ສ.ອາເມຣິກາ ເສີມກຳລັງເຮືອບັນທຸກຍົນຮົບ ເປັນລຳທີ 3 ເຂົ້າມາໃນທະເລຈີນໃຕ້ ທ່າມກາງຄວາມເຄັ່ງຕຶງທະວີຄູນກັບຈີນ
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
![](https://blogger.googleusercontent.com/img/b/R29vZ2xl/AVvXsEisHIzZo6Nw0cEv41cp2Vk3z-_TcUHFfMnW_KjeZm7zoN8z_9UBM_TBRLHtfUJYkQyhaLtcc6AAYC327VICuButE7pEhDmv6lj0o36PXkwZ7Yl0FWrwU7gyFkuxxztOePd62j9Uqa2gEuA/s1600/1476.jpg)
ສຳນັກຂ່າວຕ່າງປະເທດລາຍງານເມື່ອວັນທີ 26 ມິຖຸນາ 2018 ທີ່ຜ່ານມາວ່າ: ເຮືອບັນທຸກຍົນຮົບພະລັງງານນິວເຄຼຍ USS Ronald Reagan (CVN-76) ລະຫ່ວາງຂັບນ້ຳ 97,000 ໂຕນ ເຂົ້າຈອດທຽບທ່ານະຄອນຫຼວງມະນິລາ ປະເທດຟິລິບປິນ ເປັນຄັ້ງທີ 3 ໃນຮອບ 4 ເດືອນ ໂດຍຊັ້ນດາດຟ້າເຮືອສາມາດບັນທຸກເຮືອຮົບກວ່າ 70 ລຳ ແລະ ທະຫານ 5,500 ຄົນ ກຳນົດຈອດທຽບທ່າໃນອ່າວມະນິລາ 4 ວັນ ເພື່ອໃຫ້ທະຫານຂຶ້ນຝັ່ງພັກຜ່ອນ ພາຍຫຼັງຢູ່ໃນທະເລມາຫຼາຍອາທິດ ແລະ ຄະນະທະຫານກອງທັບເຮືອຂອງ 2 ປະເທດຈະປະຊຸມປຶກສາຫາລືຮ່ວມກັນ.
USS Ronald Reagan ຖືເປັນກອງເຮືອບັນທຸກຍົນຮົບລຳທີ 3 ທີ່ກອງທັບສະຫະລັດ ອາເມຣິກາ ສົ່ງເຂົ້າມາລາດຕະເວັນໃນນ່ານນ້ຳທະເລຈີນໃຕ້ໃນປີນີ້ ທ່າມກາງຄວາມເຄັ່ງຕຶງ ຈາກຄວາມຂັດແຍ່ງລະຫວ່າງຈີນກັບ 5 ປະເທດເພື່ອນບ້ານປະກອບດ້ວຍ: ຫວຽດນາມ, ຟິລິບປິນ, ມາເລເຊຍ, ບຣູໄນ ແລະ ໄຕ້ຫວັນ ກ່ຽວກັບການອ້າງກຳມະສິດທັບຊ້ອນເໜືອບັນດາເກາະໃນເຂດນ່ານນ້ຳທະເລຈີນໃຕ້.
![](https://blogger.googleusercontent.com/img/b/R29vZ2xl/AVvXsEiPG5hOFt2C9HbvjSmF57nOa7sWYhpDaSQ4mS4K4n_X4XSycfsfHYm2JQcAro_9DKSGArMs7K1ce_8ve_Jc9I00TXPXaYRVK33GeU8B8Gd_nHzrkU3pbigTOdbiM7rHYkC6ZvZksOACg8k/s1600/1478.jpg)
ທ່ານ ພົນເຮືອຕີ ມາກ ດັນຕັນ ຜູ້ບັງຄັບການເຮືອ USS Ronald Reagan ກ່າວຕໍ່ສື່ມວນຊົນວ່າ ການມາຢ້ຽມຢາມຟິລິບປິນເປັນສ່ວນໜຶ່ງຂອງພາລະກິດສ້າງຄວາມໝັ້ນໃຈໃຫ້ແກ່ບັນດາປະເທດພັນທະມິດຂອງສະຫະລັດ ອາເມຣິກາໃນພູມມິພາກ, ເສີມສ້າງຄວາມສາມາດຂອງກອງທັບເຮືອສະຫະລັດ ອາເມຣິກາໃນການຄຸ້ມຄອງເສລີພາບຂອງທະເລ, ການຄ້າທີ່ບໍ່ຖືກກີດກັນ ແລະ ປ້ອງກັນຄວາມຂັດແຍ່ງ.
