ, ຊິ້ນປາຫານຫານຈະມີອຸດົມສົມບູນ.
ລຸກຂະຊາດ: ໄມ້ເດື່ອກ້ຽງ, ເດື່ອປ່ອງເປັນພະຍາ, ຄົນທັງຫຼາຍຈະຢູ່ເປັນສຸກ.
ເກນກາລະໂຍກ: ວັນສຸກເປັນທຸງໄຊ, ວັນເສົາເປັນອະທິບໍດີ, ວັນເສົາເປັນອຸບາດ, ວັນອາທິດເປັນໂລກາວິນາດ.
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