ປະຫວັດສາດໜ້າໃໝ່ຂອງສອງເກົາຫຼີ ກັບການປະຊຸມສຸດຍອດລະຫວ່າງສອງຜູ້ນຳ
ສຳນັກຂ່າວຕ່າງປະເທດລາຍງານ 27 ເມສາ 2018 ວ່າ: ທ່ານ ຄິມ ຈອງ-ອຶນ ສ້າງປະຫວັດສາດເປັນຜູ້ນຳສູງສຸດຂອງເກົາຫຼີເໜືອຄົນທຳອິດ ທີ່ຂ້າມແດນມາຍັງເກົາຫຼີໃຕ້ ດ້ວຍການຍ່າງຂ້າມເສັ້ນແບ່ງເຂດແດນທາງທະຫານ ຢູ່ພື້ນທີ່ຄວາມໝັ້ນຄົງຮ່ວມຂອງບ້ານປັນມຸນຈອມ ເຊິ່ງຕັ້ງຢູ່ລະຫວ່າງກາງເສັ້ນຂະໜານທີ 38 ເມື່ອເວລາ 09:30 ໂມງ ຕາມເວລາທ້ອງຖິ່ນ (07:30 ຕາມເວວາໃນປະເທດລາວ).
ຂະນະທີ່ທ່ານ ມູນ ແຈ-ອິນ ປະທານປະເທດເກົາຫຼີໃຕ້ໄດ້ຢືນລໍຖ້າຕ້ອນຮັບຢູ່ອີກຝັ່ງໜຶ່ງຂອງຊາຍແດນ ເຊິ່ງທັງສອງໄດ້ຈັບມື ແລະ ກ່າວທັກທາຍກັນດ້ວຍຮອຍຍິ້ມ ແລະ ທ່ານ ຄິມ ຈອງ-ອຶິນ ໄດ້ເຊີນໃຫ້ທ່ານ ມູນ ແຈ-ອິນ ຍ່າງຂ້າມເສັ້ນແບ່ງຊາຍແດນໄປຍັງຝັ່ງເກົາຫຼີເໜືອ ເພື່ອໃຫ້ສື່ມວນຊົນຂອງລັດຖະບານເກົາຫຼີເໜືອໄດ້ບັນທຶກພາບດ້ວຍ ກ່ອນທັງສອງທ່ານຈະກ້າວຂ້າມກັບມາຍັງຝັ່ງເກົາຫຼີໃຕ້ພ້ອມກັນ ແລ້ວນຳຜູ້ນຳເກົາຫຼີເໜືອ ແລະ ໃຕ້ຮັບຊໍ່ດອກໄມ້ຈາກເດັກນ້ອຍຊາຍ ແລະ ຍິງຊາວເກົາຫຼີໃຕ້ ເຊິ່ງເປັນຕົວແທນຂອງປະຊາຊົນທີ່ອາໄສຢູ່ໃນບັນດາບ້ານຕ່າງໆໃກ້ກັບເຂດປອດທະຫານ.
ເຊິ່ງພຽງບໍ່ພໍເທົ່າໃດຊົ່ວໂມງ ກ່ອນເຖິງຊ່ວງໄລຍະເວລາປະຫວັດສາດຂອງສອງເກົາຫຼີ, ສຳນັກຂ່າວກາງເກົາຫຼີ (KCNA) ລາຍງານວ່າ: ທ່ານ ຄິມ ຈອງ-ອຶນ ມີຄວາມພ້ອມເປັນຢ່າງຍິ່ງສຳລັບການປະຊຸມຄັ້ງປະຫວັດສາດນີ້ ກັບທ່ານ ມູນ ແຈ-ອິນ ເພື່ອເປີດປະຫວັດສາດໜ້າໃໝ່ ໃຫ້ກັບການຮ່ວມມື ແລະ ຄວາມສຳພັນລະຫວ່າງສອງເກົາຫຼີ ໂດຍມີການຄາດການວ່າ ນອກເໜືອຈາກການຂະຫຍາຍກອບການຮ່ວມມືທາງເສດຖະກິດຂ້າມຊາຍແດນແລ້ວ ຜູ້ນຳທທັງສອງປະເທດຈະປຶກສາລາລືກັນໃນບັນຫາການປົດອາວຸດນິວເຄຼຍ ຢູ່ແຫຼມເກົາຫຼີ.
ເຖິງແມ່ນວ່າທ່ານ ຄິມ ຈອງ-ອຶນ ກ່າວເມື່ອທ້າຍອາທິດທີ່ຜ່ານມາວ່າ: ລັດຖະບານເກົາຫຼີເໜືອຈະຢຸດຕິການທົດລອງອາວຸດນິວເຄຼຍ ແລະ ຂີປະນາວຸດ ແຕ່ນັ້ນໝາຍຄວາມວ່າເກົາຫຼີເໜືອຍັງມີອາວຸດນິວເຄຼຍຢູ່ ເຊິ່ງຫຼາຍຝ່າຍເຊື່ອວ່າເກົາຫຼີເໜືອຈະຍັງຄົງໃຊ້ເລື່ອງນີ້ເປັນເງື່ອນໄຂຕໍ່ລອງການຫຼຸດຜ່ອນແຮງກົດດັນທາງເສດຖະກິດ.
ເຊິ່ງການພົບປະຫາລືລະຫວ່າງທ່ານ ມູນ ແຈ-ອິນ ກັບ ທ່ານ ຄິມ ຈອງ-ອຶນ ຖືເປັນການປະຊຸມຄວາມຮ່ວມມືຂອງສອງເກົາຫຼີໃນລະດັບຜູ້ນຳເປັນຄັ້ງທີ 3 ໃນປະຫວັດສາດ ໂດຍການປະຊຸມ 2 ຄັ້ງທີ່ຜ່ານມາ ເກີດຂຶ້ນໃນນະຄອນຫຼວງປຽງຢາງ ແລະ ເປັນການພົບປະຫາລືລະຫວ່າງທ່ານ ຄິມ ຈອງ-ອິວ ຜູ້ນຳສູງສຸດຂອງເກົາຫຼີເໜືອໃນເວລານັ້ນ ແລະ ເປັນພໍ່ຂອງທ່ານ ຄິມ ຈອງ-ອຶນ ກັບປະທານປະເທດເກົາຫຼີໃຕ້ໃນໄລຍະນັ້ນຄືທ່ານ ຄິມ ແດ-ຈຸງ ເມື່ອປີ 2000 ແລະ ທ່ານ ໂນ ມູ ຮະຢອນ ເມື່ອປີ 2007
ສະແດງຄວາມຄິດເຫັນ