ກອ່ນໜ້ານີ້ມີລາຍງານວ່າ ກອງທັບຈີນໄດ້ຕິດຕັ້ງຂີປະນາວຸດຕໍ່ຕ້ານເຮືອ, ຂີປະນາວຸດແບບພື້ນສູ່ອາກາດ, ອຸປະກອນອິເລັກໂຕຼນິກ ແລະ ອຸປະກອນທາງທະຫານອື່ນໆ ເທິງເກາະຫຼາຍແຫ່ງທີ່ຈີນຖົມທະເລຂະຫຍາຍພື້ນທີ່ ໃນກຸ່ມເກາະສະແປຼດລີ ແລະ ນຳຍົນຖິ້ມລະເບີດໄປເຝິກຊ້ອມບິນຂຶ້ນລົງລານແລ່ນຢູ່ເທິງເກາະວູດີ ໃນກຸ່ມເກາະພາຣາເຊວ ສ້າງຄວາມແຕກຕື່ນຕົກໃຈຕໍ່ບັນດາປະເທດຄູ່ຂັດແຍ່ງເໜືອດິນແດນ ແລະ ສະຫະລັດ ອາເມຣິກາ.
ສະຫະລັດ ອາເມຣິກາບໍ່ໄດ້ອ້າງກຳມະສິດເໜືອດິນແດນໃດໆ ໃນທະເລຈີນໃຕ້ ແຕ່ໄດ້ປະກາດເສລີພາບໃນການແລ່ນເຮືອຜ່ານ ແລະ ການບິນຜ່ານ ເປັນຜົນປະໂຫຍດແຫ່ງຊາດຂອງສະຫະລັດ ອາເມຣິກາ.
ທ່ານ ພົນເອກ ເຈມ ແມັດທິສ ລັດຖະມົນຕີກະຊວງການປ້ອງກັນປະເທດສະຫະລັດ ອາເມຣິກາ ກ່າວເມື່ອຕົ້ນເດືອນນີ້ວ່າ: ການຕັດສິນໃຈຂອງລັດຖະບານສະຫະລັດ ອາເມຣິກາເມື່ອໄວໆນີ້ ທີ່ຈະບໍ່ເຊີນຈີນເຂົ້າຮ່ວມການຊ້ອມຮົບທາງທະເລກັບຫຼາຍປະເທດໃນລະດູຮ້ອນປີນີ້ ເປັນການຕອບສະໜອງເບື້ອງຕົ້ນຕໍ່ກິດຈະກຳຂອງຈີນຢູ່ເທິງເກາະທີ່ຍັງມີຄວາມຂັດແຍ່ງ ເຊິ່ງທ່າທີດັ່ງກ່າວຂອງສະຫະລັດ ອາເມຣິກາຖືເປັນການຕອບໂຕ້ເລັກນ້ອຍເທົ່ານັ້ນ ແລະ ທ່ານ ພົນເອກ ເຈມ ແມັດທິສ ເຊື່ອວ່າຜົນທີ່ຈະຕາມມາຂະໜາດໃຫຍ່ກວ່ານີ້ຈະເກີດຂຶ້ນໃນອະນາຄົດ.
![](https://blogger.googleusercontent.com/img/b/R29vZ2xl/AVvXsEhRlKc-okYa4ANdtpBqIBT7bJvFcZjSTmotsWN1ud3GrzGlBZxl-5L7XBEi1L8EZaxXeoECe9dq19TmLms4UheayQAbVSInPS_ayp-zLaECgltEFo9UkOKoRE7ZcbmAMsWZC0nGHt62Utw/s1600/1477.jpg)
![](https://blogger.googleusercontent.com/img/b/R29vZ2xl/AVvXsEgxLyaMnbCdC-B6dNBIrvUJEuCkarePldOkZlUIFp4KRKxmRC9b5KYd6-6MfOLzhNxX52nqslr5zoONt6YpmUOXvPe0egNQ36WmM2Oe1TYYPX21UieiJlnBg0gm43FBAeaX124gmw-GM5U/s1600/1479.jpg)
![](https://blogger.googleusercontent.com/img/b/R29vZ2xl/AVvXsEhIN9RjPWiMMiNFRTkGkNqgJpUV4AFzm1hC51LSp6rI2HDP1u6j1sp-RFkunFwEpXqQRec8hegCxtz5GxKhu11mDoqoew7WKw2RAO9oxhXZZmN0Lk0teuWX6JbpuaDyLXPJq4N2xSd2DKM/s1600/1480.jpg)
![](https://4.bp.blogspot.com/-i8KBoa6MatI/WsjQWHW0GQI/AAAAAAAALE0/gDM2muF3_jwwjNcCYyCNRtuDlzfFMQvcACLcBGAs/s1600/ads-728.png)
ສະແດງຄວາມຄິດເຫັນ